Bìoball air-loidhne

Ngá-kok-su 3 - 現代台語譯本羅馬字版

Khòng-chè Chhùi-chi̍h

¹ Hiaⁿ-tī chí-bē, lín tiong-kan m̄-thang ū chin chōe lâng choh kàu-su. Lán chai, lán choh kàu-su ê lâng ōe siū khah giâm-keh ê sím-phòaⁿ.

² In-ūi lán tāi-ke lóng siông-siông hoān chin chōe chhò-gō͘; kóng-ōe bô chhò-gō͘--ê sī oân-choân ê lâng, i ōe-hiáu khòng-chè ka-kī.

³ Lán ēng bé-kā-kiuⁿ tàu tī bé ê chhùi--ni̍h, hō͘ in sûn-ho̍k, thang khòng-chè kui-chiah bé ê hêng-tōng.

⁴ Koh khòaⁿ, chûn sui-jiân hiah tōa chiah, hō͘ tōa-hong chhe, phah, chí-ū ēng chi̍t ki sòe-sòe ê chûn-tōa kā i khòng-chè, sái-chûn ê lâng chiū ōe-tàng chiàu ka-kī ê ì-sù sái.

⁵ Chhin-chhiūⁿ án-ni, chhùi-chi̍h sī sòe ê khì-koan, iáu-kú ōe kóng tōa-ōe. Koh siūⁿ-khòaⁿ leh, chi̍t-tiám-á hé-chhiⁿ mā ōe hō͘ kui-ê chhiū-nâ lóng sio--khì.

⁶ Chhùi-chi̍h sī hé. Tī lán ê chi-thé tiong, chhùi-chi̍h sī siâ-ok ê sè-kài, ōe ù-jiám lán kui seng-khu. Chit-ê hé sī tùi tōe-ge̍k tiám-to̍h--ê, ōe hō͘ lâng kui-ê jîn-seng sio-bia̍t.

⁷ Lâng ōe-tàng chè-ho̍k ta̍k-chióng iá-siù, pe-chiáu, thâng-thōa, kap hî-lūi; kî-si̍t mā í-keng kā in lóng chè-ho̍k lah.

⁸ M̄-kú, bô lâng ōe-tàng chè-ho̍k chhùi-chi̍h; chhùi-chi̍h sī bô lâng khòng-chè ōe tiâu ê siâ-ok, chhiong-móa tì-miā ê to̍k.

⁹ Lán ēng chhùi-chi̍h o-ló Chú lán ê Pē, mā ēng chhùi-chi̍h chiù-chó͘ chiàu Siōng-tè ka-kī ê hêng-siōng só͘ chō ê lâng.

¹⁰ Kám-siā kap chiù-chó͘ ê ōe lóng tùi kâng chi̍t ê chhùi chhut. Hiaⁿ-tī chí-bē, án-ni sī bô eng-kai!

¹¹ Tùi kâng chi̍t ê chôaⁿ-goân kiám ōe chhèng-chhut tiⁿ--ê kap khó͘ ê chúi!

¹² Hiaⁿ-tī chí-bē, bû-hoa-kó-chhiū kiám ōe siⁿ kaⁿ-ná? Phû-tô-chhiū kiám ōe siⁿ bû-hoa-kó? Kiâm ê chúi-goân mā bōe chhut tiⁿ ê chúi!

Tùi Téng-bīn Lâi ê Tì-hūi

¹³ Lín tiong-kan sím-mi̍h-lâng ū tì-hūi, ū kiàn-sek? Nā ū, tio̍h ēng khiam-pi kap tì-hūi, thong-kè ka-kī ê hó phín-hēng piáu-hiān--chhut-lâi.

¹⁴ Lín sim-lāi nā ū ok-to̍k, oàn-tò͘, kap chū-su, chiū m̄-thang khoa-kháu, kóng pe̍h-chha̍t tí-te̍k chin-lí.

¹⁵ Chit-khoán tì-hūi m̄-sī tùi thiⁿ-téng lâi--ê, sī sio̍k tōe-chiūⁿ, sio̍k hiat-khì, sio̍k Mô͘-kúi.

¹⁶ In-ūi ū oàn-tò͘ kap chū-su chiū ū hūn-loān kap ta̍k-hāng pháiⁿ hêng-ûi.

¹⁷ Tùi téng-bīn lâi ê tì-hūi, thâu chi̍t hāng sī sûn-kiat, koh-lâi sī hô-pêng, un-hô, ū tō͘-liōng, chhiong-móa chû-pi, koh gâu kiat hó ké-chí, bô phian-su, bô hu-ké.

¹⁸ Kong-gī sī chhiok-chìn hô-pêng ê lâng ēng hô-pêng iā ê chéng-chí só͘ kiat ê ké-chí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan