Si-phian 132 - 現代台語譯本羅馬字版

Kiû Siōng Chú Kì-tit kap Tāi-pi̍t Li̍p ê Iok
Peh-kiā chiūⁿ Iâ-lō͘-sat-léng ê si.

¹ Siōng Chú ah, kiû lí ōe-kì-tit Tāi-pi̍t só͘ siū it-chhè ê khó͘-lān,

² ōe-kì-tit i án-chóaⁿ tùi Siōng Chú chiù-chōa, tùi Ngá-kok ê Tāi-lêng-chiá hē-goān,

³ “Góa it-tēng bōe ji̍p-khì góa ê chhù, mā bōe chiūⁿ góa ê bîn-chhn̂g;

⁴ góa bōe hō͘ góa ê ba̍k-chiu khùn--khì, mā bōe iông-ún góa ê ba̍k-chiu-phê ha̍p-óa;

⁵ thèng-hāu góa ūi-tio̍h Siōng Chú chhē-tio̍h só͘-chāi, ūi Ngá-kok ê Tāi-lêng-chiá chhē-tio̍h khiā-khí ê só͘-chāi.”

⁶ Goán thiaⁿ-kìⁿ iok-kūi tī Í-hoat-tha, tī Ngá-ní ê chhân chhē--tio̍h.

⁷ Goán beh ji̍p-khì Siōng Chú khiā-khí ê só͘-chāi; goán beh tī I ê kha-tiam thâu-chêng kūi-pài.

⁸ Siōng Chú ah, kiû lí khí--lâi; lí kap lí ū khùi-la̍t ê iok-kūi chòe-hé ji̍p-khì lí hioh-khùn ê só͘-chāi.

⁹ Goān lí ê chè-si ēng kong-gī chòe saⁿ chhēng; goān lí sèng ê chú-bîn chhut hoaⁿ-hí ê siaⁿ.

¹⁰ Kiû lí in-ūi lí ê po̍k-jîn Tāi-pi̍t ê iân-kò͘, m̄-thang khì-sak lí boah-iû kéng-soán ê kun-ông.

¹¹ Siōng Chú ēng sìn-si̍t tùi Tāi-pi̍t li̍p-sè, it-tēng bōe kái-piàn, kóng, “Góa beh hō͘ lí chi̍t ê kiáⁿ chē lí ê pó-chō.

¹² Lí ê kiáⁿ-sun nā chun-siú góa ê iok, kap góa beh hō͘ in ê kà-sī, in ê kiáⁿ-sun mā ōe éng-oán chē lí ê pó-chō.”

¹³ Siōng Chú ū kéng Sek-an, chòe I pún-sin khiā-khí ê só͘-chāi, kóng,

¹⁴ “Che sī góa éng-oán hioh-khùn ê só͘-chāi; góa beh tiàm chia, in-ūi sī góa só͘ ì-ài.

¹⁵ Góa beh hō͘ Sek-an bí-niû hong-sēng, ēng chia̍h-mi̍h hō͘ i ê sàn-chhiah-lâng kàu-gia̍h thang chia̍h.

¹⁶ Góa beh hō͘ i ê chè-si ēng kiù-un chòe saⁿ chhēng; I sèng ê chú-bîn ōe chhut tōa hoaⁿ-hí ê siaⁿ.

¹⁷ Góa beh hō͘ Tāi-pi̍t ê ông-koân khok-tián chòng-tāi, ūi-tio̍h góa boah-iû kéng-soán ê kun-ông chún-pī kng-teng.

¹⁸ Góa beh hō͘ i ê tùi-te̍k ēng kiàn-siàu chòe saⁿ chhēng; chóng-sī ông tì ê ông-koan ōe hoat-chhut kong-chhái.”

The Bible Society in Taiwan

Lean sinn:

Ceanglaichean taic

Sanasan