Bìoball air-loidhne

Si-phian 143 - 現代台語譯本羅馬字版

Kiû Pang-chān ê Kî-tó
Tāi-pi̍t ê si.

¹ Siōng Chú ah, kiû lí thiaⁿ góa ê kî-tó, àⁿ hī-khang thiaⁿ góa ê khún-kiû, chiàu lí ê sìn-si̍t, chiàu lí ê kong-gī ìn-tap góa.

² Kiû lí m̄-thang sím-mn̄g lí ê po̍k-jîn, in-ūi tī lí bīn-chêng, oa̍h--teh ê lâng bô chi̍t ê sī gī-lâng.

³ Tùi-te̍k khún-pek góa, chiong góa thiat-tóe phah-tó tī thô͘-kha, hō͘ góa tiàm tī o͘-àm ê só͘-chāi, chhin-chhiūⁿ sí chin kú ê lâng,

⁴ tì-kàu góa ê sim-sîn sit-chì, kiông-beh hūn--khì; góa ê sim kiaⁿ kah gāng--khì.

⁵ Góa ōe-kì-tit kó͘-chá ê ji̍t, siàu-liām lí it-chhè ê chok-ûi, chēng-chēng siūⁿ lí chhiú ê só͘-chòe.

⁶ Góa ǹg lí gia̍h-chhiú; góa ê sim khat-bō͘ lí chhin-chhiūⁿ khòng-hān ê tōe thèng-hāu hō͘-chúi.

⁷ Siōng Chú ah, kiû lí kóaⁿ-kín ìn-tap góa; góa ê sim-sîn thèng-hāu lí kàu beh hūn--khì. M̄-thang bīn oa̍t-cháu m̄ chhap góa, chiah bián góa chhin-chhiūⁿ sí--khì ê lâng.

⁸ Kiû lí hō͘ góa chá-khí-sî thiaⁿ-kìⁿ lí chû-ài ê siaⁿ, in-ūi góa óa-khò lí. Kiû lí hō͘ góa chai eng-kai kiâⁿ ê lō͘, in-ūi góa ê sim gióng-bōng lí.

⁹ Siōng Chú ah, kiû lí kái-kiù góa thoat-lī góa ê tùi-te̍k, hō͘ góa thang cháu-khì bih tī lí hia.

¹⁰ Lí sī góa ê Siōng-tè, kiû lí kà-sī góa chun-hêng lí ê chí-ì. Goān lí liông-siān ê sîn ín-chhōa góa kiâⁿ pîⁿ-tháⁿ ê lō͘.

¹¹ Siōng Chú ah, kiû lí in-ūi lí ê miâ hō͘ góa koh oa̍h--khí-lâi, chiàu lí ê kong-gī ín-chhōa góa thoat-chhut hoān-lān.

¹² Kiû lí chiàu lí ê chû-ài siau-bia̍t góa ê tùi-te̍k, châu-bia̍t só͘-ū khó͘-chhó͘ góa ê lâng, in-ūi góa sī lí ê po̍k-jîn.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan