Si-phian 109 - 現代台語譯本羅馬字版

Kî-kiû Pò-èng Pháiⁿ-lâng
Tāi-pi̍t ê si, kau hō͘ sèng-ga̍k-tiúⁿ.

¹ Góa só͘ chheng-chàn ê Siōng-tè ah, kiû lí m̄-thang chēng-chēng,

² in-ūi siâ-ok kan-chà ê lâng khui-chhùi kong-kek góa; in ēng pe̍h-chha̍t ê chi̍h tùi góa kóng-ōe.

³ In ēng oàn-hūn ê ōe pau-ûi góa, bô-iân-bô-kò͘ kong-kek góa.

⁴ Góa thiàⁿ in, in hoán-tńg chòe góa ê tùi-te̍k; góa iáu-kú ūi in kî-tó.

⁵ In tùi góa ēng pháiⁿ pò hó, ēng oàn-hūn pò jîn-ài.

⁶ Kiû lí phài chi̍t ê pháiⁿ-lâng koán-hat i, phài chi̍t ê tùi-te̍k khiā tī i chiàⁿ-pêng khòng-kò i.

⁷ Kiû lí hō͘ i tī sím-phòaⁿ ê sî siū tēng-chōe, hō͘ i ê kî-tó mā sǹg-chòe chōe.

⁸ Kiû lí hō͘ i ê sìⁿ-miā kín kiat-sok, hō͘ pa̍t-lâng tāi-thòe i ê chit-ūi.

⁹ Kiû lí hō͘ i ê kiáⁿ-jî pìⁿ-chòe ko͘-jî, hō͘ i ê bó͘ pìⁿ-chòe kóaⁿ-hū.

¹⁰ Kiû lí hō͘ i ê kiáⁿ-jî sì-kòe kiû-khit, tùi in ê phòa-chhù hō͘ lâng kóaⁿ--chhut-khì.

¹¹ Kiû lí hō͘ chè-chú chhiúⁿ i it-chhè só͘-ū, hō͘ siⁿ-hūn-lâng chhiúⁿ-toa̍t i lô-khó͘ tit--tio̍h ê châi-bu̍t.

¹² Kiû lí hō͘ i bô tit-tio̍h hó khoán-thāi, bô lâng khó-lîn i ê ko͘-jî.

¹³ Kiû lí hō͘ i ê hō͘-tāi toān-choa̍t, in ê miâ-jī siū chhat-siau, bô thoân kàu ē chi̍t tāi.

¹⁴ Kiû Siōng Chú ōe-kì-tit i chó͘-sian ê chōe-ok, hō͘ i lāu-bú ê chōe-kò bô tit-tio̍h chhat-siau.

¹⁵ Kiû Siōng Chú hō͘ in ê chōe-ok put-sî tī lí bīn-chêng, hō͘ in ê miâ tùi sè-kan siau-bia̍t.

¹⁶ In-ūi i bô siūⁿ-beh si lîn-bín, hoán-tńg ap-pek sàn-chhiah khùn-khó͘ ê lâng, hāi-sí siong-sim ê lâng.

¹⁷ I ài chiù-chó͘, goān chiù-chó͘ lîm-kàu i; I bô ài chiok-hok, goān chiok-hok lī-khui i hn̄g-hn̄g.

¹⁸ I ēng chiù-chó͘ chòe saⁿ chhēng, chiù-chó͘ chiū chhin-chhiūⁿ chúi ji̍p i ê pak-lāi, chhin-chhiūⁿ iû ji̍p i ê kut.

¹⁹ Goān chit-ê chiù-chó͘ chòe i-ho̍k chhēng tī i seng-khu, chòe io-tòa put-sî kā i hâ-tiâu-tiâu.

²⁰ Che chiū-sī i tùi Siōng Chú só͘ siū ê pò-èng; i sī góa ê tùi-te̍k, ēng pháiⁿ-ōe kong-kek góa ê sìⁿ-miā.

²¹ Chì-koân ê Siōng Chú ah, kiû lí in-ūi lí ê miâ ê iân-kò͘ hó khoán-thāi góa, chiàu lí chì-siān ê chû-ài khan-kiù góa.

²² In-ūi góa sàn-chhiah khùn-khó͘, góa ê lāi-sim siū-siong.

²³ Góa ê hè-siū chhin-chhiūⁿ ji̍t-iáⁿ chiām-chiām chhiâ; góa chhin-chhiūⁿ chháu-meh hō͘ lâng pōaⁿ-tiāu.

²⁴ Góa in-ūi kìm-chia̍h kha-thâu-u sng-nńg; góa siau-sán-lo̍h-bah.

²⁵ Góa siū in húi-pòng; in khòaⁿ-tio̍h góa chiū hàiⁿ-thâu.

²⁶ Siōng Chú — góa ê Siōng-tè ah, kiû lí pang-chān góa, chiàu lí ê chû-ài chín-kiù góa,

²⁷ hō͘ in chai che sī lí chhin-chhiú só͘ chòe, sī Siōng Chú lí só͘ chòe--ê.

²⁸ In sui-jiân chiù-chó͘ góa, lí ōe sù-hok hō͘ góa; in khí-lâi kong-kek góa ê sî ōe tú-tio̍h kiàn-siàu, m̄-kú lí ê po̍k-jîn ōe hoaⁿ-hí.

²⁹ Kiû lí hō͘ góa ê tùi-te̍k ēng lêng-jio̍k chòe saⁿ chhēng, ēng kiàn-siàu chòe phàu moa.

³⁰ Góa beh ēng góa ê chhùi tōa-tōa kám-siā Siōng Chú; góa beh tī chèng-lâng ê tiong-kan chheng-chàn I.

³¹ I beh khiā tī sàn-chhiah-lâng ê chiàⁿ-pêng, kiù i thoat-lī phòaⁿ i sí-chōe ê lâng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan