Bìoball air-loidhne

Sin-bēng-kì 3 - 現代台語譯本羅馬字版

Phah-pāi Pa-san-ông Go̍k
( Bîn 21.31-35 )

¹ Āu-lâi, lán chiū oat tùi ǹg Pa-san ê hong-hiòng khì; Pa-san-ông Go̍k kap i ê kun-peng chhut-lâi tī Í-tek-lâi kap lán kau-chiàn.

² Siōng Chú kā góa kóng, “M̄-bián kiaⁿ i, in-ūi góa í-keng chiong i kap i ê kun-peng, í-ki̍p i ê thó͘-tōe lóng kau tī lí ê chhiú; lí tio̍h chhin-chhiūⁿ tùi-hù tòa tī Hi-si̍t-pún ê A-mô͘-lī-ông Se-hông án-ni tùi-hù i.”

³ Siōng Chú — lán ê Siōng-tè chiū chiong Pa-san-ông Go̍k kap i ê kun-peng lóng kau hō͘ lán; lán kā in phah-sí, liân chi̍t ê to bô lâu.

⁴ Hit-sî, lán kong-chhú i só͘-ū ê siâⁿ, bô chi̍t chō siâⁿ bô hō͘ lán chiàm-léng; án-ni, lán kong-chiàm Pa-san-ông Go̍k só͘ thóng-tī A-ní-ko-pek tōe-khu choân-pō͘ ê la̍k-cha̍p chō siâⁿ.

⁵ Chiah-ê lóng sī kian-kò͘ ê siâⁿ, ū koân ê siâⁿ-chhiûⁿ, ū mn̂g ū chhòaⁿ; í-gōa iáu ū chin chōe bô siâⁿ-chhiûⁿ ê chng-siā.

⁶ Lán oân-choân kā in siau-bia̍t, chhin-chhiūⁿ í-chêng tùi-thāi Hi-si̍t-pún-ông Se-hông án-ni, chiong siâⁿ-lāi ê ta-po͘-lâng, cha-bó͘-lâng, kap gín-á lóng châu-bia̍t;

⁷ chí-ū lâu cheng-siⁿ kap tùi ta̍k-ê siâⁿ chhiúⁿ--lâi ê mi̍h-kiāⁿ chòe ka-kī ê chiàn-lī-phín.

⁸ Hit-sî, lán tùi nn̄g ê A-mô͘-lī-ông ê chhiú chhiúⁿ-toa̍t in tī Iok-tàn-hô tang-pêng ê tōe, tùi A-lūn Soaⁿ-kok kàu Hek-bûn-soaⁿ.

⁹ Chit-ê Hek-bûn-soaⁿ, Se-tùn-lâng kā i kiò-chòe Se-liân; A-mô͘-lī-lâng kiò i chòe Sī-nî-ní.

¹⁰ Lán mā kong-chhú pêng-goân só͘-ū ê siâⁿ, Ki-lia̍t tōe-khu kap Pa-san tōe-khu, ti̍t-kàu Sat-ka kap Í-tek-lâi; chiah-ê lóng sī Pa-san-ông Go̍k ê siâⁿ.

¹¹ Pa-san-ông Go̍k sī Lī-hoa̍t-im-lâng chòe-āu chi̍t ê lâng. I ê bîn-chhn̂g sī thih--ê, tn̂g tāi-iok sì kong-chhioh, khoah nn̄g kong-chhioh. Hiān-chāi tī A-bûn-lâng ê La-pa iáu ōe-tàng khòaⁿ-tio̍h chit-téng bîn-chhn̂g.

Hun-phòe Iok-tàn-hô Tang-pêng ê Thó͘-tōe
( Bîn 32.1-42 )

¹² Lán tit-tio̍h chit-tè thó͘-tōe liáu-āu, góa chiong A-lūn Soaⁿ-kok hù-kūn ê A-lô-ní-siâⁿ, kap Ki-lia̍t soaⁿ-khu ê chi̍t-pòaⁿ, í-ki̍p kî-tiong hiah-ê siâⁿ, lóng hō͘ Lū-piān-lâng kap Ka-tek-lâng;

¹³ chiong Ki-lia̍t kî-tha ê tōe, kap Pa-san-ông Go̍k choân-pō͘ ê thó͘-tōe, lóng hō͘ Má-ná-se pòaⁿ chi-cho̍k. Pa-san ê A-ní-ko-pek tōe-khu, mā kiò-chòe Lī-hoa̍t-im-lâng ê tōe.

¹⁴ Má-ná-se ê hō͘-tāi Gâi-ní chiàm-léng A-ní-ko-pek choân tōe-khu, ti̍t-kàu Ki-su̍t-lâng kap Má-ka-lâng ê pian-kài; i ēng ka-kī ê miâ kiò Pa-san tōe-khu chòe Hap-o-te̍k Gâi-ní, kàu kin-á-ji̍t iáu ēng chit-ê miâ.

¹⁵ Góa chiong Ki-lia̍t pun hō͘ Má-kiat chong-cho̍k.

¹⁶ Góa pun hō͘ Lū-piān chi-cho̍k kap Ka-tek chi-cho̍k ê tōe sī: Tùi Ki-lia̍t kàu A-lūn Soaⁿ-kok, ēng soaⁿ-kok chòe kài, ti̍t-kàu A-bûn-lâng ê pian-kài ê Ngá-phok-hô,

¹⁷ pau-koat A-la-pa kap óa-kūn Iok-tàn-hô ê tōe, tùi Ka-lī-lī-ô͘ kàu A-la-pa-hái, chiū-sī Iâm-hái, í-ki̍p Pí-su-ka soaⁿ-kha tang-pêng ê tōe.

¹⁸ Hit-sî góa hoan-hù in, kóng, “Siōng Chú — lín ê Siōng-tè í-keng chiong chit-ê tōe hō͘ lín chòe ke-gia̍p; lín tiong-kan ê ióng-sū lóng tio̍h tòa kun-khì, chòe lín tông-pau ê sian-hong kè-hô.

¹⁹ M̄-kú lín ê bó͘, lín ê gín-á, kap lín ê cheng-siⁿ — góa chai lín ê cheng-siⁿ chin chōe — thang tòa tī góa só͘ hō͘ lín ta̍k-ê siâⁿ,

²⁰ kàu Siōng Chú hō͘ lín ê tông-pau kap lín siâng-khoán, tī Iok-tàn-hô hit-pêng tit-tio̍h Siōng Chú — lín ê Siōng-tè siúⁿ-sù in an-ún khiā-khí ê tōe, jiân-āu lín chiah thang tò-lâi góa só͘ siúⁿ-sù lín chòe sán-gia̍p ê tōe.”

²¹ Hit-sî, góa hoan-hù Iok-su-a, kóng, “Lí ū chhin-ba̍k khòaⁿ-tio̍h Siōng Chú — lí ê Siōng-tè tùi chit nn̄g ê ông só͘ chòe it-chhè ê sū, Siōng Chú mā beh chhin-chhiūⁿ án-ni tùi-thāi lín kè-hô liáu-āu tú--tio̍h ê kok-ka.

²² Lín m̄-bián kiaⁿ in, in-ūi ūi lín kau-chiàn--ê sī Siōng Chú — lín ê Siōng-tè.”

Mô͘-se Bōe-tàng Chìn-ji̍p Ka-lâm-tōe

²³ Hit-sî góa khún-kiû Siōng Chú, kóng,

²⁴ “Chì-koân ê Siōng Chú, lí í-keng hō͘ lí ê po̍k-jîn khòaⁿ-kìⁿ lí ê úi-tāi, lí ê koân-lêng. Tī thiⁿ-téng, tī tōe-chiūⁿ, bô jīm-hô sîn-bêng ōe-tàng chòe chhin-chhiūⁿ lí só͘ chòe tōa koân-lêng ê chok-ûi.

²⁵ Kiû lí hō͘ góa kè Iok-tàn-hô, khòaⁿ-tio̍h hit-pêng pûi ê tōe, súi ê soaⁿ, kap Lê-pa-lūn.”

²⁶ M̄-kú Siōng Chú in-ūi lín ê iân-kò͘ tùi góa siū-khì, m̄ thiaⁿ góa ê khún-kiû. Siōng Chú tùi góa kóng, “Hó ah lah, lí m̄-thang koh tùi góa thê-khí chit-ê sū.

²⁷ Lí tio̍h chiūⁿ Pí-su-ka ê soaⁿ-téng, gia̍h-thâu ǹg tang sai lâm pak siông-sè khòaⁿ, in-ūi lí bōe-tàng kè Iok-tàn-hô.

²⁸ M̄-kú lí tio̍h hoan-hù Iok-su-a, kā i kó͘-lē, hō͘ i kian-kiông; in-ūi i beh chhōa chiah-ê jîn-bîn kè--khì, hō͘ in sêng-chiap lí beh khòaⁿ--kìⁿ ê tōe.”

²⁹ Tùi án-ni, lán chiū lâu tī Pek Pí-ní tùi-bīn ê soaⁿ-kok tiong.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan