Bìoball air-loidhne

Ngá-ko 5 - 現代台語譯本羅馬字版

(Lâm)

¹ Góa ê sió-bē, góa ê sin-niû ah, góa ū ji̍p-khì góa ê hn̂g-lāi, bán góa ê bu̍t-io̍h kap phang-liāu, chia̍h bi̍t-pô͘ kap bi̍t, lim góa ê chiú kap lin. Góa ê pêng-iú, lâi chia̍h, lâi lim; chīn-chêng lâi hióng-siū ài-chêng.

(Iâ-lō͘-sat-léng ê Cha-bó͘ gín-á) Tē-sì Siú (Lú)

² Góa teh khùn, m̄-kú sim iáu cheng-sîn. Thiaⁿ leh, góa chhin-ài--ê teh phah-mn̂g, kóng: Góa ê sió-bē, góa ê ài-jîn, góa sûn-choân ê hún-chiáu, kā góa khui-mn̂g; góa ê thâu-khak hō͘ lō͘-chúi tih-tâm, góa ê thâu-mn̂g tâm-lok-lok.

(Lâm) (Lú)

³ Góa í-keng thǹg-saⁿ, tio̍h koh chhēng o͘h? Góa í-keng sóe-kha, tio̍h koh phah lâ-sâm o͘h?

⁴ Góa chhin-ài--ê tùi mn̂g-phāng chhun-chhiú ji̍p--lâi; góa ê sim ūi-tio̍h i kek-tōng.

⁵ Góa khí--lâi, beh kā góa chhin-ài--ê khui-mn̂g; bu̍t-io̍h tùi góa ê siang-chhiú tih--lo̍h-khì, tùi chńg-thâu-á tih lo̍h-khì mn̂g-chhòaⁿ.

⁶ Góa kā góa chhin-ài--ê khui-mn̂g; m̄-kú góa só͘ ài--ê í-keng oa̍t-tńg-sin khì ah. I tú-chiah kóng ê ōe, hō͘ góa sîn-put-hū-thé. Góa chhē i, chhē bô; góa kiò i, i bô ìn.

⁷ Siâⁿ-lāi sûn-lô ê lâng tú-tio̍h góa, phah góa, siong góa; kò͘ siâⁿ-chhiûⁿ ê lâng chiong góa moa seng-khu ê kun chhiúⁿ--khì.

⁸ Iâ-lō͘-sat-léng ê cha-bó͘ gín-á ah, góa pài-thok lín, lín nā tú-tio̍h góa chhin-ài--ê, tio̍h kā i kóng: Góa in-ūi ài-chêng tì-pīⁿ.

(Iâ-lō͘-sat-léng ê Cha-bó͘ Gín-á)

⁹ Lí chit-ê cha-bó͘ gín-á tiong siōng-súi--ê ah, lí chhin-ài--ê, pí pa̍t-lâng chhin-ài--ê ū sím-mi̍h khah hó? Lí chhin-ài--ê, pí pa̍t-lâng chhin-ài--ê ū sím-mi̍h khah hó, ta̍t-tit goán tah-èng lí ê iau-kiû?

(Lú)

¹⁰ Góa chhin-ài--ê eng-chùn koh ióng-chòng, sī bān-lâng tiong ê tē-it.

¹¹ I ê thâu-khak ná sûn-kim; i ê thâu-mn̂g ām koh khiû, o͘ chhin-chhiūⁿ o͘-a.

¹² I ê ba̍k-chiu chhin-chhiūⁿ hioh tī khoe-piⁿ ê hún-chiáu, ēng lin sóe--kè, chhin-chhiūⁿ pó-chio̍h an-tì hó-sè.

¹³ I ê chhùi-phóe chhin-chhiūⁿ hoe-hn̂g chhèng-chhut phang-bī; i ê chhùi-tûn chhin-chhiūⁿ pek-ha̍p-hoe, tih-lo̍h chin phang ê bu̍t-io̍h.

¹⁴ I ê siang-chhiú chhin-chhiūⁿ kim ê koáiⁿ siuⁿ chhiⁿ-ge̍k; i ê seng-khu chhin-chhiūⁿ kng-ku̍t ê chhiūⁿ-gê siuⁿ nâ-pó-chio̍h.

¹⁵ I ê siang-kha chhin-chhiūⁿ tāi-lí-chio̍h ê thiāu, an-tì tī sûn-kim ê chō; i ê thé-keh hiông-úi chhin-chhiūⁿ Lê-pa-lūn, súi chhin-chhiūⁿ pek-hiuⁿ-chhiū.

¹⁶ I ê chhùi chin tiⁿ, lâng-lâng ì-ài. Iâ-lō͘-sat-léng ê cha-bó͘ gín-á ah, i chiū-sī góa chhin-ài--ê, sī góa ê ài-jîn.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan