Bìoball air-loidhne

« Roimhe

Air adhart »

Si-phian 105 - 現代台語譯本羅馬字版

Siōng-tè Ín-chhōa I ê Chú-bîn
( 1 Tāi 16.8-22 )

¹ Lín tio̍h kám-siā Siōng Chú, kiû-kiò I ê miâ, tī bān-bîn tiong pò-iông I ê chok-ûi.

² Tio̍h tùi I gîm-si, ǹg I chhiùⁿ-koa o-ló, tâm-lūn I it-chhè kî-biāu ê só͘-chòe.

³ Tio̍h khoa-iāu I ê sèng-miâ. Goān chhē-kiû Siōng Chú ê lâng sim-lāi hoaⁿ-hí.

⁴ Tio̍h óa-khò Siōng Chú kap I ê koân-lêng, put-sî chhē-kiû kìⁿ I ê bīn.

^5-6 I ê po̍k-jîn A-pek-la-hán ê hō͘-tāi, I só͘ kéng Ngá-kok ê kiáⁿ-sun ah, lín tio̍h siàu-liām I kî-biāu ê chok-ûi, siàu-liām I ê sîn-jiah kap I só͘ kóng phòaⁿ-toàn ê ōe.

⁷ I sī Siōng Chú — lán ê Siōng-tè; I ê sím-phòaⁿ phó͘-ki̍p choân-tōe.

⁸ I ōe-kì-tit I ê iok ti̍t-kàu éng-oán, I ê èng-ún ti̍t-kàu bān-tāi.

⁹ I ōe-kì-tit kap A-pek-la-hán li̍p ê iok, tùi Í-sat só͘ li̍p ê sè.

¹⁰ I chiong chit-ê iok hō͘ Ngá-kok chòe kui-lē, hō͘ Í-sek-lia̍t chòe éng-oán ê iok.

¹¹ I kóng, “Góa beh chiong Ka-lâm-tōe sù hō͘ lí, chòe lí èng-tit ê sán-gia̍p.”

¹² Tng-sî in ê jîn-kháu iú-hān, jîn-sò͘ chin chió; in tī hia chòe chhut-gōa-lâng.

¹³ In tùi chit-cho̍k kiâⁿ kàu hit-cho̍k, tùi chit-kok kàu hit-kok.

¹⁴ I bô iông-ún lâng ap-pek in; ūi-tio̍h in ê iân-kò͘, I khiàn-chek hiah-ê kun-ông.

¹⁵ I kóng, “M̄-thang kha̍p-tio̍h góa kéng-soán ê po̍k-jîn, mā m̄-thang khi-hū góa ê sian-ti.”

¹⁶ I hō͘ ki-hng kàng-lo̍h tī hit-ê thó͘-tōe, hō͘ só͘ óa-khò ê bí-niû lóng toān-choa̍t.

¹⁷ I chhe chi̍t ê lâng seng khì, chiū-sī siū bōe chòe lô͘-lē ê Iok-sek.

¹⁸ Lâng ēng kha-khàu khàu i ê kha, ēng thih-liān liān i ê ām-kún.

¹⁹ Siōng Chú ê ōe kā i khó-giām, ti̍t-kàu I ê ū-giân si̍t-hiān.

²⁰ Ông chhe lâng kā i tháu-khui; thóng-tī bān-bîn ê Hoat-ló kā i tháu-pàng.

²¹ Ông siat-li̍p i chòe cháiⁿ-siòng, chiáng-koán Hoat-ló lóng-chóng ê châi-bu̍t,

²² thang sûi-ì pa̍k i ê jîn-sîn, ēng tì-hūi koán-kàu i ê tiúⁿ-ló.

²³ Í-sek-lia̍t mā lâi kàu Ai-ki̍p; Ngá-kok chhut-gōa tī Hâm ê tōe.

²⁴ Siōng Chú hō͘ I ê chú-bîn siⁿ-thòaⁿ chin chōe, hō͘ in pí tùi-te̍k khah kiông.

²⁵ I kái-piàn tùi-te̍k ê sim, hō͘ in oàn-hūn I ê chú-bîn, ēng khúi-khiat ê kè-bô͘ tùi-thāi I ê po̍k-jîn.

²⁶ I chhe I ê po̍k-jîn Mô͘-se, kap I só͘ kéng ê A-lûn,

²⁷ tī tùi-te̍k ê tiong-kan kiâⁿ I ê sîn-jiah, tī Hâm ê tōe kiâⁿ kî-sū.

²⁸ I kàng-lo̍h o͘-àm, tōe chiū àm-bong-bong; Ai-ki̍p-lâng iáu-kú m̄ thiaⁿ-thàn I ê ōe.

²⁹ I hō͘ in ê chúi pìⁿ-chòe huih, chúi-lāi ê hî lóng sí.

³⁰ Tī in ê thó͘-tōe chhân-kap-á móa-móa-sī, liân ông ê pâng-keng to ū.

³¹ I chi̍t-ē chhut-siaⁿ, hô͘-sîn kui-tīn pe--lâi, koh tī in ê kéng-lāi ū sat-bú móa-sì-kòe.

³² I lo̍h-pha̍uh tāi-thòe hō͘, kàng-lo̍h sih-nà tī in choân-tōe.

³³ I sàu-tó in ê phû-tô-chhiū kap bû-hoa-kó-chhiū, húi-hoāi in kéng-lāi ê chhiū-ba̍k.

³⁴ I chi̍t-ē chhut-siaⁿ, kui-kûn ê chháu-meh kap chháu-meh-á-kiáⁿ chiū pe--lâi, chōe kah bōe-sǹg--tit,

³⁵ kā in thó͘-tōe ê chhài-soe chia̍h-liáu-liáu, koh thun-chia̍h in ê chhân-hn̂g só͘ chhut ê ngó͘-kok.

³⁶ I phah-sí in kok-lāi só͘-ū ê tōa-kiáⁿ, chiū-sī in ióng-chòng ê sî só͘ siⁿ--ê.

³⁷ I chhōa in chhut--lâi, tòa gûn tòa kim; I ê chi-cho̍k tiong bô chi̍t ê loán-jio̍k.

³⁸ In chhut--lâi ê sî, Ai-ki̍p-lâng tōa hoaⁿ-hí, in-ūi Ai-ki̍p-lâng chin kiaⁿ in.

³⁹ I ēng hûn kā in jia, mî--sî ēng hé kā in chiò.

⁴⁰ In chi̍t-ē kiû, I chiū hō͘ ian-chhun pe--lâi, koh ēng thiⁿ ê chia̍h-mi̍h hō͘ in pá-chiok.

⁴¹ I phah-khui chio̍h-pôaⁿ, chúi chiū chhèng--chhut-lâi, chiâⁿ-chòe hô-liû lâu-kè khòng-iá.

⁴² In-ūi I ōe-kì-tit I sèng ê èng-ún, ōe-kì-tit I ê po̍k-jîn A-pek-la-hán.

⁴³ I chhōa I ê chú-bîn hoaⁿ-hoaⁿ-hí-hí chhut--lâi, chhōa I kéng-soán ê chú-bîn chhiùⁿ hoaⁿ-hí ê koa hiòng-chêng kiâⁿ.

⁴⁴ I chiong lia̍t-kok ê thó͘-tōe sù hō͘ in, hō͘ in sêng-chiap pa̍t-ê bîn-cho̍k lô-khó͘ tit--tio̍h ê châi-hù,

⁴⁵ thang hō͘ in chun-thàn I ê kui-lē, chun-siú I ê lu̍t-hoat. Ha-lé-lú-iah, chheng-chàn Siōng Chú!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan