Si-phian 116 - 現代台語譯本羅馬字版

Kám-siā Siōng Chú ê Kái-kiù

¹ Góa thiàⁿ Siōng Chú, in-ūi I thiaⁿ góa ê siaⁿ, thiaⁿ góa ê khún-kiû.

² I àⁿ hī-khang thiaⁿ góa, só͘-í góa chi̍t-sì-lâng beh kiû-kiò I.

³ Sí-bông ê soh khún-pa̍k góa; Im-hú ê thòng-khó͘ khîⁿ-tiâu góa. Góa ū tú-tio̍h hoān-lān iu-khó͘.

⁴ Góa kiû-kiò Siōng Chú ê miâ, kóng, “Siōng Chú ah, kiû lí kiù góa ê sìⁿ-miā.”

⁵ Siōng Chú ū un-hūi, ū kong-gī; goán ê Siōng-tè ū chû-pi.

⁶ Siōng Chú pó-hō͘ tan-sûn ê lâng; góa chhiⁿ-chhám-lo̍k-phek ê sî, I ū kiù góa.

⁷ Góa ê sim-sîn ah, tio̍h hôe-ho̍k an-lêng, in-ūi Siōng Chú it-ti̍t ū teh un-thāi lí.

⁸ Chú ah, lí kiù góa ê sìⁿ-miā thoat-lī sí-bông, hō͘ góa ê ba̍k-chiu bô koh lâu ba̍k-sái, hō͘ góa ê kha bô koh poa̍h-tó.

⁹ Góa beh tī Siōng Chú ê bīn-chêng, kè-sio̍k tī oa̍h-lâng ê tōe seng-oa̍h.

¹⁰ Góa sui-jiân kóng góa siū ke̍k-tōa ê khùn-khó͘, góa iû-goân sìn-khò Siōng Chú.

¹¹ Góa bat tio̍h-kip kóng, “Lâng lóng hu-ké, bōe-khò--tit.”

¹² Siōng Chú sù góa it-chhè ê un-hūi, góa tio̍h án-chóaⁿ pò-tap I?

¹³ Góa beh phâng kiù-un ê poe, kiû-kiò Siōng Chú ê miâ.

¹⁴ Góa beh tī I só͘-ū chú-bîn ê bīn-chêng, tùi Siōng Chú siā góa ê goān.

¹⁵ Siōng Chú khòaⁿ I sèng ê chú-bîn ê sí ke̍k-kî m̄-kam.

¹⁶ Siōng Chú ah, góa si̍t-chāi sī lí ê po̍k-jîn; sī lí ê po̍k-jîn, lí lú-pī ê kiáⁿ; lí í-keng tháu-khui khún-pa̍k góa ê soh.

¹⁷ Góa beh tùi lí hiàn kám-siā ê chè, beh kiû-kiò Siōng Chú ê miâ.

^18-19 Tī I só͘-ū chú-bîn ê bīn-chêng, tī Siōng Chú tiān ê tiâⁿ lāi-bīn, tī Iâ-lō͘-sat-léng, góa beh tùi Siōng Chú siā góa ê goān. Ha-lé-lú-iah, chheng-chàn Siōng Chú!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan