Bìoball air-loidhne

Sin-bēng-kì 5 - 現代台語譯本羅馬字版

Cha̍p-tiâu-kài
( Chhut 20.1-17 )

¹ Mô͘-se tiàu-chi̍p Í-sek-lia̍t-lâng, tùi in kóng: Í-sek-lia̍t ah, tio̍h chù-ì thiaⁿ góa kin-á-ji̍t kā lín hoan-hù ê kui-lē kap bēng-lēng, lín tio̍h ha̍k-si̍p, chhiat-si̍t chun-hêng.

² Siōng Chú — lán ê Siōng-tè tī Hô-lia̍t-soaⁿ kap lán li̍p-iok.

³ Chit-ê iok, Siōng Chú m̄-sī kap lán ê lia̍t-chó͘ li̍p--ê, sī kap kin-á-ji̍t lán só͘-ū iáu oa̍h--teh, khiā tī chia ê lâng li̍p--ê.

⁴ Siōng Chú tī soaⁿ-téng, tùi hé-tiong bīn-tùi-bīn kap lín kóng-ōe.

⁵ Hit-sî góa khiā tī Siōng Chú kap lín ê tiong-kan, beh chiong Siōng Chú ê ōe thoân hō͘ lín, in-ūi lín kiaⁿ hit-ê hé, m̄-káⁿ chiūⁿ-soaⁿ. Siōng Chú kóng,

⁶ “Góa sī Siōng Chú — lí ê Siōng-tè, ū chiong lí tùi Ai-ki̍p-tōe, chòe lô͘-châi ê ke chhōa--chhut-lâi.

⁷ “Góa í-gōa lí m̄-thang ū pa̍t-ê Siōng-tè.

⁸ “M̄-thang ūi ka-kī tiau-khek ngó͘-siōng, bô-lūn thiⁿ-téng, tōe-chiūⁿ, kap tōe-ē chúi-lāi só͘-ū ê mi̍h, lóng m̄-thang chō in ê siōng;

⁹ m̄-thang kā in kūi-pài, mā m̄-thang ho̍k-sāi in, in-ūi góa Siōng Chú — lí ê Siōng-tè sī iau-kiû choân-chêng ho̍k-sāi ê Siōng-tè; oàn-hūn góa ê lâng, góa tui-kiù in ê chōe, tùi pē kàu kiáⁿ, kàu saⁿ sì tāi;

¹⁰ thiàⁿ góa, chun-siú góa kài-bēng ê lâng, góa si-un hō͘ in, ti̍t-kàu chheng tāi.

¹¹ “M̄-thang lām-iōng Siōng Chú — lí ê Siōng-tè ê miâ; in-ūi lām-iōng Siōng Chú ê miâ ê lâng, góa Siōng Chú it-tēng bô kā i tòng-chòe bô-chōe.

¹² “Tio̍h chiàu Siōng Chú — lí ê Siōng-tè ê bēng-lēng, siú An-hioh-ji̍t chòe sèng-ji̍t.

¹³ La̍k ji̍t lāi tio̍h phah-piàⁿ chòe lí só͘-ū ê khang-khè,

¹⁴ m̄-kú tē-chhit ji̍t sī Siōng Chú — lí ê Siōng-tè siat-li̍p ê An-hioh-ji̍t; chit-ji̍t, lí kap lí ê kiáⁿ, cha-bó͘-kiáⁿ, lô͘-po̍k, lú-pī, gû, lû, cheng-siⁿ, í-ki̍p kià-ku tī lín tiong-kan ê lâng, lóng m̄-thang chòe kang, hō͘ lí ê lô͘-po̍k, lú-pī, thang kap lí siâng-khoán an-hioh.

¹⁵ Tio̍h ōe-kì--tit, lín í-chêng bat tī Ai-ki̍p-tōe chòe lô͘-châi, Siōng Chú — lín ê Siōng-tè chhun-chhut tōa khùi-la̍t ê chhiú, chhōa lín tùi hia chhut--lâi; in-ūi án-ni, Siōng Chú — lín ê Siōng-tè bēng-lēng lín tio̍h siú An-hioh-ji̍t.

¹⁶ “Tio̍h chiàu Siōng Chú — lí ê Siōng-tè ê bēng-lēng, hàu-kèng lí ê lāu-pē, lí ê lāu-bú, thang hō͘ lí tī Siōng Chú — lí ê Siōng-tè siúⁿ-sù lí ê tōe kú-tn̂g khiā-khí, hióng-siū hok-khì.

¹⁷ “M̄-thang hāi-sí lâng.

¹⁸ “M̄-thang kan-îm.

¹⁹ “M̄-thang thau-the̍h.

²⁰ “M̄-thang choh gūi-chèng hām-hāi lí ê chhù-piⁿ.

²¹ “M̄-thang tham lí ê chhù-piⁿ ê bó͘, mā m̄-thang tham lí ê chhù-piⁿ ê chhù, chhân-hn̂g, lô͘-po̍k, lú-pī, gû, lû, á-sī lí ê chhù-piⁿ jīm-hô ê mi̍h-kiāⁿ.”

²² Chiah-ê sī Siōng Chú tī soaⁿ-téng, tùi hé-iām, ba̍t-hûn, o͘-àm ê tiong-kan, tōa-siaⁿ tùi lín choân-thé hōe-chiòng pan-pò͘ ê kài-bēng, bô koh ke-thiⁿ kî-tha ê ōe. I koh chiong chiah-ê kài-bēng siá tī nn̄g tè chio̍h-pán, kau hō͘ góa.

Mô͘-se Thoân-ta̍t Lu̍t-hoat
( Chhut 20.18-21 )

²³ Hit-sî, soaⁿ--ni̍h ū hé teh to̍h, lín thiaⁿ-kìⁿ ū siaⁿ tùi o͘-àm tiong chhut--lâi, lín ta̍k chi-cho̍k ê léng-siù kap tiúⁿ-ló lóng lâi góa chia.

²⁴ Lín kóng, “Lí khòaⁿ, Siōng Chú — goán ê Siōng-tè hō͘ goán khòaⁿ-kìⁿ I ê êng-kng kap úi-tāi; goán koh thiaⁿ-kìⁿ I ê siaⁿ tùi hé-tiong hoat-chhut; kin-á-ji̍t goán chiah chai, Siōng-tè tùi lâng kóng-ōe, lâng iáu ōe oa̍h.

²⁵ Chit-ê tōa-hé ōe kā goán sio-sí; goán nā koh thiaⁿ-kìⁿ Siōng Chú — goán ê Siōng-tè ê siaⁿ, it-tēng ōe sí, goán ná tio̍h mō͘ sìⁿ-miā ê gûi-hiám?

²⁶ Kiám ū lâng chhin-chhiūⁿ goán thiaⁿ-kìⁿ éng-oa̍h Siōng-tè tùi hé-tiong kóng-ōe ê siaⁿ, iáu ōe-tàng oa̍h--teh?

²⁷ Lí tio̍h chìn-chêng khì thiaⁿ Siōng Chú — goán ê Siōng-tè só͘-ū beh tùi goán kóng ê ōe; chiong Siōng Chú tùi lí kóng ê ōe, lóng kā goán kóng; goán beh thiaⁿ, mā beh si̍t-hêng.”

²⁸ Lín tùi góa kóng ê ōe, Siōng Chú lóng ū thiaⁿ--tio̍h. I tùi góa kóng, “Góa ū thiaⁿ-tio̍h chiah-ê lâng tùi lí kóng ê ōe; in kóng-liáu chin tio̍h.

²⁹ Ǹg-bāng in chûn chit-khoán sim, kèng-ùi góa, siông-siông siú góa ê kài-bēng, hō͘ in kap in ê kiáⁿ-sun éng-oán tit-tio̍h hok-khì.

³⁰ Lí khì kā in kóng, ‘Lín tò-khì ka-kī ê pò͘-pîⁿ.’

³¹ Mô͘-se, lí tio̍h khiā tiàm góa chia, góa beh chiong lí só͘ tio̍h kà-sī in ê kài-bēng, kui-lē, bēng-lēng lóng kā lí kóng, hō͘ in thang tī góa siúⁿ-sù in chòe sán-gia̍p ê tōe si̍t-hêng.”

³² Só͘-í, lín tio̍h chhiat-si̍t chun-hêng Siōng Chú — lín ê Siōng-tè ê bēng-lēng, m̄-thang phian-chó-phian-iū.

³³ Lín lóng tio̍h kiâⁿ Siōng Chú — lín ê Siōng-tè bēng-lēng lín ê lō͘, hō͘ lín tī beh khì chiàm-léng ê tōe hióng-siū hok-khì, kú-tn̂g khiā-khí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan