Bìoball air-loidhne

Si-phian 106 - 現代台語譯本羅馬字版

Siōng Chú Un-thāi I ê Chú-bîn

¹ Ha-lé-lú-iah, chheng-chàn Siōng Chú! Tio̍h kám-siā Siōng Chú, in-ūi I chì-siān; I ê chû-ài sòa kàu éng-oán!

² Siáⁿ-lâng ōe-hiáu kóng-khí Siōng Chú ê tōa koân-lêng? Siáⁿ-lâng ōe-tàng oân-choân piáu-bêng tùi I ê chheng-chàn?

³ Só͘-ū ûi-hō͘ kong-pêng, put-sî si̍t-chián kong-gī ê lâng chin ū hok-khì!

⁴ Siōng Chú ah, lí un-thāi lí chú-bîn ê sî, kiû lí ōe-kì-tit góa; lí chín-kiù in ê sî, kiû lí koàn-kò͘ góa.

⁵ Kiû lí hō͘ góa khòaⁿ-kìⁿ lí ê soán-bîn heng-ōng, hō͘ góa kap lí ê kok-bîn hun-hióng khoài-lo̍k, kap lí ê chú-bîn chòe-hé khoa-iāu.

⁶ Goán kap goán ê chó͘-sian kâng-khoán ū hoān-chōe; goán phian-lī chiàⁿ-lō͘ chòe pháiⁿ.

⁷ Goán ê chó͘-sian tī Ai-ki̍p bô bêng-pe̍k lí só͘ chòe ê kî-sū, bōe-kì-tit lí hong-sēng ê chû-ài, hoán-tńg tī Âng-hái pōe-poān lí.

⁸ M̄-kú Chú, in-ūi I ê miâ ê iân-kò͘, kái-kiù in, beh hián-bêng I ê tōa koân-lêng.

⁹ I chi̍t-ē hoah Âng-hái, hái chiū ta--khì; I chhōa in keng-kè hái chhim ê só͘-chāi, ná teh keng-kè ta-tōe.

¹⁰ I kiù in thoat-lī oàn-hūn in ê lâng ê chhiú, tùi tùi-te̍k ê chhiú-tiong kái-kiù in.

¹¹ In ê tùi-te̍k lóng hō͘ chúi im-ba̍t, liân chi̍t ê to bô lâu--teh.

¹² Hit-chūn, in chiah sìn I ê ōe, chiah chhiùⁿ-koa chheng-chàn I.

¹³ In chin kín chiū bōe-kì-tit I ê só͘-chòe, bô thèng-hāu I ê chí-sī.

¹⁴ In tī khòng-iá tōa-tōa khí tham-io̍k, tī hong-po͘ chhì-thàm Siōng-tè.

¹⁵ In só͘ kiû--ê, I ū hō͘ in, m̄-kú mā hō͘ in lóng soe-lám siau-sán.

¹⁶ In tī iâⁿ-tiong oàn-tò͘ Mô͘-se kap Siōng Chú sèng-pia̍t ê A-lûn.

¹⁷ Tōe chiū li̍h--khui, thun-bia̍t Tāi-tan, am-ba̍t A-pí-lân hit-kûn lâng.

¹⁸ Ū hé tī in tiong-kan to̍h--khí-lâi, hé-iām sio-bia̍t hiah-ê pháiⁿ-lâng.

¹⁹ In tī Hô-lia̍t-soaⁿ chō gû-á, phak-pài só͘ chù ê siōng.

²⁰ Án-ni, in ēng chia̍h-chháu ê gû-á chòe siōng, thòe-ōaⁿ Siōng-tè ê êng-kng.

²¹ In bōe-kì-tit kā in chín-kiù ê Siōng-tè; I bat tī Ai-ki̍p chòe tōa tāi-chì,

²² tī Hâm ê tōe kiâⁿ kî-sū, tī Âng-hái chòe thang-kiaⁿ ê sū.

²³ Só͘-í, I kóng beh kā in siau-bia̍t; nā m̄-sī I só͘ kéng-soán ê Mô͘-se khiā tī I bīn-chêng ke̍k-le̍k sin-sò͘, siau-tû I ê siū-khì, I í-keng kā in siau-bia̍t lah.

²⁴ In khòaⁿ-khin hit-ê hó ê tōe, m̄ sìn I ê ōe;

²⁵ in tī ka-kī ê pò͘-pîⁿ lāi bâi-oàn, m̄ thiaⁿ-thàn Siōng Chú ê ōe.

²⁶ Só͘-í I tùi in gia̍h-chhiú li̍p-sè, beh hō͘ in sí tī khòng-iá;

²⁷ hō͘ in ê kiáⁿ-sun sí tī gōa-kok, sì-sòaⁿ tī ta̍k só͘-chāi.

²⁸ In tàu-tīn khì pài Pí-ní ê Pa-le̍k, chia̍h hiàn hō͘ bô sìⁿ-miā ê sîn-bêng ê chè-mi̍h.

²⁹ In án-ni chòe, jiá-khí I ê siū-khì, chiū ū un-e̍k tī in tiong-kan thoân-jiám.

³⁰ Hit-sî Hui-nî-hap khí-lâi thòe in pâi-kái, un-e̍k chiū soah.

³¹ Chit-ê tāi-chì Siōng-tè kā i sǹg-chòe gī, tùi hit-sî khí, ti̍t-kàu éng-oán.

³² In tī Bí-lī-pa ê chúi-chôaⁿ piⁿ koh jiá Siōng Chú siū-khì, ūi-tio̍h in ê iân-kò͘, Mô͘-se siū liân-lūi;

³³ in-ūi in pōe-poān Siōng-tè, tì-kàu Mô͘-se kóng-chhut chhong-pōng ê ōe.

³⁴ In bô thiaⁿ-thàn Siōng Chú ê hoan-hù, bô châu-bia̍t gōa-cho̍k ê peh-sìⁿ;

³⁵ hoán-tńg kap gōa-pang-lâng thong-hun, o̍h in ê só͘-chòe,

³⁶ ho̍k-sāi in ê ngó͘-siōng; kiat-kó ka-kī poa̍h-lo̍h hām-chíⁿ.

³⁷ In chiong kiáⁿ, cha-bó͘-kiáⁿ chòe chè-mi̍h hiàn hō͘ kúi-sîn;

³⁸ in lâu bô chōe ê lâng ê huih, thâi ka-kī ê kiáⁿ, cha-bó͘-kiáⁿ, chiong in chòe chè-mi̍h hiàn hō͘ Ka-lâm ê ngó͘-siōng, hit-ê tōe chiū siū-tio̍h huih ù-jiám.

³⁹ Án-ni, in siū ka-kī ê hêng-ûi ù-jiám, in ê só͘-chòe hoān-tio̍h îm-hēng.

⁴⁰ Só͘-í, Siōng Chú tùi I ê chú-bîn hoat siū-khì, iàm-ò͘ⁿ I ê sán-gia̍p Í-sek-lia̍t.

⁴¹ I chiong in kau tī gōa-pang-lâng ê chhiú, hō͘ oàn-hūn in ê lâng koán-hat in.

⁴² In ê tùi-te̍k ap-chè in, in chiū khut-ho̍k tī tùi-te̍k ê chhiú-ē.

⁴³ Siōng Chú chi̍t-piàn koh chi̍t-piàn kái-kiù in; m̄-kú in kò͘-ì pōe-ge̍k I, in-ūi ka-kī ê chōe-ok tì-kàu tūi-lo̍h.

⁴⁴ I thiaⁿ-tio̍h in ê ai-kiò, thé-thiap in ê khùn-khó͘.

⁴⁵ I ūi-tio̍h in siūⁿ-khí I ê iok, in-ūi hong-sēng ê chû-ài hôe-sim-tńg-ì,

⁴⁶ hō͘ in tit-tio̍h só͘-ū lia̍h in ê lâng ê lîn-bín.

⁴⁷ Siōng Chú — goán ê Siōng-tè ah, kiû lí chín-kiù goán, chū-chi̍p goán, chhōa goán tùi lia̍t-kok tńg--lâi, hō͘ goán thang kám-siā lí ê sèng-miâ, ēng chheng-chàn lí chòe goán siōng-tōa ê hoaⁿ-hí.

⁴⁸ Goān chheng-chàn kui hō͘ Siōng Chú — Í-sek-lia̍t ê Siōng-tè, tùi éng-oán kàu éng-oán. Goān choân-thé jîn-bîn lóng kóng: Amen! Ha-lé-lú-iah, chheng-chàn Siōng Chú!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan