Si-phian 140 - 現代台語譯本羅馬字版

Kî-kiû Siōng Chú Pó-hō͘
Tāi-pi̍t ê si, kau hō͘ sèng-ga̍k-tiúⁿ.

¹ Siōng Chú ah, kiû lí kiù góa thoat-lī pháiⁿ-lâng, pó-hō͘ góa thoat-lī hiong-ok ê lâng.

² In sim-lāi tô͘-bô͘ siâ-ok, put-sî chè-chō hun-cheng.

³ In ê chi̍h chhin-chhiūⁿ to̍k-chôa ê chi̍h hiah-ni̍h lāi; in ê chhùi-tûn ū to̍k-chôa ê to̍k.

⁴ Siōng Chú ah, kiû lí pó-siú góa thoat-lī pháiⁿ-lâng ê chhiú, pó-hō͘ góa thoat-lī kiông-pō ê lâng; in tô͘-bô͘ beh kā góa chhia-tó.

⁵ Kiau-ngō͘ ê lâng àm-tiong ku̍t hām-chíⁿ, tiuⁿ lô-bāng, tī lō͘-piⁿ siat khoân-thò beh hāi góa.

⁶ Góa tùi Siōng Chú kóng, “Lí sī góa ê Siōng-tè.” Siōng Chú ah, kiû lí àⁿ hī-khang thiaⁿ góa khún-kiû ê siaⁿ.

⁷ Chì-koân ê Siōng Chú — góa tōa khùi-la̍t ê Chín-kiù-chiá ah, tī kau-chiàn ê sî, lí ū pó-hō͘ góa.

⁸ Siōng Chú ah, kiû lí m̄-thang hō͘ pháiⁿ-lâng ê sim-goān si̍t-hiān, m̄-thang hō͘ in ê kè-bô͘ sêng-kong, tì-kàu chū-ko.

⁹ M̄-thang hō͘ ûi-khùn góa ê lâng sèng-lī; tio̍h hō͘ in chhùi-tûn ê to̍k-hāi hāi-tio̍h in ka-kī.

¹⁰ Kiû lí ēng teh to̍h ê hé-thòaⁿ kàng-lo̍h tī in sin-chiūⁿ; kā in hiat-lo̍h hé, tàn tī Chhim-khiⁿ, bōe koh khí--lâi.

¹¹ Kiû lí hō͘ chè-chō sī-hui ê lâng tī tōe-chiūⁿ khiā bōe tiâu, tio̍h hō͘ chai-hō kā kiông-pō ê lâng tè-tiâu-tiâu, lóng kā in phah-tó.

¹² Góa chai Siōng Chú ōe ūi-tio̍h khùn-khó͘ ê lâng sin-oan, ūi-tio̍h sàn-chhiah-lâng chú-chhî kong-tō.

¹³ Gī-lâng it-tēng ōe kám-siā lí; chèng-ti̍t ê lâng ōe-tàng tī lí bīn-chêng khiā-khí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan