Bìoball air-loidhne

Si-phian 119 - 現代台語譯本羅馬字版

Siōng Chú ê Lu̍t-hoat

¹ Hêng-ûi bô thang chí-chek, seng-oa̍h chun-hêng Siōng Chú lu̍t-hoat ê lâng, chit-khoán lâng chin ū hok-khì!

² Thiaⁿ-thàn Siōng Chú ê kà-sī, choân-sim chhē-kiû I ê lâng, chit-khoán lâng chin ū hok-khì!

³ In bô chòe put-gī ê sū, ū chun-hêng I ê tō-lō͘.

⁴ Siōng Chú, lí chiong lí ê lu̍t-lē bēng-lēng goán, ài goán khak-si̍t chun-siú.

⁵ Goān góa ê só͘-kiâⁿ-só͘-chòe, khak-si̍t ū teh chun-siú lí ê kui-lē.

⁶ Góa tiōng-sī lí it-chhè ê kài-bēng, bōe tì-kàu sit-pāi kiàn-siàu.

⁷ Góa ha̍k-si̍p lí kong-chèng ê phòaⁿ-toàn; góa beh sêng-sim kám-siā lí.

⁸ Góa beh chun-siú lí ê kui-lē; kiû lí choa̍t-tùi m̄-thang pàng-sak góa.

Ì-ài Siōng Chú ê Lu̍t-hoat

⁹ Siàu-liân-lâng tio̍h án-chóaⁿ hō͘ seng-oa̍h sûn-kiat? Tio̍h chun-hêng lí ê ōe!

¹⁰ Siōng Chú ah, góa beh choân-sim chhē-kiû lí; kiû lí hō͘ góa bô phian-lī lí ê kài-bēng.

¹¹ Góa chiong lí ê ōe khǹg tī sim-lāi, chiah bián hoān-chōe tek-chōe lí.

¹² Siōng Chú ah, lí eng-kai siū chheng-chàn; kiû lí kà góa bat lí ê kui-lē.

¹³ Lí só͘ kóng it-chhè ê kui-lē, góa ēng chhùi chhut-siaⁿ liām.

¹⁴ Góa ì-ài lí ê kà-sī, chhin-chhiūⁿ lâng ì-ài tōa châi-hù.

¹⁵ Góa ná liām ná siūⁿ lí ê lu̍t-lē, tiōng-sī lí ê tō-lō͘.

¹⁶ Góa ì-ài lí ê bēng-lēng, bōe bōe-kì-tit lí ê ōe.

Chun-thàn Siōng Chú ê Lu̍t-hoat

¹⁷ Kiû lí si tōa-un hō͘ lí ê po̍k-jîn, hō͘ góa oa̍h thang chun-thàn lí ê ōe.

¹⁸ Kiû lí khui góa ê ba̍k-chiu, hō͘ góa khòaⁿ-chhut lí lu̍t-hoat ê kî-biāu.

¹⁹ Góa tī tōe-chiūⁿ sī chhut-gōa-lâng; kiû lí m̄-thang tùi góa khàm-ba̍t lí ê kài-bēng.

²⁰ Góa put-sî pek-chhiat him-bō͘ lí ê kui-lē, him-bō͘ kàu kiông-beh hūn--khì.

²¹ Lí chek-pī kiau-ngō͘ siū chiù-chó͘ ê lâng; in bê-lō͘ lī-khui lí ê kài-bēng.

²² Lâng tùi góa ê lêng-jio̍k kap khòaⁿ-khin, kiû lí tû--khì, in-ūi góa ū chun-siú lí ê kà-sī.

²³ Thóng-tī-chiá chē-teh chham-siông beh hāi góa, m̄-kú lí ê po̍k-jîn teh be̍k-sióng lí ê bēng-lēng.

²⁴ Lí ê kà-sī sī góa só͘ ì-ài, sī góa ê tō-su.

Chhî-siú Siōng Chú ê Lu̍t-hoat

²⁵ Góa siū phah-tó phak tī thô͘-kha; kiû lí chiàu lí ê èng-ún pó-siú góa ê sìⁿ-miā.

²⁶ Góa tùi lí kóng-khí só͘ chòe ê tāi-chì, lí ū ìn góa; kiû lí kà góa bat lí ê kui-lē.

²⁷ Kiû lí hō͘ góa bêng-pe̍k lí ê lu̍t-lē, góa thang be̍k-sióng lí kî-biāu ê chok-ûi.

²⁸ Góa ê sim pi-siong kàu beh chhùi--khì; kiû lí chiàu lí ê èng-ún hō͘ góa hôe-ho̍k goân-khì.

²⁹ Kiû lí hō͘ góa bô kiâⁿ hu-ké ê tō-lō͘; kiû lí si-un kà-sī góa lí ê lu̍t-hoat.

³⁰ Góa ū kéng chin-si̍t ê lō͘; góa khòaⁿ-tāng lí ê kui-lē.

³¹ Góa chhî-siú lí ê kà-sī; Siōng Chú ah, kiû lí m̄-thang hō͘ góa sit-pāi kiàn-siàu.

³² Góa beh jia̍t-chhiat tui-kiû lí ê kài-bēng, in-ūi lí ū khui góa ê sim-khiàu.

Kiû Tì-hūi Liáu-kái Siōng Chú ê Lu̍t-hoat

³³ Siōng Chú ah, kiû lí chiong chun-siú lí bēng-lēng ê tō-lō͘ chí-sī góa, hō͘ góa chai án-chóaⁿ thiat-tóe chun-siú.

³⁴ Kiû lí hō͘ góa ū tì-hūi chun-siú lí ê lu̍t-hoat, thang choân-sim chun-siú.

³⁵ Kiû lí chhōa góa kiâⁿ lí kài-bēng ê lō͘; chit-ê lō͘ góa chin ì-ài.

³⁶ Kiû lí hō͘ góa ê sim kui-ǹg lí ê kà-sī, bô ǹg put-gī ê chîⁿ-châi.

³⁷ Kiû lí hō͘ góa bōe ì-ài hu-ké, chiàu lí ê ōe sù góa oa̍h-miā.

³⁸ Kiû lí si̍t-hiān tùi lí po̍k-jîn ê èng-ún, hō͘ lâng thang kèng-ùi lí.

³⁹ Kiû lí hō͘ góa só͘ kiaⁿ ê lêng-jio̍k lī-khui góa, in-ūi lí ê kui-lē sī hó.

⁴⁰ Góa him-bō͘ lí ê lu̍t-lē; kiû lí chiàu lí ê kong-gī sù góa oa̍h-miā.

Sìn-khò Siōng Chú ê Lu̍t-hoat

⁴¹ Siōng Chú ah, kiû lí hián-sī lí ê chû-ài, chiàu lí ê èng-ún chín-kiù góa,

⁴² góa chiū thang ìn-tap lêng-jio̍k góa ê lâng, in-ūi góa óa-khò lí ê ōe.

⁴³ Kiû lí m̄-thang chiong chin-lí ê ōe tùi góa ê chhùi chhiúⁿ--khì, in-ūi góa gióng-bōng lí ê phòaⁿ-toàn.

⁴⁴ Góa beh kè-sio̍k siú lí ê lu̍t-hoat, ti̍t-kàu éng-oán.

⁴⁵ Góa beh chū-iû chū-chāi seng-oa̍h, in-ūi góa ū chhē-kiû lí ê lu̍t-lē.

⁴⁶ Góa tī kun-ông ê bīn-chêng káng-lūn lí ê kà-sī, mā bōe tì-kàu kiàn-siàu.

⁴⁷ Lí ê kài-bēng hō͘ góa hí-lo̍k, in-ūi chiah-ê kài-bēng sī góa só͘ ì-ài.

⁴⁸ Góa chun-tiōng koh ì-ài lí ê kài-bēng; góa mā beh ná liām ná siūⁿ lí ê kui-lē.

Khak-sìn Siōng Chú ê Lu̍t-hoat

⁴⁹ Kiû lí ōe-kì-tit tùi lí po̍k-jîn ê èng-ún, in-ūi lí hō͘ góa ū ǹg-bāng.

⁵⁰ Tī hoān-lān tiong, góa tit-tio̍h an-ùi; tùi lí ê èng-ún, góa tit-tio̍h oa̍h-miā.

⁵¹ Kiau-ngō͘ ê lâng it-ti̍t bú-jio̍k thí-chhiò góa, iáu-kú góa m̄-bat phian-lī lí ê lu̍t-hoat.

⁵² Siōng Chú ah, góa ōe-kì-tit lí kó͘-chá í-lâi ê kui-lē, tùi chiah-ê tit-tio̍h an-ùi.

⁵³ Góa in-ūi hiah-ê khì-sak lí lu̍t-hoat ê pháiⁿ-lâng, khí tōa siū-khì, chhin-chhiūⁿ hé teh to̍h.

⁵⁴ Góa bô-lūn chhut-gōa khì tó-ūi, lóng ēng lí ê kui-lē chòe si-koa.

⁵⁵ Siōng Chú ah, góa mî--sî ōe-kì-tit lí ê tông-chāi, chun-siú lí ê lu̍t-hoat.

⁵⁶ Góa tit-tio̍h hok-hūn, in-ūi góa ū sūn-thàn lí ê lu̍t-lē.

Jia̍t-sim Chun-thàn Siōng Chú ê Lu̍t-hoat

⁵⁷ Siōng Chú sī góa ê sán-gia̍p; góa bat kóng, “Góa beh chun-thàn lí ê ōe.”

⁵⁸ Góa bat choân-sim kiû lí ê un; kiû lí chiàu lí ê èng-ún lîn-bín góa.

⁵⁹ Góa chhim-chhim su-siúⁿ lí ê tō-lō͘, oa̍t-tńg-sin kui-ǹg lí ê kà-sī.

⁶⁰ Góa kóaⁿ-kín bô iân-chhiân, beh siú lí ê kài-bēng.

⁶¹ Pháiⁿ-lâng ê soh khún-pa̍k góa, m̄-kú góa bô bōe-kì-tit lí ê lu̍t-hoat.

⁶² Góa in-ūi lí kong-chèng ê phòaⁿ-toàn, pòaⁿ-mî khí-lâi kám-siā lí.

⁶³ Só͘-ū kèng-ùi lí, chun-siú lí lu̍t-lē ê lâng, góa kap in chòe pêng-iú.

⁶⁴ Siōng Chú ah, lí ê chû-ài piàn-móa choân-tōe; kiû lí kà góa bat lí ê kui-lē.

Siōng Chú Pó-kùi ê Lu̍t-hoat

⁶⁵ Siōng Chú ah, lí ū chiàu lí ê èng-ún, hó khoán-thāi lí ê po̍k-jîn.

⁶⁶ Kiû lí kà-sī góa, hō͘ góa ū tì-sek kap chèng-khak ê phòaⁿ-toàn, in-ūi góa sìn-khò lí ê kài-bēng.

⁶⁷ Góa chêng ū kiâⁿ bê-lō͘, siū lí kéng-kài, taⁿ góa chun-siú lí ê ōe.

⁶⁸ Lí sī liông-siān, lí ê só͘-chòe lóng sī hó; kiû lí kà góa bat lí ê kui-lē.

⁶⁹ Kiau-ngō͘ ê lâng ēng pe̍h-chha̍t-ōe kong-kek góa, m̄-kú góa beh choân-sim chun-siú lí ê lu̍t-lē.

⁷⁰ In ê sim chhin-chhiūⁿ hō͘ iû pau-ba̍t bâ-pì, m̄-kú góa ì-ài lí ê lu̍t-hoat.

⁷¹ Góa siū koán-kàu tùi góa ū lī-ek, hō͘ góa thang ha̍k-si̍p lí ê kui-lē.

⁷² Lí só͘ kóng ê lu̍t-hoat tùi góa ū lī-ek, iâⁿ-kè chheng-bān ê kim-gûn.

Siōng Chú Kong-gī ê Lu̍t-hoat

⁷³ Lí ê chhiú chhòng-chō góa, lia̍p-chō góa; kiû lí sù góa tì-hūi thang ha̍k-si̍p lí ê kài-bēng.

⁷⁴ Kèng-ùi lí ê lâng ōe khòaⁿ-kìⁿ góa lâi hoaⁿ-hí, in-ūi góa gióng-bōng lí ê ōe.

⁷⁵ Siōng Chú ah, góa chai lí ê phòaⁿ-toàn kong-chèng, lí ū chiàu lí ê sìn-si̍t koán-kàu góa.

⁷⁶ Kiû lí chiàu lí tùi po̍k-jîn ê èng-ún, ēng lí ê chû-ài an-ùi góa.

⁷⁷ Goān lí ê chû-pi lîm-kàu góa, hō͘ góa thang oa̍h, in-ūi lí ê lu̍t-hoat sī góa só͘ ì-ài.

⁷⁸ Goān kiau-ngō͘ ê lâng sit-pāi kiàn-siàu, in-ūi in bô lí-iû óng-khut góa, m̄-kú góa beh ná liām ná siūⁿ lí ê lu̍t-lē.

⁷⁹ Goān kèng-ùi lí, jīn-bat lí kà-sī ê lâng, tò-tńg-lâi chiap-la̍p góa.

⁸⁰ Goān góa choân-sim chun-siú lí ê kui-lē, hō͘ góa bōe tì-kàu sit-pāi kiàn-siàu.

Kî-kiû Siōng Chú Kái-kiù

⁸¹ Góa ê sim pek-chhiat him-bō͘ lí ê chín-kiù kàu beh hūn--khì; lí ê ōe hō͘ góa ū ǹg-bāng.

⁸² Góa in-ūi ǹg-bāng lí ê èng-ún kàu ba̍k-chiu beh hoe--khì; góa kóng, “Lí sím-mi̍h sî beh an-ùi góa?”

⁸³ Sui-jiân góa chhin-chhiūⁿ phê-tē hō͘ hé hun kah beh ta--khì, iáu-kú góa bô bōe-kì-tit lí ê bēng-lēng.

⁸⁴ Lí ê po̍k-jîn tio̍h koh jím-nāi jōa kú? Lí tī-sî chiah beh sím-phòaⁿ khún-pek góa ê lâng?

⁸⁵ Kiau-ngō͘ bô thàn lí lu̍t-hoat ê lâng, ku̍t hām-khiⁿ beh hāi góa.

⁸⁶ In bô lí-iû khún-pek góa, m̄-kú lí ê kài-bēng lóng khó-khò; kiû lí pang-chān góa.

⁸⁷ Góa hiám-hiám-á hō͘ in tùi tōe-chiūⁿ siau-bia̍t, m̄-kú góa bô pàng-sak lí ê lu̍t-lē.

⁸⁸ In-ūi lí ū hong-sēng ê chû-ài, kiû lí pó-siú góa ê sìⁿ-miā; góa beh chun-siú lí ê chhùi só͘ chhut ê kà-sī.

Siong-sìn Siōng Chú ê Lu̍t-hoat

⁸⁹ Siōng Chú ah, lí éng-oán chûn-chāi; lí ê ōe khak-li̍p tī thiⁿ-téng.

⁹⁰ Lí ê sìn-si̍t sòa kàu bān-tāi; lí kiàn-li̍p tōe, hō͘ i khak-li̍p.

⁹¹ Thiⁿ tōe chiàu lí ê an-pâi, kàu taⁿ iáu chûn-chāi; in lóng sī lí ê chhe-ēng.

⁹² Góa nā m̄-sī ì-ài lí ê lu̍t-hoat, chá chiū tī góa ê khó͘-lān tiong bia̍t-bông.

⁹³ Góa éng-oán bōe bōe-kì-tit lí ê lu̍t-lē, in-ūi lí ēng lí ê lu̍t-lē pó-siú góa ê sìⁿ-miā.

⁹⁴ Góa sī lí ê, kiû lí kiù góa, in-ūi góa chhē-kiû lí ê lu̍t-lē.

⁹⁵ Pháiⁿ-lâng tng-tán beh húi-bia̍t góa, m̄-kú góa beh be̍k-sióng lí ê kà-sī.

⁹⁶ Góa khòaⁿ-chhut só͘ ū oân-choân--ê lóng iú-hān, chí-ū lí ê kài-bēng oân-choân, bô kài-hān.

Ì-ài Siōng Chú ê Lu̍t-hoat

⁹⁷ Góa si̍t-chāi chin ì-ài lí ê lu̍t-hoat, kui-ji̍t ná liām ná siūⁿ.

⁹⁸ Lí ê kài-bēng put-sî tī góa sin-piⁿ, hō͘ góa pí góa ê tùi-te̍k khah ū tì-hūi.

⁹⁹ Góa pí góa lóng-chóng ê sian-siⁿ khah thong-ta̍t, in-ūi góa ná liām ná siūⁿ lí ê kà-sī.

¹⁰⁰ Góa pí lāu-lâng khah ū tì-hūi, in-ūi góa chun-siú lí ê lu̍t-lē.

¹⁰¹ Góa kìm-chí góa ê kha kiâⁿ it-chhè ê pháiⁿ-lō͘, hō͘ góa thang chun-hêng lí ê ōe.

¹⁰² Góa bô phian-lī lí ê kui-lē, in-ūi lí ū kà-sī góa.

¹⁰³ Lí ê ōe tī góa chhùi-lāi, pí bi̍t koh-khah tiⁿ.

¹⁰⁴ Góa tùi lí ê lu̍t-lē tit-tio̍h tì-hūi, só͘-í góa oàn-hūn it-chhè siâ-ok ê lō͘.

Siōng Chú Lu̍t-hoat ê Kng

¹⁰⁵ Lí ê ōe sī góa kha-chêng ê teng, sī góa lō͘-siōng ê kng.

¹⁰⁶ Lí kong-chèng ê phòaⁿ-toàn, góa koat-ì beh chun-hêng; góa it-tēng beh án-ni chun-siú.

¹⁰⁷ Góa siū-tio̍h ke̍k-tōa ê khó͘-lān; Siōng Chú ah, kiû lí chiàu lí ê èng-ún pó-siú góa ê sìⁿ-miā.

¹⁰⁸ Siōng Chú ah, kiû lí chiap-siū góa ê chhùi hoaⁿ-hí hiàn ê o-ló, koh chiong lí ê kui-lē kà-sī góa.

¹⁰⁹ Góa ê sìⁿ-miā put-sî tú-tio̍h gûi-hiám, iáu-kú góa bô bōe-kì-tit lí ê lu̍t-hoat.

¹¹⁰ Pháiⁿ-lâng siat lô-bāng beh hāi góa, iáu-kú góa bô phian-lī lí ê lu̍t-lē.

¹¹¹ Góa chiong lí ê kà-sī chòe éng-oán ê sán-gia̍p, in-ūi chiah-ê sī góa sim só͘ ì-ài.

¹¹² Góa choân-sim kui-ǹg lí ê bēng-lēng, éng-oán chun-thàn, ti̍t-kàu sìⁿ-miā kiat-sok.

Tùi Siōng Chú ê Lu̍t-hoat Tit-tio̍h Pó-hō͘

¹¹³ Tùi lí bô tiong-sim ê lâng, góa iàm-ò͘ⁿ; góa só͘ ì-ài--ê, sī lí ê lu̍t-hoat.

¹¹⁴ Lí sī góa siám-bih ê só͘-chāi, sī pó-hō͘ góa ê tún-pâi; góa gióng-bōng lí ê èng-ún.

¹¹⁵ Choh-pháiⁿ ê lâng ah, tio̍h lī-khui góa, hō͘ góa thang chun-siú góa ê Siōng-tè ê kài-bēng.

¹¹⁶ Kiû lí chiàu lí ê èng-ún hû-chhî góa, pó-siú góa ê sìⁿ-miā, hō͘ góa bô in-ūi gióng-bōng lí sit-pāi kiàn-siàu.

¹¹⁷ Kiû lí hû-chhî góa, góa chiū tit-kiù; góa beh put-sî choân-sim chun-hêng lí ê bēng-lēng.

¹¹⁸ Ûi-pōe lí bēng-lēng ê lâng, lí kū-choa̍t in; in ê khúi-chà ōe sit-pāi.

¹¹⁹ Sè-kan ê pháiⁿ-lâng, lí khòaⁿ-chòe pùn-sò kā in tû--khì, só͘-í góa ì-ài lí ê kà-sī.

¹²⁰ Góa in-ūi kiaⁿ-ùi lí, kui seng-khu phi̍h-phi̍h-chhoah; lí ê sím-phòaⁿ hō͘ góa kiaⁿ-hiâⁿ.

Chun-hêng Siōng Chú ê Lu̍t-hoat

¹²¹ Góa ū si̍t-hêng kong-gī chèng-ti̍t; kiû lí m̄-thang kā góa pàng hō͘ ap-chè góa ê lâng.

¹²² Kiû lí pó-chèng lí ê po̍k-jîn sū-sū heng-thong, bô siū-tio̍h kiau-ngō͘ ê lâng ap-chè.

¹²³ Góa ǹg-bāng lí ê chín-kiù kap kong-gī ê èng-ún, tì-kàu ba̍k-chiu hoe.

¹²⁴ Kiû lí chiàu lí ê chû-ài tùi-thāi lí ê po̍k-jîn, chiong lí ê kui-lē kà-sī góa.

¹²⁵ Góa sī lí ê po̍k-jîn, kiû lí sù góa tì-hūi, hō͘ góa bat lí ê kà-sī.

¹²⁶ Siōng Chú ah, hiān-chāi sī lí hêng-tōng ê sî, in-ūi lâng phò-hoāi lí ê lu̍t-hoat.

¹²⁷ Só͘-í góa ì-ài lí ê kài-bēng, pí kim, pí sûn-kim koh-khah ài.

¹²⁸ Lí ūi bān-sū tēng ê lu̍t-lē, góa lóng chun-hêng, só͘-í góa iàm-ò͘ⁿ it-chhè hu-ké ê lō͘.

Khat-bō͘ Chun-hêng Siōng Chú ê Lu̍t-hoat

¹²⁹ Lí ê kà-sī kî-biāu, góa chīn-sim chun-siú.

¹³⁰ Lí ê ōe chi̍t-ē kóe-seh chiū hoat-chhut kng, liân gōng-ti̍t ê lâng mā ōe liáu-kái.

¹³¹ Góa chhùi tōa khui ti̍t-ti̍t chhoán, khat-bō͘ lí ê kài-bēng.

¹³² Kiû lí oa̍t kè-lâi khòaⁿ góa, lîn-bín góa, chhin-chhiūⁿ lí teh tùi-thāi kèng-ài lí miâ ê lâng.

¹³³ Kiû lí chiàu lí ê èng-ún ín-chhōa góa ê kha-pō͘, bô iông-ún chōe-ok koán-hat góa.

¹³⁴ Kiû lí kiù góa thoat-lī lâng ê ap-chè, hō͘ góa thang chun-siú lí ê lu̍t-lē.

¹³⁵ Goān lí ēng lí ê bīn ê kng chiò lí ê po̍k-jîn, kà góa bat lí ê kui-lē.

¹³⁶ Góa ê ba̍k-sái chhin-chhiūⁿ khoe-chúi ti̍t-ti̍t lâu, in-ūi lâng bô chun-siú lí ê lu̍t-hoat.

Siōng Chú ê Lu̍t-hoat Kong-chèng

¹³⁷ Siōng Chú, lí sī kong-gī; lí ê phòaⁿ-toàn kong-chèng.

¹³⁸ Lí pan-pò͘ ê lu̍t-lē kong-chèng, oân-choân khó-khò.

¹³⁹ Góa hui-siông siū-khì chhin-chhiūⁿ hé beh kā góa thun-bia̍t, in-ūi góa ê tùi-te̍k bōe-kì-tit lí ê ōe.

¹⁴⁰ Lí ê èng-ún sûn-chin khó-khò; lí ê po̍k-jîn chin ì-ài.

¹⁴¹ Góa pi-bî, hō͘ lâng khòaⁿ-khin, m̄-kú góa bô bōe-kì-tit lí ê lu̍t-lē.

¹⁴² Lí ê kong-gī sòa kàu éng-oán; lí ê lu̍t-hoat chin-si̍t.

¹⁴³ Góa siū-tio̍h hoān-lān iu-khó͘, iáu-kú ì-ài lí ê kài-bēng.

¹⁴⁴ Lí ê kà-sī éng-oán kong-chèng; kiû lí sù góa tì-hūi, hō͘ góa thang oa̍h.

Kî-kiû Siōng Chú Kái-kiù

¹⁴⁵ Siōng Chú ah, góa choân-sim kiû-kiò lí, kiû lí ìn góa; góa beh chun-siú lí ê bēng-lēng.

¹⁴⁶ Góa kiû-kiò lí, kiû lí kiù góa; góa beh chun-siú lí ê kà-sī.

¹⁴⁷ Thiⁿ-bē-kng góa chiū khí-lâi kiû-kiò lí; góa gióng-bōng lí ê ōe.

¹⁴⁸ Góa kui-mî ba̍k-chiu kim-kim, ná liām ná siūⁿ lí ê ōe.

¹⁴⁹ Siōng Chú ah, in-ūi lí ū chû-ài, kiû lí thiaⁿ góa ê siaⁿ; chiàu lí kong-chèng ê phòaⁿ-toàn, kiû lí pó-siú góa ê sìⁿ-miā.

¹⁵⁰ Kè-bô͘ chòe pháiⁿ ê lâng pek-kūn góa; in lī lí ê lu̍t-hoat hn̄g-hn̄g.

¹⁵¹ M̄-kú Siōng Chú ah, lí óa-kūn góa; lí ê kài-bēng chin-si̍t khó-khò.

¹⁵² Góa chá chiū ha̍k-si̍p lí ê kà-sī; lí hō͘ in khak-li̍p kàu éng-oán.

Kî-kiû Siōng Chú Pang-chān

¹⁵³ Kiû lí koan-sim góa ê khó͘-lān lâi kái-kiù góa, in-ūi góa bô bōe-kì-tit lí ê lu̍t-hoat.

¹⁵⁴ Kiû lí kā góa sin-oan, kiù-sio̍k góa, chiàu lí ê èng-ún pó-siú góa ê sìⁿ-miā.

¹⁵⁵ Kiù-un lī-khui pháiⁿ-lâng hn̄g-hn̄g, in-ūi in bô chhē-kiû lí ê bēng-lēng.

¹⁵⁶ Siōng Chú, lí ū hong-sēng ê chû-ài; chiàu lí kong-chèng ê phòaⁿ-toàn, kiû lí pó-siú góa ê sìⁿ-miā.

¹⁵⁷ Khún-pek góa, tùi-te̍k góa ê lâng chin chōe, iáu-kú góa bô phian-lī lí ê kà-sī.

¹⁵⁸ Góa khòaⁿ-tio̍h kan-ok ê lâng chiū chin iàm-ò͘ⁿ, in-ūi in bô chun-siú lí ê ōe.

¹⁵⁹ Lí khòaⁿ góa jōa-á-ni̍h ì-ài lí ê lu̍t-lē; Siōng Chú ah, kiû lí chiàu lí ê chû-ài pó-siú góa ê sìⁿ-miā.

¹⁶⁰ Lí ê ōe ê pún-chit sī chin-si̍t; lí it-chhè kong-chèng ê phòaⁿ-toàn éng-oán chûn-sio̍k.

Ì-ài Siōng Chú ê Lu̍t-hoat

¹⁶¹ Thóng-tī-chiá bô-lí-bô-iû pek-hāi góa; m̄-kú góa ê sim kiaⁿ-ùi lí ê ōe.

¹⁶² Góa ì-ài lí ê ōe, chhin-chhiūⁿ lâng tit-tio̍h chin chōe chiàn-lī-phín.

¹⁶³ Góa thòng-hūn iàm-ò͘ⁿ pe̍h-chha̍t-ōe, m̄-kú góa ì-ài lí ê lu̍t-hoat.

¹⁶⁴ In-ūi lí kong-chèng ê phòaⁿ-toàn, góa ta̍k-ji̍t chhit piàn chheng-chàn lí.

¹⁶⁵ Ì-ài lí ê lu̍t-hoat ê lâng ū tōa pêng-an, bô chi̍t hāng ōe hō͘ in poa̍h-tó sit-pāi.

¹⁶⁶ Siōng Chú ah, góa ǹg-bāng lí ê chín-kiù, chun-hêng lí ê kài-bēng.

¹⁶⁷ Góa ê sim ū chun-siú lí ê kà-sī; chiah-ê ōe, góa hui-siông ì-ài.

¹⁶⁸ Góa ū siú lí ê lu̍t-lē kap kà-sī; góa ê só͘-kiâⁿ-só͘-chòe, lí lóng khòaⁿ ōe tio̍h.

Khat-bō͘ Siōng Chú Chín-kiù

¹⁶⁹ Siōng Chú ah, goān góa kiû-kiò ê siaⁿ thàu kàu lí ê bīn-chêng; kiû lí chiàu lí ê èng-ún sù góa tì-hūi.

¹⁷⁰ Goān góa khún-kiû ê ōe ta̍t-kàu lí bīn-chêng; kiû lí chiàu lí ê èng-ún khan-kiù góa.

¹⁷¹ Goān góa ê chhùi-tûn hoat-chhut o-ló, in-ūi lí ū chiong lí ê lu̍t-lē kà-sī góa.

¹⁷² Goān góa ê chi̍h soan-pò͘ lí ê èng-ún, in-ūi lí ê kài-bēng lóng kong-chèng.

¹⁷³ Kiû lí chhun-chhiú pang-chān góa, in-ūi góa ū soán-te̍k lí ê lu̍t-lē.

¹⁷⁴ Siōng Chú ah, góa khat-bō͘ lí ê chín-kiù; lí ê lu̍t-hoat sī góa só͘ ì-ài.

¹⁷⁵ Kiû lí hō͘ góa oa̍h--teh, thang chheng-chàn lí, hō͘ lí ê phòaⁿ-toàn pang-chān góa.

¹⁷⁶ Góa bê-lō͘ chhin-chhiūⁿ sit-bê ê iûⁿ; kiû lí kā lí ê po̍k-jîn chhē tò-tńg, in-ūi góa bô bōe-kì-tit lí ê kài-bēng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan