Bìoball air-loidhne

Sin-bēng-kì 1 - 現代台語譯本羅馬字版

Mô͘-se ê Hôe-ek

¹ Ē-bīn sī Mô͘-se tī Iok-tàn-hô tang-pêng ê khòng-iá, So͘-hut tùi-bīn ê A-la-pa, chiū-sī tī Pa-lân kap Tô-hut, La-pan, Hap-sé-lio̍k, Tí-sat-hap ê tiong-kan, tùi Í-sek-lia̍t jîn-bîn kóng ê ōe.

² Tùi Hô-lia̍t-soaⁿ keng-kè Se-ní-soaⁿ kàu Ka-te-su Pa-nî-a, su-iàu cha̍p-it ji̍t ê lō͘-thêng.

³ Tī chhut Ai-ki̍p liáu-āu tē-sì-cha̍p nî, cha̍p-it-ge̍h chhoe-it, Mô͘-se chiong Siōng Chú kau-tài i tùi Í-sek-lia̍t-lâng só͘-ū ê bēng-lēng, lóng kā in kóng.

⁴ Hit-sî, Mô͘-se í-keng thâi-iâⁿ tòa tī Hi-si̍t-pún ê A-mô͘-lī-ông Se-hông, kap tòa tī Í-tek-lâi, A-su-tha-lio̍k ê Pa-san-ông Go̍k.

⁵ Mô͘-se tī Iok-tàn-hô tang-pêng ê Mô͘-ap-tōe, khai-sí káng-kái Siōng Chú ê lu̍t-hoat, kóng:

⁶ Siōng Chú — lán ê Siōng-tè tī Hô-lia̍t-soaⁿ kā lán hoan-hù kóng, “Lín tī chit-ê soaⁿ í-keng tòa ū-kàu kú ah;

⁷ tio̍h khí-sin oat-khì A-mô͘-lī ê soaⁿ-tōe, í-ki̍p hit hù-kūn ê A-la-pa, soaⁿ-tōe, soaⁿ-po͘, Nî-kek-hu, Tōe-tiong-hái iân-hái it-tài, Ka-lâm-lâng ê tōe-khu, kap Lê-pa-lūn, ti̍t-kàu Tōa-hô, chiū-sī Iù-hoat-la-tí-hô.

⁸ Taⁿ, góa chiong chit-ê tōe sù hō͘ lín, lín tio̍h ji̍p-khì sêng-chiap; chit-ê tōe sī Siōng Chú tùi lín ê chó͘-sian, A-pek-la-hán, Í-sat, Ngá-kok li̍p-sè èng-ún, beh siúⁿ-sù in kap in ê kiáⁿ-kiáⁿ-sun-sun ê thó͘-tōe.”

Mô͘-se Soán-li̍p Sím-phòaⁿ-koaⁿ
( Chhut 18.13-27 )

⁹ Hit-sî, góa ū kā lín kóng, “Koán-lí lín ê chek-jīm, góa ka-kī chi̍t ê tam-tng bōe khí.

¹⁰ Siōng Chú — lín ê Siōng-tè hō͘ lín jîn-kháu ke-thiⁿ, kàu kin-á-ji̍t chhin-chhiūⁿ thiⁿ-téng ê chhiⁿ hiah chōe.

¹¹ Goān Siōng Chú — lín lia̍t-chó͘ ê Siōng-tè chiàu I tùi lín ê èng-ún sù-hok lín, hō͘ lín ê jîn-kháu ke-thiⁿ chheng pē.

¹² Koán-lí lín ê tāng-tàⁿ kap chek-jīm, í-ki̍p chhú-lí lín ê sò͘-siōng, góa ka-kī chi̍t ê ná tam-tng ōe khí?

¹³ Lín tio̍h tùi ta̍k chi-cho̍k kéng ū tì-hūi, ū châi-lêng, ū keng-giām ê lâng, góa chiū siat-li̍p in chòe lín ê léng-siù.”

¹⁴ Lín ìn góa kóng, “Lí kóng beh chòe ê tāi-chì chin hó.”

¹⁵ Góa chiū chiong lín ta̍k chi-cho̍k soán--chhut-lâi ū tì-hūi, ū keng-giām ê lâng, siat-li̍p in chòe koán-lí lín ê léng-siù, ū-ê koán chi̍t-chheng lâng, ū-ê koán chi̍t-pah lâng, ū-ê koán gō͘-cha̍p lâng, ū-ê koán cha̍p lâng, koh siat-li̍p kî-tha ê koaⁿ-oân.

¹⁶ Tng-sî góa hoan-hù lín ê sím-phòaⁿ-koaⁿ, kóng, “Lín chhâi-koat sio-kò ê sū, bô-lūn sī tông-pau tiong-kan ê àn-kiāⁿ, á-sī kap tòa tī lín tiong-kan ê gōa-cho̍k-lâng ê àn-kiāⁿ, tio̍h chiàu kong-tō phòaⁿ-koat.

¹⁷ Lín chhâi-koat ê sî, m̄-thang phian-thán, sio-kò ê lâng bô-lūn sī chun-kùi á-sī pi-bî lóng tio̍h kong-pêng tùi-thāi. M̄-thang kiaⁿ jīm-hô-lâng, in-ūi lín sī thòe Siōng-tè sím-phòaⁿ. Khùn-lân kái-koat ê àn-kiāⁿ, tio̍h sàng-lâi góa chia, góa ōe chhâi-koat.”

¹⁸ Hit-sî, góa mā chiong lín eng-kai chòe ê sū lóng kā lín hoan-hù.

Phài Lâng Thàm-cha Ka-lâm-tōe
( Bîn 13.1-33 )

¹⁹ Lán chiàu Siōng Chú — lán ê Siōng-tè ê bēng-lēng, tùi Hô-lia̍t-soaⁿ chhut-hoat, keng-kè lín só͘ khòaⁿ--tio̍h hit-ê khoah koh thang-kiaⁿ ê khòng-iá, kiâⁿ ǹg A-mô͘-lī-lâng ê soaⁿ-khu. Lán kàu Ka-te-su Pa-nî-a ê sî,

²⁰ góa kā lín kóng, “Lín í-keng kàu Siōng Chú — lán ê Siōng-tè siúⁿ-sù hō͘ lán ê A-mô͘-lī-lâng ê soaⁿ-tōe.

²¹ Taⁿ, Siōng Chú í-keng chiong hit-ê tōe sù hō͘ lín, lín tio̍h chiàu Siōng Chú — lín lia̍t-chó͘ ê Siōng-tè tùi lín ê èng-ún, chiūⁿ-khì sêng-chiap hit-ê tōe; m̄-thang kiaⁿ, m̄-thang lún.”

²² Hit-sî lín lóng lâi góa chia, kā góa kóng, “Lán tio̍h phài lâng seng khì thàm-cha hit-ê tōe, kā lán pò-kò, khòaⁿ lán tio̍h tùi tó chi̍t tiâu lō͘, tó chi̍t ê siâⁿ ji̍p--khì.”

²³ Góa khòaⁿ án-ni chòe chin hó, chiū tùi lín tiong-kan kéng cha̍p-jī ê lâng, múi chi̍t chi-cho̍k chi̍t ê.

²⁴ In chiū chhut-hoat chiūⁿ soaⁿ-khu, khì Í-si̍t-kok Soaⁿ-kok thàm-cha.

²⁵ In tòa hit só͘-chāi ê ké-chí tńg-lâi lán chia, kā lán pò-kò, kóng, “Siōng Chú — lán ê Siōng-tè siúⁿ-sù hō͘ lán--ê, sī chin súi ê tōe.”

²⁶ M̄-kú lín ûi-pōe Siōng Chú — lín ê Siōng-tè ê bēng-lēng, m̄-khéng ji̍p-khì hit-ê tōe,

²⁷ koh tī lín ê pò͘-pîⁿ lāi bâi-oàn kóng, “In-ūi Siōng Chú oàn-hūn lán, só͘-í chhōa lán chhut Ai-ki̍p-tōe, beh chiong lán kau hō͘ A-mô͘-lī-lâng, kā lán châu-bia̍t.

²⁸ Taⁿ lán sī beh khì sím-mi̍h khoán só͘-chāi? Lán ê hiaⁿ-tī hō͘ lán sit-chì; in kā lán kóng, ‘Hia ê jîn-bîn pí lán khah ióng khah lò, siâⁿ khoah-tōa koh kian-kò͘, koân kàu tú-thiⁿ; goán koh tī hia khòaⁿ-tio̍h A-la̍p-cho̍k ê lâng.’”

²⁹ Góa chiū kā lín kóng, “M̄-bián kiaⁿ, mā m̄-bián lún in.

³⁰ Kiâⁿ tī lín thâu-chêng ê Siōng Chú — lín ê Siōng-tè ōe ūi lín kau-chiàn, chhin-chhiūⁿ I tī Ai-ki̍p ūi-tio̍h lín só͘ chòe--ê kâng-khoán.

³¹ Lín tī khòng-iá teh kiâⁿ ê sî, ū khòaⁿ-kìⁿ Siōng Chú — lín ê Siōng-tè án-chóaⁿ kā lín iúⁿ-chhī chiàu-kò͘, chhin-chhiūⁿ lâng teh ióng-io̍k kiáⁿ-jî, ti̍t-kàu lín lâi kàu chit-ê só͘-chāi.”

³² Sui-jiân án-ni, lín m̄ sìn Siōng Chú — lín ê Siōng-tè;

³³ I chi̍t-lō͘ kiâⁿ tī lín ê thâu-chêng, kā lín chhē an-iâⁿ ê só͘-chāi; mî--sî ēng hé, ji̍t--sî ēng hûn, chí-sī lín tio̍h kiâⁿ ê lō͘.

Siōng Chú Hêng-hoa̍t Í-sek-lia̍t-lâng
( Bîn 14.20-45 )

³⁴ Siōng Chú thiaⁿ-tio̍h lín bâi-oàn ê siaⁿ chiū siū-khì, li̍p-sè kóng,

³⁵ “Chit-ê pháiⁿ sè-tāi ê lâng choa̍t-tùi bô chi̍t ê ōe-tàng khòaⁿ-tio̍h góa só͘ li̍p-sè èng-ún siúⁿ-sù lín lia̍t-chó͘ chit-tè súi ê tōe;

³⁶ chí-ū Iâ-hu-nî ê kiáⁿ Ka-le̍k ōe-tàng khòaⁿ--tio̍h; koh góa beh chiong i ta̍h--kè ê tōe sù hō͘ i kap i ê kiáⁿ-sun, in-ūi i choan-sim sìn-khò Siōng Chú.”

³⁷ Siōng Chú mā in-ūi lín ê iân-kò͘ tùi góa siū-khì, kóng, “Lí mā bōe-tàng ji̍p-khì hit-tè thó͘-tōe;

³⁸ kun-sûi lí ê Lūn ê kiáⁿ Iok-su-a ōe ji̍p--khì; lí tio̍h kā i kó͘-lē, in-ūi i beh chhōa Í-sek-lia̍t-lâng ji̍p-khì sêng-chiap hit-ê tōe.”

³⁹ Siōng Chú koh kóng, “Lín ê gín-á, chiū-sī lín teh siūⁿ ōe hō͘ lâng lia̍h--khì, kin-á-ji̍t iáu bōe-hiáu hun-pia̍t hó-pháiⁿ ê kiáⁿ-jî, ōe ji̍p-khì hia; góa beh chiong hit-ê tōe sù hō͘ in chòe sán-gia̍p.

⁴⁰ Lín leh, lín tio̍h oa̍t tò-tńg, ǹg Âng-hái ê hong-hiòng khì khòng-iá.”

⁴¹ Lín hôe-tap góa, kóng, “Goán ū tek-chōe Siōng Chú; taⁿ goán beh chiàu Siōng Chú — goán ê Siōng-tè ê bēng-lēng chiūⁿ-khì kau-chiàn.” Lín ta̍k-ê lâng chiū tōa-chú-tōa-ì, tòa kun-khì chiūⁿ-khì soaⁿ-khu.

⁴² Siōng Chú kā góa kóng, “Lí tio̍h kiò in m̄-thang chhut--khì, m̄-thang khì kau-chiàn, in-ūi góa bô kap lín tông-chāi, chiah bián lín thâi-su tùi-te̍k.”

⁴³ Góa chiū kā lín kóng, m̄-kú lín m̄ thiaⁿ, pōe-ge̍k Siōng Chú ê bēng-lēng, tōa-chú-tōa-ì peh-chiūⁿ soaⁿ-khu.

⁴⁴ Tòa tī hia ê A-mô͘-lī-lâng chiū chhut-lâi kong-kek lín, chhin-chhiūⁿ phang kā lín tui-kóaⁿ, tī Í-tong soaⁿ-khu ê Hô-ní-má kā lín phah-pāi.

⁴⁵ Lín chiū koh tī Siōng Chú ê bīn-chêng thî-khàu, m̄-kú Siōng Chú m̄ thiaⁿ lín ê siaⁿ, bô beh chhap lín.

⁴⁶ Lín chiū tī Ka-te-su tòa chi̍t tōaⁿ chin kú ê sî-kan.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan