Bìoball air-loidhne

Sin-bēng-kì 4 - 現代台語譯本羅馬字版

Khoàn-bián Í-sek-lia̍t-lâng

¹ Í-sek-lia̍t-lâng, taⁿ góa kà-sī lín ê kui-lē kap bēng-lēng, lín tio̍h thiaⁿ-siū chun-thàn, lín chiah ōe oa̍h, chìn-ji̍p Siōng Chú — lín lia̍t-chó͘ ê Siōng-tè siúⁿ-sù hō͘ lín ê tōe, sêng-chiap chòe sán-gia̍p.

² Góa hoan-hù lín ê ōe, chiū-sī Siōng Chú — lín ê Siōng-tè ê bēng-lēng, tio̍h chun-siú, m̄-thang ke-thiⁿ, mā m̄-thang kiám-chió.

³ Siōng Chú in-ūi Pa-le̍k Pí-ní ê tāi-chì só͘ chòe ê sū, lín ū chhin-ba̍k khòaⁿ--tio̍h; só͘-ū pài Pí-ní ê sîn-bêng Pa-le̍k ê lâng, Siōng Chú — lín ê Siōng-tè lóng chiong in tùi lín tiong-kan tû-bia̍t.

⁴ Chí-ū lín chiah-ê tiong-sêng kun-tè Siōng Chú — lín ê Siōng-tè ê lâng, kin-á-ji̍t lóng iáu oa̍h--teh.

⁵ Lín tio̍h ōe-kì--tit, góa ū chiàu Siōng Chú — góa ê Siōng-tè ê hoan-hù, chiong kui-lē kap bēng-lēng kà-sī lín, hō͘ lín tī beh ji̍p-khì sêng-chiap chòe sán-gia̍p ê tōe chun-hêng.

⁶ Só͘-í lín tio̍h chhiat-si̍t chun-hêng, án-ni lín chiū ōe tī lia̍t-kok bīn-chêng hián-chhut lín ê tì-hūi chhong-bêng; in chi̍t-ē thiaⁿ-tio̍h chiah-ê só͘-ū ê kui-lē, chiū ōe kóng, “Chit-ê úi-tāi ê kok-ka ê jîn-bîn chin-chiàⁿ sī ū tì-hūi chhong-bêng.”

⁷ Ū tó chi̍t ê tōa-kok ê sîn-bêng kap i ê jîn-bîn chhin-kūn, chhin-chhiūⁿ Siōng Chú — lán ê Siōng-tè kap lán chiah-ni̍h chhin-kūn, hō͘ lán thang sûi-sî kiû-kiò I?

⁸ Ū tó chi̍t ê tōa-kok ū kong-chèng ê kui-lē kap bēng-lēng, chhin-chhiūⁿ góa kin-á-ji̍t thoân hō͘ lín ê lu̍t-hoat án-ni?

⁹ Só͘-í tio̍h kín-sīn, mā tio̍h chhiat-si̍t pó-siú lín ê sim, chiah bián lín bōe-kì-tit lín chhin-ba̍k khòaⁿ--tio̍h ê tāi-chì, chiah bián chiah-ê tāi-chì tī lín oa̍h--teh ê sî lī-khui lín ê sim; mā tio̍h ēng chiah-ê kà-sī lín ê kiáⁿ-kiáⁿ-sun-sun.

¹⁰ Lín tī Hô-lia̍t-soaⁿ khiā tī Siōng Chú — lín ê Siōng-tè bīn-chêng hit-ji̍t, Siōng Chú tùi góa kóng, “Lí kā góa chio-chi̍p jîn-bîn, góa beh hō͘ in thiaⁿ-kìⁿ góa ê ōe, hō͘ in oa̍h tī sè-kan ê ji̍t, thang ha̍k-si̍p kèng-ùi góa, koh kà-sī in ê hō͘-tāi.”

¹¹ Hit-sî lín lóng kūn-óa--lâi, khiā tī soaⁿ-kha; soaⁿ--ni̍h ū hé-iām chhèng kàu thiⁿ-téng, koh ū o͘-hûn tà-óa.

¹² Siōng Chú tī hé-iām tiong tùi lín kóng-ōe; lín ū thiaⁿ-kìⁿ kóng-ōe ê siaⁿ, m̄-kú bô khòaⁿ-tio̍h sím-mi̍h hêng-siōng; chí-ū siaⁿ nā-tiāⁿ.

¹³ I chiong bēng-lēng lín tio̍h siú ê iok chí-sī lín, chiū-sī cha̍p-tiâu-kài, koh siá tī nn̄g tè chio̍h-pán.

¹⁴ Hit-sî, Siōng Chú koh hoan-hù góa chiong kui-lē kap bēng-lēng kà-sī lín, hō͘ lín tī beh kè-khì tit-tio̍h chòe sán-gia̍p ê tōe chun-hêng.

Kìm-chí Pài Ngó͘-siōng

¹⁵ Lín tio̍h te̍k-pia̍t kín-sīn, in-ūi Siōng Chú tī Hô-lia̍t-soaⁿ tùi hé-tiong kā lín kóng-ōe hit-sî, lín lóng bô khòaⁿ-tio̍h sím-mi̍h hêng-siōng;

¹⁶ só͘-í, lín m̄-thang tūi-lo̍h, ūi ka-kī chō jīm-hô hêng-chōng ê ngó͘-siōng, bô-lūn sī lâm sī lú,

¹⁷ tōe-chiūⁿ ê cháu-siù á-sī khong-tiong ê pe-chiáu,

¹⁸ tōe-chiūⁿ teh sô ê tōng-bu̍t á-sī chúi-tiong ê hî-lūi, lóng m̄-thang chō in ê siōng.

¹⁹ Lín gia̍h-thâu khòaⁿ-tio̍h thiⁿ-téng ê ji̍t, ge̍h, chhiⁿ-sîn, mā m̄-thang siū ín-iú kèng-pài ho̍k-sāi in, in-ūi chiah-ê sī Siōng Chú — lín ê Siōng-tè ūi-tio̍h thiⁿ-ē bān-bîn pâi-siat ê thian-thé.

²⁰ M̄-kú Siōng Chú chiong lín tùi chù-thih ê hé-lô͘ Ai-ki̍p kái-kiù--chhut-lâi, chòe I ê chú-bîn, I ê sán-gia̍p, chhin-chhiūⁿ kin-á-ji̍t án-ni.

²¹ Siōng Chú koh in-ūi lín ê iân-kò͘ tùi góa siū-khì, li̍p-sè m̄ hō͘ góa kè Iok-tàn-hô, mā m̄ hō͘ góa chìn-ji̍p Siōng Chú — lín ê Siōng-tè siúⁿ-sù lín chòe sán-gia̍p ê hó thó͘-tōe.

²² Góa tio̍h sí tī chia, bōe-tàng kè Iok-tàn-hô; m̄-kú lín ōe kè-khì chiàm-léng hit-ê hó ê tōe.

²³ Lín tio̍h kín-sīn, chiah bián lín bōe-kì-tit Siōng Chú — lín ê Siōng-tè kap lín li̍p ê iok, ûi-pōe Siōng Chú — lín ê Siōng-tè ê kài-bēng, ūi ka-kī tiau-khek jīm-hô hêng-chōng ê ngó͘-siōng.

²⁴ In-ūi Siōng Chú — lín ê Siōng-tè sī thun-bia̍t ê hé, sī iau-kiû choân-chêng ho̍k-sāi I ê Siōng-tè.

²⁵ Lín tī hit-ê tōe tòa chin kú, siⁿ-kiáⁿ thoân-sun, nā tūi-lo̍h, chō ta̍k-khoán hêng-chōng ê ngó͘-siōng, chòe Siōng Chú — lín ê Siōng-tè khòaⁿ-chòe pháiⁿ ê sū, jiá I siū-khì,

²⁶ góa kin-á-ji̍t chiū kiò thiⁿ kiò tōe chhut-lâi choh-chèng khòng-kò lín, lín ōe tī kè Iok-tàn-hô tit-tio̍h chòe sán-gia̍p ê tōe chin kín bia̍t-bông; lín tī hit-ê tōe bōe kú-tn̂g, ōe thiat-tóe siū siau-bia̍t.

²⁷ Siōng Chú ōe hō͘ lín sì-sòaⁿ tī bān-cho̍k ê tiong-kan; tī Siōng Chú kóaⁿ lín khì hiah-ê kok, lín chhun--lo̍h-lâi ê lâng chin chió.

²⁸ Tī hia, lín ōe ho̍k-sāi lâng ê chhiú ēng chhâ ēng chio̍h chō ê sîn-bêng; in bōe khòaⁿ, bōe thiaⁿ, bōe chia̍h, bōe phīⁿ.

²⁹ M̄-kú lín tī hia beh chhē Siōng Chú — lín ê Siōng-tè, nā choân-sim choân-chêng chhē I, chiū ōe chhē--tio̍h.

³⁰ Chiong-lâi lín tú-tio̍h ta̍k-khoán khó͘-lān ê sî, lín ōe kui-ǹg Siōng Chú — lín ê Siōng-tè, sūn-ho̍k I;

³¹ in-ūi Siōng Chú — lín ê Siōng-tè sī lîn-bín ê Siōng-tè, bōe pàng-sak lín, bōe châu-bia̍t lín, mā bōe bōe-kì-tit I li̍p-sè kap lín ê lia̍t-chó͘ só͘ li̍p ê iok.

³² Lín cha-khó choân sè-kài, tùi í-chêng, chiū-sī tùi Siōng-tè chhòng-chō jîn-lūi tī sè-kan í-lâi, kiám bat ū chhin-chhiūⁿ chit-khoán ê tōa-sū hoat-seng? Lín kiám bat thiaⁿ-kìⁿ chit-khoán tāi-chì?

³³ Kiám ū tó chi̍t ê bîn-cho̍k bat thiaⁿ-kìⁿ Siōng-tè tùi hé-tiong kóng-ōe ê siaⁿ, chhin-chhiūⁿ lín thiaⁿ--kìⁿ, m̄-kú iáu oa̍h--teh?

³⁴ Kiám ū tó chi̍t ê sîn-bêng chhin-chhiūⁿ Siōng Chú — lín ê Siōng-tè, tùi bān-cho̍k ê tiong-kan kéng-soán chi̍t cho̍k chòe ka-kī ê chú-bîn, koh chhun-chhut tōa khùi-la̍t ê chhiú, ēng chai-lān, sîn-jiah, kî-sū, chiàn-cheng, tī Ai-ki̍p ūi-tio̍h lín chòe tōa koh thang-kiaⁿ ê sū?

³⁵ Siōng Chú án-ni tùi lín hián-hiān, hō͘ lín chai I sī Siōng-tè, í-gōa bô pa̍t-ê.

³⁶ I tùi thiⁿ hō͘ lín thiaⁿ-kìⁿ I ê siaⁿ, ūi-tio̍h beh kà-sī lín; koh tī tōe-chiūⁿ hō͘ lín khòaⁿ-tio̍h I ê tōa-hé, thiaⁿ-tio̍h I tùi hé-tiong kā lín kóng ê ōe.

³⁷ In-ūi I thiàⁿ lín ê lia̍t-chó͘, só͘-í kéng-soán in ê hō͘-tāi, chhin-sin ēng tōa koân-lêng tùi Ai-ki̍p chhōa lín chhut--lâi;

³⁸ tùi lín ê bīn-chêng chiong pí lín khah kiông-tāi ê bîn-cho̍k kóaⁿ-cháu, chhōa lín ji̍p-khì in ê tōe, chiong chit-ê tōe sù lín chòe sán-gia̍p, chhin-chhiūⁿ kin-á-ji̍t án-ni.

³⁹ Só͘-í, kin-á-ji̍t lín tio̍h chai, tio̍h ōe-kì--tit, thiⁿ-téng tōe-ē chí-ū Siōng Chú sī Siōng-tè, í-gōa bô pa̍t-ê.

⁴⁰ Góa kin-á-ji̍t só͘ bēng-lēng lín I ê kui-lē kap kài-bēng, lín tio̍h chun-siú, hō͘ lín kap lín ê hō͘-tāi thang tit-tio̍h hok-khì, tī Siōng Chú — lín ê Siōng-tè siúⁿ-sù lín chòe éng-oán sán-gia̍p ê tōe kú-tn̂g khiā-khí.

Iok-tàn-hô Tang-pêng ê Pī-lān-siâⁿ

⁴¹ Āu-lâi, Mô͘-se tī Iok-tàn-hô tang-pêng chí-tēng saⁿ ê siâⁿ,

⁴² hō͘ hiah-ê bô oan-siû, bô-ì-tiong gō͘-sat lâng ê lâng tô-cháu khì hia, thang pó-choân sìⁿ-miā;

⁴³ sio̍k Lū-piān-lâng--ê sī tī khòng-iá pêng-goân ê Pí-sek, sio̍k Ka-tek-lâng--ê sī Ki-lia̍t ê La-boa̍t, sio̍k Má-ná-se-lâng--ê sī Pa-san ê Ko-lân.

Pan-pò͘ Siōng-tè ê Lu̍t-hoat

⁴⁴ Ē-bīn sī Mô͘-se tùi Í-sek-lia̍t-lâng pan-pò͘ ê lu̍t-hoat,

⁴⁵ sī Mô͘-se tī Í-sek-lia̍t-lâng chhut Ai-ki̍p liáu-āu, thoân hō͘ in ê kà-sī, kui-lē, kap bēng-lēng.

⁴⁶ I pan-pò͘ lu̍t-hoat ê tōe-tiám tī Iok-tàn-hô tang-pêng, Pek Pí-ní tùi-bīn ê soaⁿ-kok tiong, sio̍k tòa tī Hi-si̍t-pún ê A-mô͘-lī-ông Se-hông ê tōe; Mô͘-se kap Í-sek-lia̍t-lâng chhut Ai-ki̍p liáu-āu thâi-sí Se-hông.

⁴⁷ In chiàm-léng A-mô͘-lī-lâng nn̄g ê ông, Se-hông kap Pa-san-ông Go̍k tī Iok-tàn-hô tang-pêng ê tōe,

⁴⁸ tùi A-lūn Soaⁿ-kok piⁿ ê A-lô-ní, ti̍t-kàu Se-liân-soaⁿ, chiū-sī Hek-bûn-soaⁿ;

⁴⁹ í-ki̍p Iok-tàn-hô tang-pêng ê A-la-pa tōe-khu, ti̍t-kàu A-la-pa-hái, chiap-kūn Pí-su-ka-soaⁿ soaⁿ-kha ê tōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan