Bìoball air-loidhne

Si-phian 104 - 現代台語譯本羅馬字版

Siōng-chàn Chhòng-chō-chú

¹ Góa ê sim-sîn ah, tio̍h chheng-chàn Siōng Chú. Siōng Chú — góa ê Siōng-tè ah, lí chì-tōa! Lí ēng chun-êng ui-giâm chòe saⁿ chhēng;

² lí ēng kng chòe gōa-phàu moa. Lí thí-khui thiⁿ chhin-chhiūⁿ teh tah pò͘-pîⁿ;

³ lí tī chúi-téng an-tì kiong-tiān ê niû. Lí ēng hûn chòe chhia chē, ēng hong chòe si̍t pe.

⁴ Lí ēng hong chòe sù-chiá, ēng hé-iām chòe chhe-ēng.

⁵ Lí chiong tōe hē tī tōe-ki téng, hō͘ tōe éng-oán bōe iô-choah.

⁶ Lí hō͘ chhim-chúi ná gōa-saⁿ jia-khàm tōe-bīn, hō͘ chúi im-kè soaⁿ-niá.

⁷ Lí chi̍t-ē hoah, chúi chiū kóaⁿ-kín cháu; lí ê lûi chi̍t-ē tân, chúi chiū kín-kín lâu,

⁸ chhèng kàu soaⁿ-thâu, lo̍h kàu soaⁿ-kok, lâu kàu lí kā in tēng ê só͘-chāi.

⁹ Lí tēng kài-hān hō͘ chúi bōe pôaⁿ--kè, bōe koh tńg-lâi im tōe-bīn.

¹⁰ Lí hō͘ chúi-chôaⁿ tùi soaⁿ-lāi chhèng-chhut, lâu lo̍h soaⁿ-kok,

¹¹ hō͘ soaⁿ-lāi ê cháu-siù ū chúi thang lim, hō͘ iá-lû chí chhùi-ta.

¹² Lí hō͘ khong-tiong ê pe-chiáu hioh tī chúi-piⁿ, tī chhiū-ki téng chhiùⁿ-koa.

¹³ Lí tùi thiⁿ-téng ê kiong-tiān ēng chúi koàn-ak soaⁿ-niá, tùi lí só͘ chòe ê hāu-kó, tōe tit-tio̍h hù-chiok.

¹⁴ Lí hō͘ chháu seng-tióng, thang hō͘ cheng-siⁿ chia̍h, hō͘ chhài-soe tōa-châng, chòe lâng ê lō͘-ēng, thang hō͘ lâng tùi tōe tit-tio̍h chia̍h-mi̍h;

¹⁵ koh ū chiú hō͘ lâng ê sim hoaⁿ-hí; ū iû hō͘ lâng ê bīn kong-chhái; ū chia̍h-mi̍h hō͘ lâng ióng-chòng ū-la̍t.

¹⁶ Siōng Chú só͘ chai-chèng Lê-pa-lūn ê pek-hiuⁿ-chhiū, lóng tit-tio̍h chhiong-chiok ê lūn-te̍k;

¹⁷ ū pe-chiáu choh-siū tī hia ê chhiū lāi-bīn; ū ho̍h tī siông-chhiū ê chhiū-ki choh-siū.

¹⁸ Ū koân-soaⁿ hō͘ iá-soaⁿ-iûⁿ tòa; ū chio̍h-phāng chòe chio̍h-hoan bih ê só͘-chāi.

¹⁹ I ēng ge̍h tēng kùi-choeh, hō͘ ji̍t-thâu chai thang lo̍h-soaⁿ.

²⁰ Lí hō͘ ji̍t àm chòe mî--sî; hit-sî chhiū-nâ lāi ê pah-siù chiū lóng pê--chhut-lâi.

²¹ Sai-á-thûn háu beh chhē mi̍h chia̍h, tùi Siōng-tè thó chia̍h-mi̍h.

²² Ji̍t-thâu chi̍t-ē chhut, in chiū cháu-khì bih, tī in ê tōng-lāi hioh-khùn.

²³ Lâng chhut-khì chòe kang, lô-tōng kàu ē-hng-sî.

²⁴ Siōng Chú ah, lí só͘ chō--ê ná hiah-ni̍h chōe, lóng sī lí ēng tì-hūi só͘ chō; choân-tōe móa-móa lóng sī lí ê chhòng-chō.

²⁵ Tī hia ū hái, tōa koh khoah, lāi-bīn ū sǹg bōe liáu ê tōng-bu̍t; tōa-sòe ê oa̍h-mi̍h lóng ū.

²⁶ Tī hia ū chûn teh kiâⁿ, ū lí só͘ chhòng-chō ê hái-siù siû-lâi-siû-khì.

²⁷ Chiah-ê lóng teh khò lí, lí chiàu-sî hō͘ in chia̍h-mi̍h.

²⁸ Lí hiat hō͘ in, in chiū khioh--khí-lâi; lí thí-khui chhiú, in chiū ū hó-mi̍h chia̍h kàu pá.

²⁹ Lí bīn oa̍t-cháu m̄ khòaⁿ in, in chiū hoân-ló kiaⁿ-hiâⁿ; lí chiong in ê khùi siu-hôe, in chiū sí--khì kui-hôe thô͘-hún.

³⁰ Lí chi̍t-ē pûn-khùi, in chiū siū chhòng-chō; lí hō͘ tōe-bīn lóng ōaⁿ-sin.

³¹ Goān Siōng Chú ê êng-kng éng-oán chûn-sio̍k; goān Siōng Chú in-ūi ka-kī ê chhòng-chō hoaⁿ-hí.

³² I khòaⁿ tōe, tōe chiū tín-tāng; I bong soaⁿ, soaⁿ chiū chhèng-ian.

³³ Góa beh chi̍t-sì-lâng tùi Siōng Chú gîm-si; góa iáu oa̍h--teh ê sî beh tùi góa ê Siōng-tè chhiùⁿ-koa o-ló.

³⁴ Goān I hoaⁿ-hí chiap-la̍p góa ê be̍k-sióng. Góa beh in-ūi Siōng Chú hoaⁿ-hí khoài-lo̍k.

³⁵ Goān chōe-jîn tùi sè-chiūⁿ siau-bia̍t; goān pháiⁿ-lâng lóng bô--khì. Góa ê sim-sîn ah, tio̍h chheng-chàn Siōng Chú. Ha-lé-lú-iah, chheng-chàn Siōng Chú!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan