Si-phian 139 - 現代台語譯本羅馬字版

Bû-só͘-put-ti, Bû-só͘-put-chāi ê Siōng Chú
Tāi-pi̍t ê si, kau hō͘ sèng-ga̍k-tiúⁿ.

¹ Siōng Chú ah, lí ū kàm-chhat góa, bat góa.

² Góa ê it-kú-it-tōng lí lóng chai; tùi chin hn̄g lí mā khòaⁿ ōe chhut góa ê sim-su.

³ Góa kiâⁿ-lō͘, góa hioh-khùn, lí lóng teh khòaⁿ; góa ê só͘-kiâⁿ-só͘-chòe, lí mā lóng chai.

⁴ Siōng Chú ah, góa iáu-bē khui-chhùi, lí í-keng chai góa beh kóng sím-mi̍h.

⁵ Lí tī góa ê chêng-āu chiàu-kò͘ góa; lí chhin-chhiú pó-hō͘ góa.

⁶ Lí ê chai-bat hiah-ni̍h kî-biāu, hiah-ni̍h ko-chhim, chhiau-kè góa ê liáu-kái.

⁷ Khì tó-ūi, góa chiah ōe-tàng tô-pī lí? Cháu kàu tó-ūi, góa chiah ōe-tàng tô-siám lí?

⁸ Góa nā peh-chiūⁿ thiⁿ, lí tī hia; Góa nā lo̍h Im-hú, lí mā tī hia.

⁹ Góa nā thí-si̍t pe-khì ji̍t chhut hit-pêng, á-sī hioh tī ji̍t lo̍h chit-pêng,

¹⁰ chiū nā tī hia, lí ê chhiú mā ōe ín-chhōa góa, lí ê chiàⁿ-chhiú mā ōe hû-chhî góa.

¹¹ Góa nā kiû o͘-àm kā góa khàm--khí-lâi, kiò àm-mî kā góa jia-cha̍h,

¹² tùi lí lâi kóng, o͘-àm bô sǹg sī àm, àm-sî chhin-chhiūⁿ ji̍t--sî hiah-ni̍h kng; tùi lí lâi kóng, o͘-àm kap kng-bêng lóng kâng-khoán.

¹³ Lí chō góa ê chōng-hú; góa tī lāu-bú ê pak-tó͘ lāi, lí kā góa sok-chō.

¹⁴ Góa kám-siā lí, in-ūi góa ê siū-chō kî-biāu thang kiaⁿ-ùi. Lí ê chok-ûi kî-biāu; góa ê it-chhè lí oân-choân chai.

¹⁵ Góa tī lâng khòaⁿ bōe tio̍h ê só͘-chāi siū-chō, tī lāu-bú ê pak-tó͘ lāi, lí kā góa sok-chō; góa hêng-sêng ê kè-thêng lí lóng chheng-chhó.

¹⁶ Góa bē chiâⁿ-hêng ê seng-khu, lí í-keng khòaⁿ--tio̍h. Lí ūi-tio̍h góa an-pâi ê ji̍t-chí, lóng í-keng kì tī lí ê chheh.

¹⁷ Siōng-tè ah, lí ê ì-liām si̍t-chāi chin oh liáu-kái! Lí ê sim-su si̍t-chāi bōe-sǹg--tit!

¹⁸ Góa nā beh sǹg, pí hái-soa khah chōe; nā sǹg ōe liáu, mā bōe-tàng thàu-thiat lí ê ò-biāu.

¹⁹ Siōng-tè ah, góa jōa-á-ni̍h ài lí siau-bia̍t pháiⁿ-lâng; góa jōa-á-ni̍h ǹg-bāng kiông-pō ê lâng lī-khui góa.

²⁰ In kóng pháiⁿ-ōe siat-to̍k lí; lí ê tùi-te̍k ēng siâ-ok ê ōe bú-jio̍k lí.

²¹ Siōng Chú ah, oàn-hūn lí ê lâng góa kiám bô oàn-hūn in? Khí-lâi hoán-poān lí ê lâng góa kiám bô iàm-ò͘ⁿ in?

²² Góa chhim-chhim oàn-hūn in, khòaⁿ in chòe góa ê tùi-te̍k.

²³ Siōng-tè ah, kiû lí kàm-chhat góa, chai góa ê sim-su, khó-giām góa, chai góa ê ì-liām.

²⁴ Kiû lí chí-tiám góa, hō͘ góa bô pháiⁿ hêng-ûi, chhōa góa kiâⁿ éng-oán ê tō-lō͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan