Bìoball air-loidhne

Ngá-ko 8 - 現代台語譯本羅馬字版

¹ Lí nā-sī góa ê hiaⁿ-tī, suh-kè goán lāu-bú ê lin, m̄-chai jōa hó! Án-ni, góa tī gōa-bīn tú-tio̍h lí, kap lí chim-chhùi, chiū bô lâng ōe khòaⁿ-khin góa.

² Góa ōe chhōa lí ji̍p-khì goán lāu-bú ê chhù, i ōe kà-sī góa; góa ōe hō͘ lí lim tiâu-hô ê chiú kap sia̍h-liû ê chiap.

³ Lí ēng tò-chhiú hû góa ê thâu-khak, ēng chiàⁿ-chhiú lám góa.

⁴ Iâ-lō͘-sat-léng ê cha-bó͘ gín-á ah, góa khún-chhiat kā lín hoan-hù, m̄-thang phah-chhíⁿ, m̄-thang kiáu-jiáu goán ê ài-chêng, kàu goán hoaⁿ-hí boán-chiok.

Tē-la̍k Siú (Iâ-lō͘-sat-léng ê Cha-bó͘ Gín-á)

⁵ Tùi khòng-iá chiūⁿ--lâi, the tī i chhin-ài--ê ê seng-khu hit-ê sī siáⁿ-lâng? Góa tī phōng-kó-chhiū kha kā lí kiò-chhíⁿ; lí ê lāu-bú tī hia hoâi-īn, tī hia keng-kè chhui-chūn ê thòng-khó͘ siⁿ lí.

(Lú)

⁶ Hō͘ góa chhin-chhiūⁿ ìn, khàm tī lí ê sim-lāi; chhin-chhiūⁿ ìn, tǹg tī lí ê chhiú-kut. In-ūi ài-chêng chhin-chhiūⁿ sí hiah-ni̍h ū-la̍t, chêng-jia̍t chhin-chhiūⁿ Im-hú hiah-ni̍h kiông-lia̍t, só͘ hoat-chhut ê iām-jia̍t chhin-chhiūⁿ hé-iām, chhin-chhiūⁿ ke̍k béng-lia̍t ê hé-iām.

⁷ Tōa-chúi bōe-tàng phah-hoa ài-chêng; khoe-chúi bōe-tàng kā i siau-bia̍t. Lâng nā ēng i só͘-ū ê châi-sán lâi bóe ài-chêng, it-tēng hō͘ lâng biáu-sī.

(Lú ê Hiaⁿ-tī)

⁸ Goán ū chi̍t ê sòe-hàn sió-bē, i ê lin iáu-bē hoat-io̍k sêng-se̍k; lâng lâi thê-chhin, goán tio̍h án-chóaⁿ kā i siat-hoat?

⁹ I nā-sī chhiûⁿ, goán beh tī i ê téng-bīn khí gûn-thah; i nā-sī mn̂g, goán beh ēng pek-hiuⁿ-chhâ-pán kā i ûi--khí-lâi.

(Lú)

¹⁰ Góa sī chhiûⁿ, góa ê lin chhin-chhiūⁿ nn̄g ê thah; góa chhin-ài--ê chi̍t-ē khòaⁿ-tio̍h góa, chiū sim-móa-ì-chiok.

(Lâm)

¹¹ Só͘-lô-bûn tī Pa-le̍k Hap-bûn ū chi̍t khu phû-tô-hn̂g; I chiong chit-khu phû-tô-hn̂g cho͘ hō͘ kò͘-siú ê lâng; in ta̍k-ê lâng ūi-tio̍h in ê ké-chí tio̍h la̍p chi̍t-chheng ê gûn.

¹² Góa ū phû-tô-hn̂g, sī góa ka-kī ê; Só͘-lô-bûn ah, hit chi̍t-chheng lí the̍h--khì, nn̄g-pah hō͘ kò͘-siú ké-chí ê lâng.

¹³ Tiàm tī hn̂g-lāi ê cha-bó͘ gín-á ah, tâng-phōaⁿ lóng teh thiaⁿ lí ê siaⁿ, lí mā hō͘ góa thiaⁿ--chi̍t-ē.

(Lú)

¹⁴ Góa chhin-ài--ê ah, kóaⁿ-kín lâi, chhin-chhiūⁿ lêng-iûⁿ, chhin-chhiūⁿ lo̍k-á, lâi kàu chhèng-chhut phang-bī ê soaⁿ!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan