Bìoball air-loidhne

Si-phian 112 - 現代台語譯本羅馬字版

Kèng-ùi Siōng-tè ê Lâng Ū Hok-khì

¹ Ha-lé-lú-iah, chheng-chàn Siōng Chú! Kèng-ùi Siōng Chú, chhim-chhim ì-ài I kài-bēng--ê, chit-khoán lâng chin ū hok-khì!

² In ê kiáⁿ-sun tī Í-sek-lia̍t-tōe it-tēng kiông-sēng; chèng-ti̍t ê lâng ê hō͘-tāi it-tēng siū chiok-hok.

³ In ê ke-lāi chhiong-móa châi-hù; in ê hó hêng-ûi chûn kàu éng-oán.

⁴ Chèng-ti̍t ê lâng tī o͘-àm tiong ū kng teh chiò in; in ū un-hūi, ū lîn-bín, ū kong-gī.

⁵ Khóng-khài chioh--lâng koh kong-chèng chhú-lí ka-kī ê tāi-chì--ê, chit-khoán lâng sū-sū sūn-lī.

⁶ Gī-lâng choa̍t-tùi bōe sit-pāi; in éng-oán hō͘ lâng siàu-liām.

⁷ Pháiⁿ siau-sit, in lóng m̄ kiaⁿ, in-ūi sim kian-tēng, óa-khò Siōng Chú.

⁸ In ê sim chū-chāi, lóng bōe kiaⁿ-hiâⁿ, chòe-āu ōe khòaⁿ-tio̍h tùi-te̍k hō͘ Siōng Chú phah-pāi.

⁹ In khóng-khài chín-chè sàn-chhiah-lâng; in ê hó hêng-ûi chûn kàu éng-oán. In ê thâu ōe-tàng gia̍h-koân, siū lâng chun-kèng.

¹⁰ Pháiⁿ-lâng khòaⁿ-liáu tōa siū-khì, kā-gê-chhiat-chhí, ǹg-bāng lóng bô--khì. Pháiⁿ-lâng ê sim-goān lóng lo̍k-khong.

The Bible Society in Taiwan

Lean sinn:

Ceanglaichean taic

Sanasan