Si-phian 136 - 現代台語譯本羅馬字版

Kám-un ê Si

¹ Tio̍h kám-siā Siōng Chú, in-ūi I chì-siān; I ê chû-ài éng-oán chûn-sio̍k.

² Tio̍h kám-siā bān-sîn ê Sîn; I ê chû-ài éng-oán chûn-sio̍k.

³ Tio̍h kám-siā bān-chú ê Chú; I ê chû-ài éng-oán chûn-sio̍k.

⁴ Chí-ū I chòe kî-biāu tōa-sū; I ê chû-ài éng-oán chûn-sio̍k.

⁵ I ēng tì-hūi chhòng-chō thiⁿ; I ê chû-ài éng-oán chûn-sio̍k.

⁶ I kā tōe pho͘ tī chúi ê téng-bīn; I ê chû-ài éng-oán chûn-sio̍k.

⁷ I chhòng-chō tōa ê kng-thé; I ê chû-ài éng-oán chûn-sio̍k.

⁸ I ēng ji̍t-thâu koán-lí ji̍t--sî; I ê chû-ài éng-oán chûn-sio̍k.

⁹ I ēng ge̍h kap chhiⁿ koán-lí mî--sî; I ê chû-ài éng-oán chûn-sio̍k.

¹⁰ I phah-sí Ai-ki̍p-lâng ê tōa-kiáⁿ; I ê chû-ài éng-oán chûn-sio̍k.

¹¹ I chhōa Í-sek-lia̍t-lâng tùi in tiong-kan chhut--lâi; I ê chû-ài éng-oán chûn-sio̍k.

¹² I chhun-chhut tōa koân-lêng ê chhiú; I ê chû-ài éng-oán chûn-sio̍k.

¹³ I kā Âng-hái pun-khui; I ê chû-ài éng-oán chûn-sio̍k.

¹⁴ I chhōa Í-sek-lia̍t tùi hit tiong-kan kè--khì; I ê chû-ài éng-oán chûn-sio̍k.

¹⁵ I chiong Hoat-ló kap i ê kun-peng hiat-lo̍h Âng-hái; I ê chû-ài éng-oán chûn-sio̍k.

¹⁶ I chhōa I ê chú-bîn keng-kè khòng-iá; I ê chû-ài éng-oán chûn-sio̍k.

¹⁷ I phah-sí hiah-ê tōa kun-ông; I ê chû-ài éng-oán chûn-sio̍k.

¹⁸ I thâi-sí kiông koh ióng ê ông; I ê chû-ài éng-oán chûn-sio̍k.

¹⁹ I thâi-sí A-mô͘-lī-ông Se-hông; I ê chû-ài éng-oán chûn-sio̍k.

²⁰ I thâi-sí Pa-san-ông Go̍k; I ê chû-ài éng-oán chûn-sio̍k.

²¹ I chiong in ê thó͘-tōe sù hō͘ I ê chú-bîn chòe sán-gia̍p; I ê chû-ài éng-oán chûn-sio̍k.

²² I sù sán-gia̍p hō͘ I ê po̍k-jîn Í-sek-lia̍t; I ê chû-ài éng-oán chûn-sio̍k.

²³ I tī lán siū khut-jio̍k ê sî bô bōe-kì-tit lán; I ê chû-ài éng-oán chûn-sio̍k.

²⁴ I kái-kiù lán thoat-lī tùi-te̍k; I ê chû-ài éng-oán chûn-sio̍k.

²⁵ I sù chia̍h-mi̍h hō͘ só͘-ū ê oa̍h-mi̍h; I ê chû-ài éng-oán chûn-sio̍k.

²⁶ Tio̍h kám-siā thiⁿ-téng ê Siōng-tè; I ê chû-ài éng-oán chûn-sio̍k.

The Bible Society in Taiwan

Lean sinn:

Ceanglaichean taic

Sanasan