Bìoball air-loidhne

Sin-bēng-kì 2 - 現代台語譯本羅馬字版

Tī Khòng-iá Liû-lōng

¹ Āu-lâi, lán oa̍t tò-tńg, chiàu Siōng Chú tùi góa ê bēng-lēng, ǹg Âng-hái ê hong-hiòng khì khòng-iá; lán se̍h Se-ní-soaⁿ chin chōe ji̍t.

² Siōng Chú tùi góa kóng,

³ “Lín í-keng se̍h chit-ê soaⁿ-khu chin kú lah, tio̍h oat tùi pak-pêng khì.

⁴ Lí tio̍h hoan-hù jîn-bîn kóng, ‘Lín ê hiaⁿ-tī Í-sò ê hō͘-tāi tòa tī Í-tong; lín beh keng-kè in ê kéng-kài, in ōe kiaⁿ lín, só͘-í lín tio̍h hui-siông kín-sīn.

⁵ M̄-thang jiá in; in ê tōe liân kha ōe-tàng ta̍h hiah-ni̍h sòe ê ūi góa to bô beh hō͘ lín, in-ūi góa í-keng chiong Í-tong hō͘ Í-sò chòe ke-gia̍p.

⁶ Lín tio̍h ēng gûn kā in bóe niû-si̍t lâi chia̍h, bóe chúi lâi lim.’”

⁷ Siōng Chú — lín ê Siōng-tè tī lín chòe ê ta̍k-hāng sū lóng sù-hok lín; lín kiâⁿ chit-ê khoah-tōa ê khòng-iá, I lóng kā lín khòaⁿ-kò͘; chit sì-cha̍p nî, Siōng Chú — lín ê Siōng-tè kap lín tông-chāi, lín lóng bô khiàm-kheh sím-mi̍h.

⁸ Só͘-í, lán chiū se̍h-kè Í-tong, chiū-sī lán ê hiaⁿ-tī Í-sò ê hō͘-tāi tòa ê tōe-khu; tùi A-la-pa ê lō͘ keng-kè Í-la-tha, Í-sûn Ka-pia̍t, oat tùi ǹg Mô͘-ap khòng-iá ê hong-hiòng khì.

⁹ Siōng Chú koh tùi góa kóng, “M̄-thang jiá Mô͘-ap-lâng, m̄-thang chhim-hoān in; in ê tōe góa mā bô beh hō͘ lín chòe sán-gia̍p, in-ūi góa í-keng chiong A-ní-siâⁿ hō͘ Lô-tek ê hō͘-tāi chòe ke-gia̍p.”

¹⁰ Í-chêng, Í-bí-lâng tòa tī hit-ê tōe-khu; in jîn-kháu chōe koh kiông, chhin-chhiūⁿ A-la̍p-cho̍k ê lâng hiah lò.

¹¹ In mā kap A-la̍p-cho̍k ê lâng kâng-khoán hō͘ lâng kiò-chòe Lī-hoa̍t-im-lâng; m̄-kú Mô͘-ap-lâng kiò in chòe Í-bí-lâng.

¹² Che tú chhin-chhiūⁿ chá-chêng Hô-lī-lâng tòa tī Í-tong, m̄-kú Í-sò ê hō͘-tāi mā kā in siau-bia̍t, sòa-chiap in tòa tī hia; mā chhin-chhiūⁿ Í-sek-lia̍t-lâng tī Siōng Chú siúⁿ-sù in chòe ke-gia̍p ê tōe, chiong goân-lâi ê chū-bîn kóaⁿ-cháu siâng-khoán.

¹³ Siōng Chú koh kóng, “Lín tio̍h khí--lâi, kè Sat-lia̍t-khoe.” Tùi án-ni, lán chiū kè hit-tiâu khoe.

¹⁴ Lán tùi lī-khui Ka-te-su Pa-nî-a, kàu kè Sat-lia̍t-khoe, keng-kè saⁿ-cha̍p-poeh nî kú; ti̍t-kàu hit-tāi ê chiàn-sū lóng sí tī kun-iâⁿ, tú chiàu Siōng Chú tùi in só͘ li̍p-sè--ê.

¹⁵ Siōng Chú ê chhiú kong-kek in, tùi kun-iâⁿ tiong kā in oân-choân siau-bia̍t.

¹⁶ Jîn-bîn tiong-kan ê chiàn-sū lóng sí--khì liáu-āu,

¹⁷ Siōng Chú tùi góa kóng,

¹⁸ “Kin-á-ji̍t lín beh tùi Mô͘-ap ê pian-kài A-ní-siâⁿ keng-kè;

¹⁹ lín kiâⁿ-óa A-bûn-lâng ê sî, m̄-thang jiá in, m̄-thang chhim-hoān in; in-ūi A-bûn-lâng ê tōe góa bô beh hō͘ lín chòe sán-gia̍p, góa í-keng chiong hit-tè tōe sù hō͘ Lô-tek ê hō͘-tāi chòe sán-gia̍p.”

²⁰ Hit-ê tōe-khu mā sǹg-chòe Lī-hoa̍t-im-lâng ê tōe. Í-chêng Lī-hoa̍t-im-lâng tòa tī hia; A-bûn-lâng kiò in chòe Sàn-cho͘-bêng-lâng;

²¹ in jîn-kháu chōe koh kiông, chhin-chhiūⁿ A-la̍p-cho̍k ê lâng hiah lò; m̄-kú Siōng Chú kā in siau-bia̍t, A-bûn-lâng chiū chiàm-léng in ê tōe, sòa-chiap in tòa tī hia;

²² tú chhin-chhiūⁿ Siōng Chú ūi-tio̍h tòa tī Í-tong ê Í-sò hō͘-tāi siau-bia̍t Hô-lī-lâng, hō͘ in sòa-chiap tòa tī chit-ê tōe ti̍t-kàu kin-á-ji̍t siâng-khoán.

²³ Tùi Ka-hui-thok chhut-lâi ê Hui-lī-sū-lâng mā siâng-khoán, siau-bia̍t tòa tī Ka-sat kap hù-kūn chng-siā ê A-ōe-lâng, sòa-chiap in tòa tī hia.

²⁴ Taⁿ, lín tio̍h khí--lâi, chhut-hoat kè A-lūn Soaⁿ-kok. Khòaⁿ leh! Góa í-keng chiong A-mô͘-lī-lâng Hi-si̍t-pún-ông Se-hông kap i ê thó͘-tōe, kau tī lín ê chhiú; lín tio̍h kap i kau-chiàn, chiàm-léng i ê thó͘-tōe.

²⁵ Tùi kin-á-ji̍t khí, góa beh hō͘ thiⁿ-ē bān-bîn lóng kiaⁿ lín, lún lín; hō͘ in thiaⁿ-tio̍h koan-hē lín ê hong-siaⁿ lóng hoân-ló, phi̍h-phi̍h-chhoah.

Phah-pāi Hi-si̍t-pún-ông
( Bîn 21.21-30 )

²⁶ Góa tùi Ki-tí-bo̍k ê khòng-iá, phài sù-chiá khì kìⁿ Hi-si̍t-pún-ông Se-hông, ēng hó-ōe tùi i kóng,

²⁷ “Chhiáⁿ lí ún-chún goán keng-kè lí ê tōe; goán ōe kiâⁿ tōa-lō͘, bōe phian-chó, bōe phian-iū.

²⁸ Goán ōe ēng gûn kā lín bóe niû-si̍t chia̍h, bóe chúi lim, chí-ū pài-thok lí chún goán kiâⁿ--kè-khì;

²⁹ chhin-chhiūⁿ tòa tī Í-tong ê Í-sò hō͘-tāi, kap tòa tī A-ní-siâⁿ ê Mô͘-ap-lâng tùi-thāi goán kâng-khoán; ti̍t-kàu goán kè Iok-tàn-hô, chìn-ji̍p Siōng Chú — goán ê Siōng-tè siúⁿ-sù hō͘ goán ê tōe.”

³⁰ M̄-kú Hi-si̍t-pún-ông Se-hông m̄-khéng hō͘ lán tùi i ê tōe keng-kè, in-ūi Siōng Chú — lán ê Siōng-tè hō͘ i kò͘-chip ngī-sim, ūi-tio̍h beh hō͘ lán kā i phah-pāi, chhin-chhiūⁿ kin-á-ji̍t lán só͘ chai--ê án-ni.

³¹ Siōng Chú kā góa kóng, “Khòaⁿ leh, góa í-keng chiong Se-hông kap i ê thó͘-tōe kau hō͘ lí, taⁿ lí tio̍h khì chiàm-léng i ê thó͘-tōe chòe lín ê sán-gia̍p.”

³² Hit-sî Se-hông kap i ê kun-peng chhut-lâi tī Ngá-cha̍p kap lán kau-chiàn.

³³ Siōng Chú — lán ê Siōng-tè chiong i kau hō͘ lán, lán chiū chiong i kap i ê kiáⁿ, í-ki̍p só͘-ū ê kun-peng lóng phah-sí.

³⁴ Lán koh kong-chhú i lóng-chóng ê siâⁿ, chiong siâⁿ-lāi ê ta-po͘-lâng, cha-bó͘-lâng, kap gín-á lóng châu-bia̍t, bô lâu pòaⁿ-ê;

³⁵ chí-ū lâu cheng-siⁿ kap tùi ta̍k-ê siâⁿ chhiúⁿ--lâi ê mi̍h-kiāⁿ chòe ka-kī ê chiàn-lī-phín.

³⁶ Tùi A-lūn Soaⁿ-kok piⁿ ê A-lô-ní, kap soaⁿ-kok tiong ê siâⁿ, ti̍t-kàu Ki-lia̍t, bô chi̍t ê siâⁿ kian-kò͘ kah lán bô hoat-tō͘ kong-phòa, in-ūi Siōng Chú — lán ê Siōng-tè chiong chiah-ê siâⁿ lóng kau hō͘ lán.

³⁷ Chí-ū A-bûn-lâng ê tōe, Ngá-phok hô-piⁿ ê tōe, kap soaⁿ-khu chiah-ê siâⁿ, lán bô khì kong-táⁿ, in-ūi Siōng Chú — lán ê Siōng-tè kìm-chí lán.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan