Bìoball air-loidhne

Sin-bēng-kì 11 - 現代台語譯本羅馬字版

Siōng Chú ê Úi-tāi

¹ Lín tio̍h thiàⁿ Siōng Chú — lín ê Siōng-tè, siông-siông chun-siú I só͘ hoan-hù--ê, I ê kui-lē, bēng-lēng, kài-bēng.

² Lín tio̍h chai, góa kin-á-ji̍t sī tùi lín, m̄-sī tùi lín ê kiáⁿ-jî kóng-ōe, in m̄ chai, mā bô khòaⁿ-tio̍h Siōng Chú — lín ê Siōng-tè ê koán-kàu, úi-tāi, I tōa khùi-la̍t ê chhiú kap chhun--chhut-lâi ê chhiú-kut,

³ í-ki̍p I tī Ai-ki̍p tùi Hoat-ló kap Ai-ki̍p choân-kok só͘ kiâⁿ ê sîn-jiah,

⁴ kap I án-chóaⁿ tùi-hù Ai-ki̍p ê kun-peng, chiàn-bé kap chiàn-chhia; chiū-sī tī in tui-jip lín ê sî, án-chóaⁿ hō͘ Âng-hái ê chúi kā in im-sí, thiat-tóe kā in siau-bia̍t;

⁵ koh lín lâi kàu chit-ê só͘-chāi í-chêng, I tī khòng-iá án-chóaⁿ khoán-thāi lín,

⁶ koh I án-chóaⁿ tùi-hù Lū-piān ê hō͘-tāi Í-lī-ap ê kiáⁿ Tāi-tan kap A-pí-lân; tī Í-sek-lia̍t-lâng ê bīn-chêng hō͘ tōe khui-chhùi thun-bia̍t in, in ê ka-sio̍k, in ê pò͘-pîⁿ, í-ki̍p in só͘-ū ê lô͘-po̍k kap cheng-siⁿ.

⁷ Chí-ū lín ū chhin-ba̍k khòaⁿ-tio̍h Siōng Chú só͘ chòe it-chhè úi-tāi ê chok-ûi.

Èng-ún kap Kéng-kò

⁸ Lín tio̍h chun-siú góa kin-á-ji̍t só͘ bēng-lēng lín it-chhè ê kài-bēng, lín chiah ū khùi-la̍t ji̍p-khì chiàm-léng lín beh kè-khì sêng-chiap ê tōe;

⁹ koh hō͘ lín ōe-tàng kú-tn̂g khiā-khí tī Siōng Chú li̍p-sè beh siúⁿ-sù lín ê lia̍t-chó͘ kap in ê hō͘-tāi ê tōe, chiū-sī hit-ê lâu lin kap bi̍t ê tōe.

¹⁰ Lín beh ji̍p-khì sêng-chiap ê tōe, kap lín tùi hia chhut--lâi ê Ai-ki̍p-tōe bô kâng-khoán; lín tī hia ê chhài-hn̂g tio̍h iā chéng-chí, ta̍h chúi-chhia koàn-khài;

¹¹ m̄-kú lín beh ji̍p-khì sêng-chiap ê tōe sī ū soaⁿ, ū soaⁿ-kok, koh ū hō͘-chúi lūn-te̍k ê thó͘-tōe;

¹² sī Siōng Chú — lín ê Siōng-tè kui-nî-thàng-thiⁿ teh chiàu-kò͘, ba̍k-chiu siông-siông teh khòaⁿ-kò͘ ê tōe.

¹³ Lín nā chin-chiàⁿ thiaⁿ-thàn góa kin-á-ji̍t só͘ bēng-lēng lín ê kài-bēng, thiàⁿ Siōng Chú — lín ê Siōng-tè, choân-sim choân-chêng ho̍k-sāi I,

¹⁴ I chiū beh chiàu-sî ūi-tio̍h lín ê thó͘-tōe lo̍h chhun-lîm chhiu-ú, hō͘ lín thang siu-sêng ngó͘-kok, sin-chiú, kap sin-iû,

¹⁵ mā hō͘ lín ê chhân-iá hoat-chháu, thang chhī cheng-siⁿ; án-ni lín chiū beh tit-tio̍h pá-chiok.

¹⁶ Tio̍h kín-sīn, chiah bián lín ê sim siū bê-he̍k, lī-khui Siōng Chú khì ho̍k-sāi kèng-pài pa̍t-ê sîn-bêng,

¹⁷ tì-kàu Siōng Chú tùi lín hoat tōa siū-khì, chiong thiⁿ koaiⁿ-ba̍t bô lo̍h-hō͘, tōe bô chhut-sán, lín chiū ōe chin kín tī Siōng Chú só͘ siúⁿ-sù lín súi ê tōe bia̍t-bông.

¹⁸ Lín tio̍h chiong góa ê ōe kì tī lín ê sim-lāi, chûn tī lín ê ì-liām, mā tio̍h pa̍k tī chhiú--ni̍h chòe kì-hō, pa̍k tī thâu-hia̍h thê-chhíⁿ;

¹⁹ koh tio̍h kà-sī lín ê kiáⁿ-jî, bô-lūn tī chhù-lāi chē, tī lō͘--ni̍h kiâⁿ, tó--teh á-sī khí--lâi, lóng tio̍h liām hō͘ in thiaⁿ;

²⁰ tio̍h siá tī chhù ê mn̂g-khiā, mā tio̍h siá tī siâⁿ-mn̂g;

²¹ án-ni, lín kap lín ê kiáⁿ-sun chiū thang tī Siōng Chú tùi lín ê lia̍t-chó͘ li̍p-sè siúⁿ-sù in ê thó͘-tōe kú-tn̂g khiā-khí, chhin-chhiūⁿ thiⁿ tōe chûn-chāi hiah kú.

²² Lín nā chhiat-si̍t chun-hêng góa só͘ bēng-lēng lín it-chhè ê kài-bēng, thiàⁿ Siōng Chú — lín ê Siōng-tè, kiâⁿ I ê tō-lō͘, tiong-sêng kun-tè I,

²³ Siōng Chú chiū beh tī lín bīn-chêng chiong chiah-ê jîn-bîn kóaⁿ-cháu, lín mā beh cheng-ho̍k chiah-ê pí lín khah kiông-tāi ê kok.

²⁴ Lín ê kha ta̍h--kè ê tōe lóng beh chòe lín ê sán-gia̍p; tùi lâm-pêng ê khòng-iá kàu pak-pêng ê Lê-pa-lūn, tùi tang-pêng ê Iù-hoat-la-tí-hô kàu sai-pêng ê Tōe-tiong-hái, lóng beh chiâⁿ-chòe lín ê léng-thó͘.

²⁵ Bô chi̍t ê lâng ōe-tàng tùi-khòng lín; Siōng Chú — lín ê Siōng-tè beh chiàu I tùi lín ê èng-ún, hō͘ lín ta̍h--kè ê tōe ê chū-bîn lóng kiaⁿ lín, lún lín.

²⁶ Khòaⁿ leh, góa kin-á-ji̍t chiong chiok-hok kap chiù-chó͘ pâi tī lín ê bīn-chêng;

²⁷ lín nā chun-thàn Siōng Chú — lín ê Siōng-tè ê kài-bēng, chiū-sī góa kin-á-ji̍t só͘ bēng-lēng lín--ê, chiū ōe tit-tio̍h chiok-hok;

²⁸ lín nā m̄ sūn-thàn Siōng Chú — lín ê Siōng-tè ê kài-bēng, phian-lī góa kin-á-ji̍t só͘ bēng-lēng lín tio̍h kiâⁿ ê tō-lō͘, khì kun-tè lín m̄-bat ê sîn-bêng, chiū ōe siū chiù-chó͘.

²⁹ Siōng Chú — lín ê Siōng-tè chhōa lín ji̍p-khì chiàm-léng hiah-ê tōe ê sî, lín tio̍h tī Ki-lī-sim-soaⁿ soan-pò͘ chiok-hok, tī Í-pa-lō͘-soaⁿ soan-pò͘ chiù-chó͘.

³⁰ Chit nn̄g ê soaⁿ sī tī Iok-tàn-hô sai-pêng ji̍t lo̍h ê só͘-chāi, chiū-sī tī Ka-lâm-lâng khiā-khí ê A-la-pa tōe-khu, kap Kiat-kah sio-tùi, óa-kūn Mô͘-lī siōng-chhiū ê só͘-chāi.

³¹ Lín teh-beh kè Iok-tàn-hô, ji̍p-khì tit-tio̍h Siōng Chú — lín ê Siōng-tè siúⁿ-sù hō͘ lín chòe sán-gia̍p ê tōe, tī hia khiā-khí.

³² Lín tio̍h un-khûn chun-hêng góa kin-á-ji̍t pan-pò͘ hō͘ lín it-chhè ê kui-lē kap bēng-lēng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan