Si-phian 118 - 現代台語譯本羅馬字版

Ūi Sèng-lī Kám-siā Siōng Chú

¹ Tio̍h kám-siā Siōng Chú, in-ūi I chì-siān; I ê chû-ài sòa kàu éng-oán!

² Goān Í-sek-lia̍t kóng, “I ê chû-ài sòa kàu éng-oán!”

³ Goān A-lûn chè-si ê ke kóng, “I ê chû-ài sòa kàu éng-oán!”

⁴ Goān só͘-ū kèng-ùi Siōng Chú ê lâng kóng, “I ê chû-ài sòa kàu éng-oán!”

⁵ Tī gûi-kip ê sî, góa kiû-kiò Siōng Chú, Siōng Chú chiū ìn-tap góa, kái-kiù góa.

⁶ Siōng Chú kap góa tông-chāi, góa bōe kiaⁿ-hiâⁿ; lâng ōe-tàng kā góa án-chóaⁿ?

⁷ Siōng Chú ūi góa, chòe góa ê pang-chān; góa ōe khòaⁿ-tio̍h góa ê tùi-te̍k siū pò-èng.

⁸ Chhē Siōng Chú chòe pī-lān-só͘ pí óa-khò lâng khah hó!

⁹ Chhē Siōng Chú chòe pī-lān-só͘ pí óa-khò thóng-tī-chiá khah hó!

¹⁰ Lia̍t-kok kā góa pau-ûi, góa hōng Siōng Chú ê miâ kā in châu-bia̍t!

¹¹ In pau-ûi góa, tùi sì-bīn ûi-khùn góa; góa hōng Siōng Chú ê miâ kā in châu-bia̍t!

¹² In chhin-chhiūⁿ phang kā góa pau-ûi, chhin-chhiūⁿ hé sio chhì-phè án-ni sio góa; góa hōng Siōng Chú ê miâ kā in châu-bia̍t!

¹³ In chhut-la̍t chhia góa, hō͘ góa hiám poa̍h-tó, m̄-kú Siōng Chú pang-chān góa.

¹⁴ Siōng Chú sī góa ê khùi-la̍t, góa beh chhiùⁿ-koa chheng-chàn; I kā góa kái-kiù.

¹⁵ Tī Siōng Chú chú-bîn ê pò͘-pîⁿ lāi ū khái-soân ê hoan-ho͘, “Siōng Chú ê chiàⁿ-chhiú hián-chhut tōa koân-lêng!

¹⁶ Siōng Chú ê chiàⁿ-chhiú gia̍h-koân-koân; Siōng Chú ê chiàⁿ-chhiú hián-chhut tōa koân-lêng!”

¹⁷ Góa bōe tì-kàu sí, ōe oa̍h--lo̍h-khì, thang kóng-khí Siōng Chú ê chok-ûi.

¹⁸ Siōng Chú giâm-giâm koán-kàu góa, chóng-sī bô hō͘ góa tì-kàu sí.

¹⁹ Kā góa khui kong-gī ê mn̂g, hō͘ góa thang ji̍p-khì kám-siā Siōng Chú.

²⁰ Chit-ê mn̂g sī Siōng Chú ê mn̂g, chí-ū chèng-ti̍t ê lâng ōe-tàng ji̍p--khì.

²¹ Siōng-tè ah, lí ū ìn-tap góa, góa beh kám-siā lí, in-ūi lí hō͘ góa tit-tio̍h kái-kiù.

²² Khí-chhù sai-hū khì-sak ê chio̍h, í-keng chiâⁿ-chòe siōng tiōng-iàu ê ki-chio̍h.

²³ Che sī Siōng Chú ê chok-ûi; lán khòaⁿ--khí-lâi kám-kak chin kî-biāu.

²⁴ Che sī Siōng Chú só͘ tēng ê ji̍t-chí; lán tio̍h hoaⁿ-hí, tio̍h khèng-chiok!

²⁵ Siōng Chú ah, goán kiû lí, kiû lí kái-kiù goán! Siōng Chú ah, goán kiû lí, kiû lí hō͘ goán heng-ōng!

²⁶ Hōng Siōng Chú ê miâ lâi Hit-ūi eng-kai siū chheng-chàn! Goán tùi Siōng Chú ê tiān chiok-hok lí.

²⁷ Siōng Chú sī Siōng-tè, I hō͘ lán kng-bêng. Tio̍h gia̍h chhiū-ki chham-ka khèng-tián, iû-hêng lâi kàu chè-tôaⁿ ê sì-kak-thâu hia.

²⁸ Lí sī góa ê Siōng-tè, góa beh kám-siā lí; lí sī góa ê Siōng-tè, góa beh soan-iông lí ê úi-tāi.

²⁹ Tio̍h kám-siā Siōng Chú, in-ūi I chì-siān; I ê chû-ài sòa kàu éng-oán.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan