Bìoball air-loidhne

Sin-bēng-kì 9 - 現代台語譯本羅馬字版

Í-sek-lia̍t-lâng Pōe-ge̍k Siōng Chú

¹ Í-sek-lia̍t ah, tio̍h chù-ì thiaⁿ! Lín kin-á-ji̍t beh kè Iok-tàn-hô, khì cheng-ho̍k hiah-ê pí lín khah kiông-tāi ê kok; in ê siâⁿ tōa koh kian-kò͘, koân kàu tú-thiⁿ.

² In ê jîn-bîn ko-chhiâng-tōa-hàn, sī lín só͘ chai ê A-la̍p-lâng; lín bat thiaⁿ lâng kóng, “Siáⁿ-lâng ōe-tàng tùi-khòng A-la̍p-lâng?”

³ Kin-á-ji̍t lín tio̍h chai, Siōng Chú — lín ê Siōng-tè ōe tī lín ê thâu-chêng kè--khì, chhin-chhiūⁿ thun-bia̍t ê hé, beh kā in siau-bia̍t, hō͘ in khut-ho̍k tī lín ê bīn-chêng; lín tio̍h chiàu Siōng Chú ê bēng-lēng kā in kóaⁿ--chhut-khì, kín-kín kā in siau-bia̍t.

⁴ Siōng Chú — lín ê Siōng-tè ūi-tio̍h lín chiong in kóaⁿ--chhut-khì liáu-āu, lín sim-lāi m̄-thang siūⁿ-kóng, “Siōng Chú chhōa goán cheng-ho̍k chit-tè tōe, sī in-ūi goán ê kong-tek.” Kî-si̍t, Siōng Chú sī in-ūi hiah-ê kok siâ-ok, chiah kā in kóaⁿ-cháu.

⁵ Lín ji̍p-khì chiàm-léng in ê tōe, pèng m̄-sī in-ūi lín ū sím-mi̍h kong-tek, mā m̄-sī in-ūi lín ê sim chèng-ti̍t, sī in-ūi chiah-ê kok siâ-ok, Siōng Chú — lín ê Siōng-tè chiah kā in kóaⁿ-cháu; koh in-ūi Siōng Chú beh si̍t-hiān I tùi lín ê lia̍t-chó͘ A-pek-la-hán, Í-sat, Ngá-kok, li̍p-sè ê èng-ún.

⁶ Lín tio̍h chai, Siōng Chú — lín ê Siōng-tè ēng súi ê tōe siúⁿ-sù lín chòe sán-gia̍p, m̄-sī in-ūi lín ê kong-tek, kî-si̍t lín sī sim-ngī kò͘-chip ê bîn-cho̍k.

⁷ Lín tio̍h kì hō͘ tiâu, m̄-thang bōe-kì--tit, lín tī khòng-iá jiá Siōng Chú — lín ê Siōng-tè siū-khì; tùi lín chhut Ai-ki̍p-tōe hit-ji̍t, kàu lín lâi kàu chit-ê só͘-chāi, lín siông-siông pōe-ge̍k Siōng Chú.

⁸ Lín tī Hô-lia̍t-soaⁿ koh jiá Siōng Chú siū-khì, tì-kàu Siōng Chú hoat siū-khì beh kā lín siau-bia̍t.

⁹ Hit-sî góa í-keng chiūⁿ-soaⁿ, beh niá-siū Siōng Chú kap lín li̍p-iok ê chio̍h-pán; góa tī soaⁿ--ni̍h sì-cha̍p mî-ji̍t, bô chia̍h bô lim.

¹⁰ Siōng Chú chiong I chhin-chhiú siá ê nn̄g tè chio̍h-pán kau hō͘ góa; hit téng-bīn siá--ê, sī Siōng Chú tī lín kú-hêng tāi-hōe ê ji̍t, tī soaⁿ-téng ê hé-iām tiong tùi lín só͘ kóng it-chhè ê ōe.

¹¹ Sì-cha̍p mî-ji̍t liáu-āu, Siōng Chú ēng hit nn̄g tè ū siá bêng-iok ê chio̍h-pán kau-tài góa.

¹² Siōng Chú tùi góa kóng, “Khí--lâi, kóaⁿ-kín tùi chia lo̍h--khì, lí tùi Ai-ki̍p chhōa--chhut-lâi ê jîn-bîn í-keng tūi-lo̍h; in chin-kín phian-lī góa bēng-lēng in ê tō-lō͘, ūi ka-kī chù chi̍t sian ngó͘-siōng.”

¹³ Siōng Chú koh kā góa kóng, “Góa khòaⁿ chit-ê bîn-cho̍k chin-chiàⁿ sī sim-ngī kò͘-chip ê bîn-cho̍k.

¹⁴ Lí chhut-chāi góa, góa beh kā in siau-bia̍t, tùi thiⁿ-ē chhat-siau in ê miâ; góa beh hō͘ lí chiâⁿ-chòe pí in khah kiông, lâng khah chōe ê kok-ka.”

¹⁵ Góa siang-chhiú the̍h nn̄g tè iok-pán, oa̍t-tńg-sin lo̍h-soaⁿ; soaⁿ ū hé teh sio.

¹⁶ Góa chi̍t-ē khòaⁿ, khòaⁿ-tio̍h lín í-keng tek-chōe Siōng Chú — lín ê Siōng-tè, ūi ka-kī chù chi̍t chiah gû-á, chin kín phian-lī Siōng Chú só͘ bēng-lēng lín ê tō-lō͘.

¹⁷ Góa chiū chiong hit nn̄g tè chio̍h-pán hiat--lo̍h-khì, tī lín ê ba̍k-chiu chêng siak kah chhùi-chhùi.

¹⁸ In-ūi lín só͘ hoān it-chhè ê chōe, chòe Siōng Chú khòaⁿ-chòe pháiⁿ ê sū, jiá I siū-khì, góa koh chi̍t piàn phak tī Siōng Chú ê bīn-chêng sì-cha̍p mî-ji̍t, bô chia̍h bô lim.

¹⁹ Hit-sî Siōng Chú tōa-tōa siū-khì, beh kā lín siau-bia̍t, góa chiū hui-siông kiaⁿ-hiâⁿ; m̄-kú Siōng Chú koh chi̍t piàn thiaⁿ góa ê khún-kiû.

²⁰ Siōng Chú mā tùi A-lûn hui-siông siū-khì, sīm-chì beh hō͘ i sí; siâng hit-sî góa chiū ūi-tio̍h A-lûn kî-tó.

²¹ Góa the̍h lín hoān-chōe ê mi̍h, chiū-sī lín chù ê gû-á-siōng, ēng hé sio, kā i kòng-chhùi, géng kah chhin-chhiūⁿ thô͘-hún hiah-ni̍h iù, koh kā chiah-ê iā tī tùi soaⁿ-téng lâu--lo̍h-lâi ê khoe--ni̍h.

²² Lín tī Tha-pī-la, Má-sat, Ki-phok-lô Hap-tha-óa, koh kek Siōng Chú siū-khì.

²³ Siōng Chú bēng-lēng lín lī-khui Ka-te-su Pa-nî-a, kóng, “Lín khì chiàm-léng góa siúⁿ-sù lín ê tōe.” Hit-sî lín ûi-pōe Siōng Chú — lín ê Siōng-tè ê bēng-lēng, m̄ siong-sìn I, m̄ thiaⁿ-thàn I ê ōe.

²⁴ Tùi góa bat lín ê ji̍t khí, lín siông-siông pōe-ge̍k Siōng Chú.

²⁵ Góa in-ūi Siōng Chú kóng beh siau-bia̍t lín, chiū sì-cha̍p mî-ji̍t phak tī Siōng Chú ê bīn-chêng.

²⁶ Góa tùi Siōng Chú kî-tó kóng, “Chì-koân ê Siōng Chú, kiû lí m̄-thang siau-bia̍t lí ê chú-bîn, lí ê sán-gia̍p; in sī lí ēng tōa koân-lêng kā in kiù-sio̍k, ēng tōa khùi-la̍t ê chhiú kā in tùi Ai-ki̍p chhōa--chhut-lâi ê chú-bîn.

²⁷ Kiû lí ōe-kì-tit lí ê po̍k-jîn A-pek-la-hán, Í-sat, Ngá-kok; m̄-thang khòaⁿ chit-ê chú-bîn ê ngī-sim, siâ-ok, kap in ê chōe-kò,

²⁸ chiah bián Ai-ki̍p-lâng kóng, ‘Siōng Chú bô hoat-tō͘ chhōa in ji̍p-khì I èng-ún in ê tōe, koh in-ūi oàn-hūn in, só͘-í chhōa in chhut--khì, beh tī khòng-iá kā in siau-bia̍t.’

²⁹ M̄-kú in sī lí ê chú-bîn, lí ê sán-gia̍p; lí ū ēng tōa koân-lêng, koh chhun-chhut tōa khùi-la̍t ê chhiú kā in chhōa--chhut-lâi.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan