Bìoball air-loidhne

Ngá-kok-su 1 - 現代台語譯本羅馬字版

¹ Góa Ngá-kok sī Siōng-tè kap Chú Iâ-so͘ Ki-tok ê po̍k-jîn, beh kā só͘-ū hun-sòaⁿ tī ta̍k só͘-chāi Siōng-tè ê chú-bîn chhéng-an.

Sìn-sim kap Tì-hūi

² Hiaⁿ-tī chí-bē, lín tú-tio̍h ta̍k-khoán chhì-liān ê sî, tio̍h siūⁿ-chòe sī thang hoaⁿ-hí ê tāi-chì,

³ in-ūi chai-iáⁿ lín ê sìn-sim keng-kè khó-giām ōe sán-seng jím-nāi.

⁴ Lín tio̍h jím-nāi kàu lō͘-bé chiah ōe-tàng ta̍t-kàu oân-choân koh oân-chéng, lóng bô khoat-tiám.

⁵ Lín tiong-kan nā ū lâng khiàm-kheh tì-hūi, tio̍h tùi Siōng-tè kî-kiû, I ōe sù hō͘ lín, in-ūi Siōng-tè ōe chin khóng-khài bô pó-liû sù hō͘ lóng-chóng ê lâng.

⁶ Put-kò, lín tio̍h khò sìn-sim kî-kiû, m̄-thang giâu-gî; giâu-gî ê lâng chhin-chhiūⁿ hái-éng hō͘ hong sàu, khí-khí-lo̍h-lo̍h.

^7-8 Chit-khoán lâng sam-sim-lióng-ì, só͘ chòe bô tēng-sèng, bián siūⁿ-beh tùi Chú tit-tio̍h sím-mi̍h.

Sàn-chhiah kap Hù-jū

⁹ Sàn-chhiah ê hiaⁿ-tī chí-bē tit-tio̍h Siōng-tè thê-seng, tio̍h hoaⁿ-hí;

¹⁰ hù-jū ê lâng siū Siōng-tè kàng-kē, mā tio̍h hoaⁿ-hí. Hù-jū ê lâng ōe chhin-chhiūⁿ chháu hoe siā--khì.

¹¹ Ji̍t-thâu chi̍t-ē chhut, sio-hong chi̍t-ē chhe, chháu ta--khì, hoe siā--khì, i ê súi chiū siau-sit. Hù-jū ê lâng mā-sī án-ni, ōe tī bô-êng phun-pho ê tiong-kan siau-sit.

Chhì-liān kap Ín-iú

¹² Jím-siū chhì-liān ê lâng chin ū hok-khì; in-ūi i ū keng-kè khó-giām, ōe niá-siū Siōng-tè èng-ún hō͘ thiàⁿ I ê lâng oa̍h-miā ê hoa-koan.

¹³ Lâng siū ín-iú ê sî, m̄-thang kóng “Góa hō͘ Siōng-tè ín-iú”, in-ūi Siōng-tè bōe siū siâ-ok iú-he̍k, I ka-kī mā bōe ín-iú lâng.

¹⁴ Lâng siū ín-iú, sī hō͘ ka-kī ê io̍k-bōng ín-iú hām-hāi.

¹⁵ Io̍k-bōng hoâi-īn chiū siⁿ-chhut chōe-ok; chōe-ok sêng-se̍k chiū sán-seng sí-bông.

¹⁶ Chhin-ài ê hiaⁿ-tī chí-bē, m̄-thang siū khi-phiàn.

¹⁷ It-chhè bí-hó ê siúⁿ-sù kap it-chhè oân-choân ê un-sù sī tùi thiⁿ-téng kng-bêng ê Goân-thâu só͘ sù. I bô kái-piàn, mā bô thian-thé tńg-se̍h ín-khí ê iáⁿ.

¹⁸ I chiàu ka-kī ê chí-ì ēng chin-lí ê tō lâi chō lán, hō͘ lán tī siū-chō ê bān-mi̍h tiong ū siōng tiōng-iàu ê tōe-ūi.

Thiaⁿ kap Si̍t-hêng

¹⁹ Chhin-ài ê hiaⁿ-tī chí-bē, tio̍h chai! Ta̍k-ê lâng tio̍h kip beh thiaⁿ; m̄-thang kip beh kóng; m̄-thang kip beh siū-khì;

²⁰ in-ūi lâng ê siū-khì bōe-tàng si̍t-hiān Siōng-tè kong-gī ê iau-kiû.

²¹ Só͘-í, tio̍h siau-tû it-chhè lâ-sâm ê si̍p-koàn kap koàn-boán ê siâ-ok; tio̍h ēng un-jiû ê sim chiap-la̍p hit-ê chèng tī lín sim-lāi ōe-tàng kiù lín ê tō.

²² Tio̍h si̍t-hêng tō-lí, m̄-thang phiàn ka-kī kóng kan-ta thiaⁿ tō-lí chiū hó.

²³ Nā ū lâng thiaⁿ tō-lí bô si̍t-hêng, i chhin-chhiūⁿ lâng chiò-kiàⁿ khòaⁿ ka-kī ê bīn-siòng,

²⁴ siông-sè khòaⁿ liáu-āu, chi̍t-ē lī-khui, sûi-sî bōe-kì-tit ka-kī siⁿ-chòe siáⁿ-khoán.

²⁵ M̄-kú ū teh siông-sè chhâ-khó hō͘ lâng tit-tio̍h chū-iû hit-ê oân-chéng ê Lu̍t-hoat, koh ū teh kian-siú ê lâng, i ê só͘-chòe it-tēng ōe tit-tio̍h Siōng-tè sù-hok, in-ūi i ū si̍t-chāi khì si̍t-hêng, m̄-sī thiaⁿ-liáu chiū bōe-kì--tit.

²⁶ Nā ū lâng siūⁿ-kóng ka-kī chin kèng-khiân, m̄-kú bô khòng-chè ka-kī ê chhùi-chi̍h, sī teh khi-phiàn ka-kī, chit-ê lâng ê kèng-khiân lóng bô lō͘-ēng.

²⁷ Chiàu-kò͘ khó͘-lān tiong ê ko͘-jî kóaⁿ-hū, koh pó-siú ka-kī bô jiám-tio̍h sè-sio̍k ê hú-pāi, tùi Pē Siōng-tè khòaⁿ--khí-lâi, che chiah sī sûn-choân bô khoat-tiám ê kèng-khiân.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan