Bìoball air-loidhne

Si-phian 126 - 現代台語譯本羅馬字版

Ūi Sek-an ê Ho̍k-heng Hoaⁿ-hí
Peh-kiā chiūⁿ Iâ-lō͘-sat-léng ê si.

¹ Siōng Chú chhōa lán chiah-ê siū-lia̍h ê lâng tńg-lâi Sek-an ê sî, lán chhin-chhiūⁿ teh chòe bāng.

² Hit-sî lán ê chhùi ha-ha-chhiò, tōa-siaⁿ hoan-ho͘. Lia̍t-kok ê lâng kóng, “Siōng Chú ūi-tio̍h in chòe tōa tāi-chì.”

³ Siōng Chú si̍t-chāi ū ūi lán chòe tōa tāi-chì; lán hui-siông hoaⁿ-hí.

⁴ Siōng Chú ah, kiû lí hō͘ goán chiah-ê siū-lia̍h ê lâng tò-tńg--lâi, chhin-chhiūⁿ lâm-hng ta-sò ê tōe ū khoe-chúi koh teh lâu.

⁵ Lâu ba̍k-sái iā chéng-chí--ê, ōe chhut hoaⁿ-hí ê siaⁿ siu-koah.

⁶ Lâu ba̍k-sái tòa chéng-chí chhut--khì-ê, ōe tòa i ê be̍h-khún hoaⁿ-hoaⁿ-hí-hí tò--lâi.

The Bible Society in Taiwan

Lean sinn:

Ceanglaichean taic

Sanasan