Si-phian 114 - 現代台語譯本羅馬字版

Pôaⁿ-kè-choeh ê Koa

¹ Í-sek-lia̍t-lâng chhut Ai-ki̍p, Ngá-kok ê hō͘-tāi lī-khui ōe-gú bô-siâng ê jîn-bîn;

² hit-sî Iû-tāi chiâⁿ-chòe I ê sèng-só͘, Í-sek-lia̍t chòe I ê kok-tō͘.

³ Tōa-hái khòaⁿ--kìⁿ chiū tô-cháu; Iok-tàn-hô tò-lâu.

⁴ Tōa-soaⁿ chhin-chhiūⁿ iûⁿ-káng tiô-thiàu; sió-soaⁿ mā chhin-chhiūⁿ iûⁿ-á-kiáⁿ thiàu-lâi-thiàu-khì.

⁵ Tōa-hái ah, lí sī-án-chóaⁿ tô-cháu? Iok-tàn-hô ah, lí sī-án-chóaⁿ tò-lâu?

⁶ Tōa-soaⁿ ah, lí sī-án-chóaⁿ chhin-chhiūⁿ iûⁿ-káng tiô-thiàu? Sió-soaⁿ ah, lí sī-án-chóaⁿ chhin-chhiūⁿ iûⁿ-á-kiáⁿ thiàu-lâi-thiàu-khì?

⁷ Tāi-tōe ah, lí kìⁿ-tio̍h Chú ê bīn, kìⁿ-tio̍h Ngá-kok ê Siōng-tè ê bīn, tio̍h phi̍h-phi̍h-chhoah.

⁸ I hō͘ chio̍h-pôaⁿ pìⁿ-chòe chúi-tî, hō͘ chio̍h-giâm pìⁿ-chòe chúi-chôaⁿ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan