Bìoball air-loidhne

Ngá-ko 6 - 現代台語譯本羅馬字版

(Iâ-lō͘-sat-léng ê Cha-bó͘ Gín-á)

¹ Lí chit-ê cha-bó͘ gín-á tiong siōng-súi--ê ah, lí chhin-ài--ê khì tó-ūi? Lí chhin-ài--ê oa̍t-tńg khì tó-ūi? Goán thang kap lí chòe-hé khì chhē.

(Lú)

² Góa chhin-ài--ê lo̍h-khì i ê hn̂g, khì chhèng-chhut phang-bī ê hoe-hn̂g; i tī hn̂g-lāi chhī iûⁿ, koh bán pek-ha̍p-hoe.

³ Góa sio̍k góa chhin-ài--ê, góa chhin-ài--ê mā sio̍k góa; i tī pek-ha̍p-hoe tiong teh chhī iûⁿ.

Tē-gō͘ Siú (Lâm)

⁴ Góa ê ài-jîn ah, lí súi chhin-chhiūⁿ Tek-sat, khó-ài chhin-chhiūⁿ Iâ-lō͘-sat-léng, ui-gî chhin-chhiūⁿ gia̍h tōa-kî ê kun-tūi.

⁵ Lí ê ba̍k-chiu m̄-thang khòaⁿ góa, in-ūi ōe toa̍t góa ê sim. Lí ê thâu-mn̂g chhin-chhiūⁿ kui-kûn ê soaⁿ-iûⁿ, tùi Ki-lia̍t ê soaⁿ-phiâⁿ tiô--lo̍h-lâi.

⁶ Lí ê chhùi-khí chhin-chhiūⁿ kui-kûn ê iûⁿ-bú, sóe chheng-khì tùi chúi--ni̍h peh--khí-lâi; ta̍k-chiah lóng siⁿ siang-siⁿ, bô chi̍t chiah phah-sńg.

⁷ Lí ê pìn-piⁿ tī phè ê lāi-bīn, chhin-chhiūⁿ peh-khui ê sia̍h-liû.

⁸ Chiū-sī-kóng ū la̍k-cha̍p ê ông-hō͘, poeh-cha̍p ê pîn-hui, koh ū sǹg bōe liáu ê kiong-lú,

⁹ lí sī góa î-it sûn-choân ê hún-chiáu, sī lāu-bú to̍k-siⁿ, te̍k-pia̍t thiàⁿ-sioh ê cha-bó͘-kiáⁿ. Cha-bó͘ gín-á khòaⁿ--tio̍h, lóng kóng i ū hok-khì; ông-hō͘ pîn-hui mā chheng-chàn i.

¹⁰ Kong-chhái chhin-chhiūⁿ chheng-chá ê kng, súi chhin-chhiūⁿ ge̍h, chhàn-lān chhin-chhiūⁿ ji̍t, ui-gî chhin-chhiūⁿ gia̍h tōa-kî ê kun-tūi, hit-ê sī siáⁿ-lâng?

¹¹ Góa lo̍h-khì hu̍t-thô-hn̂g, beh khòaⁿ soaⁿ-kok tiong ê ké-chí, khòaⁿ phû-tô hoat-íⁿ á bē, sia̍h-liû khui-hoe á bē.

¹² Put-ti-put-kak, góa ná chhin-chhiūⁿ chē tī chun-kùi ê lâng ê bé-chhia téng.

(Iâ-lō͘-sat-léng ê Cha-bó͘ Gín-á)

¹³ Thiàu ah, Su-la-bi̍t, thiàu! Se̍h--kè-lâi, se̍h--kè-khì, hō͘ goán khòaⁿ lí teh thiàu-bú. Lín ná teh khòaⁿ Su-la-bi̍t, chhin-chhiūⁿ teh khòaⁿ nn̄g tūi ê peng thiàu-bú?

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan