Bìoball air-loidhne

Si-phian 145 - 現代台語譯本羅馬字版

Siōng-chàn ê Si
Tāi-pi̍t o-ló ê si.

¹ Góa ê Siōng-tè góa ê Ông ah, góa beh chun lí chòe chì-koân; góa beh éng-éng-oán-oán chheng-chàn lí ê miâ.

² Góa beh ji̍t-ji̍t chheng-chàn lí, beh éng-oán o-ló lí ê miâ.

³ Siōng Chú chì-tōa, eng-kai siū tōa chheng-chàn; I ê úi-tāi bô hoat-tō͘ chhek-to̍k.

⁴ Chit-tāi beh tùi hit-tāi chheng-chàn lí ê chok-ûi, beh pò-iông lí tōa koân-lêng ê só͘-chòe.

⁵ Lâng beh kóng-khí lí chun-kùi êng-kng ê ui-giâm; góa beh siàu-liām lí kî-biāu ê chok-ûi.

⁶ Lâng beh kóng-khí lí thang kiaⁿ-ùi ê tōa koân-lêng; góa beh pò-iông lí úi-tāi ê chok-ûi.

⁷ In beh pò-iông lí ke̍k-tōa ê un-hūi, beh chhiùⁿ-koa o-ló lí ê kong-gī.

⁸ Siōng Chú ū un-hūi, ū lîn-bín, bô khoài siū-khì, ū tōa chû-ài.

⁹ Siōng Chú thiàⁿ-sioh bān-iú; I ê lîn-bín phó͘-ki̍p I só͘ chō ê it-chhè.

¹⁰ Siōng Chú ah, lí só͘ chō ê it-chhè beh kám-siā lí; lí sèng ê chú-bîn mā beh chheng-chàn lí.

¹¹ In beh kóng-khí lí kok-tō͘ ê êng-kng, tâm-lūn lí ê tōa koân-lêng,

¹² thang hō͘ sè-kan-lâng chai lí tōa koân-lêng ê chok-ûi, chai lí kok-tō͘ ê ui-giâm kap êng-kng.

¹³ Lí ê kok-tō͘ éng-oán chûn-chāi; lí chip-chiáng ê koân-pèng sòa kàu bān-tāi. Siōng Chú it-chhè ê èng-ún sìn-si̍t khó-khò; I thiàⁿ-sioh I só͘ chō ê it-chhè.

¹⁴ Poa̍h-tó sit-pāi ê lâng, Siōng Chú hû-chhî in; siū ap-chè ê lâng, I hû in khí--lâi.

¹⁵ Só͘-ū ê oa̍h-mi̍h lóng gióng-bōng lí; lí chiàu-sî hō͘ in chia̍h-mi̍h.

¹⁶ Lí thí-khui chhiú, hō͘ só͘-ū ê oa̍h-mi̍h lóng chiàu só͘ ài tit-tio̍h pá-chiok.

¹⁷ Siōng Chú it-chhè ê só͘-chòe lóng kong-chèng; I ê chok-ûi chhiong-móa jîn-chû.

¹⁸ Só͘-ū kiû-kiò Siōng Chú ê lâng, I kap in chhin-kūn; I chhin-kūn sêng-si̍t kiû-kiò I ê lâng.

¹⁹ Kèng-ùi I ê lâng, I ōe hō͘ in ê sim-goān si̍t-hiān, koh ōe thiaⁿ in ê kiû-kiò, lâi chín-kiù in.

²⁰ Siōng Chú pó-hō͘ só͘-ū thiàⁿ I ê lâng; m̄-kú chòe pháiⁿ ê lâng, I ōe kā in siau-bia̍t.

²¹ Góa ê chhùi beh kóng-chhut chheng-chàn Siōng Chú ê ōe; goān it-chhè ū sìⁿ-miā--ê, lóng éng-éng-oán-oán chheng-chàn I ê sèng-miâ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan