Bìoball air-loidhne

Si-phian 115 - 現代台語譯本羅馬字版

To̍k-it ê Chin Sîn Siōng-tè

¹ Siōng Chú ah, êng-kng chí-ū kui hō͘ lí, chí-ū kui hō͘ lí, in-ūi lí ê chû-ài kap sìn-si̍t, goān êng-kng kui hō͘ lí.

² Lí ná beh hō͘ gōa-pang-lâng kóng, “In ê Siōng-tè tī tó-ūi?”

³ Goán ê Siōng-tè tī thiⁿ-téng, lóng chiàu I ê chí-ì chòe tāi-chì.

⁴ In ê ngó͘-siōng sī lâng ê chhiú ēng gûn, ēng kim chù-chō--ê;

⁵ in ū chhùi, bōe kóng-ōe; ū ba̍k-chiu, mā bōe khòaⁿ--kìⁿ.

⁶ In ū hī-khang, bōe thiaⁿ--kìⁿ; ū phīⁿ-khang, mā bōe phīⁿ--tio̍h.

⁷ In ū chhiú, bōe the̍h; ū kha, bōe kiâⁿ. In mā bô ēng nâ-âu chhut-siaⁿ.

⁸ Chō in--ê, óa-khò in--ê, lóng kap in kâng-khoán.

⁹ Í-sek-lia̍t ah, tio̍h óa-khò Siōng Chú; I sī lí ê pang-chān, lí ê tún-pâi.

¹⁰ A-lûn chè-si ê ke ah, tio̍h óa-khò Siōng Chú; I sī lín ê pang-chān, lín ê tún-pâi.

¹¹ Lín kèng-ùi Siōng Chú ê lâng ah, tio̍h óa-khò Siōng Chú; I sī lín ê pang-chān, lín ê tún-pâi.

¹² Siōng Chú koan-sim lán, beh sù-hok hō͘ lán, beh sù hok-khì hō͘ Í-sek-lia̍t ê ke, beh sù hok-khì hō͘ A-lûn chè-si ê ke.

¹³ Kèng-ùi Siōng Chú ê lâng, bô-lūn tōa-sòe, I beh sù-hok hō͘ in.

¹⁴ Goān Siōng Chú ke-thiⁿ lín ê jîn-sò͘, ke-thiⁿ lín kap lín ê kiáⁿ-sun.

¹⁵ Goān chhòng-chō thiⁿ tōe ê Siōng Chú sù hok-khì hō͘ lín.

¹⁶ Thiⁿ chí-ū sio̍k Siōng Chú; I chiong tōe sù hō͘ sè-kan-lâng.

¹⁷ Sí-lâng bōe chheng-chàn Siōng Chú; lo̍h-khì éng-oán chēng-be̍k ê só͘-chāi ê lâng mā lóng bōe.

¹⁸ Chóng-sī goán beh chheng-chàn Siōng Chú, tùi hiān-chāi ti̍t-kàu éng-oán. Ha-lé-lú-iah, chheng-chàn Siōng Chú!

The Bible Society in Taiwan

Lean sinn:

Ceanglaichean taic

Sanasan