Bìoball air-loidhne

Ngá-kok-su 2 - 現代台語譯本羅馬字版

M̄-thang Ū Phian-kiàn

¹ Góa ê hiaⁿ-tī chí-bē, kì-jiân lín sìn lán êng-kng ê Chú Iâ-so͘ Ki-tok, tio̍h m̄-thang ēng gōa-piáu tùi-thāi lâng.

² Nā ū chi̍t ê kòa kim chhiú-chí, chhēng súi-saⁿ ê hó-gia̍h-lâng ji̍p-lâi lín ê hōe-tn̂g, koh ū chi̍t ê chhēng phòa-saⁿ ê sàn-chhiah-lâng ji̍p--lâi,

³ lín kan-ta chù-ì hit-ê chhēng súi-saⁿ--ê, tùi i kóng “Chhiáⁿ lâi chē tōa-ūi”, tùi hit-ê sàn-chhiah-lâng kóng “Lí khiā tiàm hia”, á-sī kóng “Chē góa ê kha-tiam piⁿ”,

⁴ án-ni lín kiám m̄-sī phian-sim, ēng pháiⁿ ê tōng-ki teh phòaⁿ-toàn lâng?

⁵ Chhin-ài ê hiaⁿ-tī chí-bē, tio̍h thiaⁿ! Siōng-tè ū kéng-soán sè-kan ê sàn-chhiah-lâng, hō͘ in tī sìn-gióng siōng hù-chiok, thang sêng-chiap I èng-ún hō͘ thiàⁿ I ê lâng ê Kok-tō͘.

⁶ M̄-kú lín bú-jio̍k sàn-chhiah-lâng! Ap-pek lín, thoa lín chiūⁿ hoat-têng--ê, kiám m̄-sī hiah-ê hó-gia̍h-lâng?

⁷ In chiah sī húi-pòng lín só͘ niá-siū chun-kùi ê miâ hiah-ê lâng!

⁸ Lín nā chun-thàn Sèng-keng só͘ kì-chài “Tio̍h thiàⁿ chhù-piⁿ chhin-chhiūⁿ thiàⁿ ka-kī” hit-ê Siōng-tè-kok ê Lu̍t-hoat, án-ni chiū tio̍h.

⁹ M̄-kú lín nā khòaⁿ gōa-piáu tùi-thāi lâng chiū-sī hoān-chōe, siū Lu̍t-hoat phòaⁿ-chòe hoān-hoat.

¹⁰ Lâng nā bô siú Lu̍t-hoat tiong ê chi̍t tiâu kài-bēng, chiū-sī bô siú choân-pō͘ ê Lu̍t-hoat.

¹¹ In-ūi Hit-ūi bēng-lēng “M̄-thang hoān kan-îm” ê, mā kóng “M̄-thang hāi-sí lâng”. Sui-jiân lí bô hoān kan-îm, lí nā hāi-sí lâng chiū-sī ûi-hoān Lu̍t-hoat.

¹² Kì-jiân lín teh-beh siū hō͘ lâng chū-iû ê Lu̍t-hoat sím-phòaⁿ, tio̍h chiàu Lu̍t-hoat ê iau-kiû kóng-ōe, chòe tāi-chì.

¹³ In-ūi, bô ēng chû-pi tùi-thāi lâng--ê, tī Sím-phòaⁿ ê sî, Siōng-tè bōe ēng chû-pi tùi-thāi i; chû-pi iâⁿ-kè sím-phòaⁿ.

Sìn-sim kap Hêng-ûi

¹⁴ Hiaⁿ-tī chí-bē, nā ū lâng kóng i ū sìn, m̄-kú bô ēng hêng-ûi lâi chèng-bêng, ū siáⁿ lō͘-ēng? Hit-khoán ê sìn kiám ōe kiù i?

¹⁵ Lín tiong-kan nā ū hiaⁿ-tī á-sī chí-bē bô saⁿ thang chhēng, saⁿ-tǹg bô thang chia̍h,

¹⁶ lín kan-ta tùi in kóng, “Chiok lín pêng-an, tio̍h chhēng hō͘ sio, chia̍h hō͘ pá!” M̄-kú bô kiong-kip in jio̍k-thé só͘ su-iàu ê mi̍h, ū siáⁿ lō͘-ēng?

¹⁷ Só͘-í, chí-ū sìn-sim, nā bô hêng-ûi, sī sí--ê.

¹⁸ M̄-kú ū lâng beh kóng, “Lí ū sìn-sim, góa ū hêng-ûi; chhiáⁿ lí hō͘ góa khòaⁿ bô hêng-ûi ê sìn-sim, góa chiū ēng hêng-ûi hō͘ lí khòaⁿ góa ê sìn-sim.”

¹⁹ Lí sìn Siōng-tè chí-ū chi̍t ūi, án-ni chin tio̍h; liân kúi mā sìn, sīm-chì kiaⁿ kah phi̍h-phi̍h-chhoah.

²⁰ Lí ná bōe-hiáu siūⁿ, lí ài-beh chai--bô? Bô hêng-ûi ê sìn-sim bô lō͘-ēng.

²¹ Lán ê chó͘-sian A-pek-la-hán hiàn ka-kī ê kiáⁿ Í-sat tī chè-tôaⁿ téng, kiám m̄-sī tùi chit-ê hêng-ûi hō͘ Siōng-tè kā i chheng-chòe gī-lâng?

²² Khó-kiàn, sìn-sim kap i ê hêng-ûi chòe-hé ūn-chok; sìn-sim thong-kè hêng-ûi chiah oân-chéng.

²³ Che sī èng-giām Sèng-keng só͘ kóng, “A-pek-la-hán sìn Siōng-tè, in-ūi án-ni, Siōng-tè chiū kā i sǹg-chòe gī”; i mā chheng-chòe Siōng-tè ê pêng-iú.

²⁴ Khó-kiàn, lâng siū chiap-la̍p chòe gī-lâng sī tùi hêng-ûi, m̄-sī kan-ta tùi sìn.

²⁵ Ki-lú Lat-ha̍p ê chêng-hêng mā-sī án-ni. I chiap-la̍p Í-sek-lia̍t-lâng ê sù-chiá, pang-chān in tùi pa̍t-tiâu lō͘ tô-cháu, án-ni i kiám m̄-sī tùi hêng-ûi siū chiap-la̍p chòe gī-lâng?

²⁶ Seng-khu bô khùi sī sí--ê; sìn-sim bô hêng-ûi mā-sī sí--ê.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan