Ngá-ko 2 - 現代台語譯本羅馬字版

¹ Góa sī Sa-lûn ê mûi-kùi-hoe, sī soaⁿ-kok ê pek-ha̍p-hoe.

(Lâm)

² Góa ê ài-jîn tī cha-bó͘ gín-á tiong, chhin-chhiūⁿ chhì-phè lāi ê pek-ha̍p-hoe.

(Lú)

³ Góa chhin-ài--ê tī ta-po͘ gín-á tiong, chhin-chhiūⁿ chhiū-nâ lāi ê phōng-kó-chhiū; góa chin ài chē tī i ê ìm-ńg-ē, i ê ké-chí góa chia̍h--khí-lâi chin tiⁿ.

⁴ I chhōa góa ji̍p iàn-se̍k-thiaⁿ, ēng ài-chêng ê kî khàm tī góa ê téng-bīn,

⁵ ēng phû-tô-koaⁿ-oân pó͘ góa ê la̍t, ēng phōng-kó chān góa ê goân-khì; góa ài i ài kah phòa-pīⁿ.

⁶ I ēng tò-chhiú hû góa ê thâu-khak, ēng chiàⁿ-chhiú lám góa.

⁷ Iâ-lō͘-sat-léng ê cha-bó͘ gín-á ah, góa kí lêng-iûⁿ kap chhân-iá ê lo̍k-bú, khún-chhiat kā lín hoan-hù, m̄-thang phah-chhíⁿ, m̄-thang kiáu-jiáu goán ê ài-chêng, kàu goán hoaⁿ-hí boán-chiok.

Tē-jī Siú (Lú)

⁸ Khòaⁿ leh, góa chhin-ài--ê lâi lah; i pôaⁿ-soaⁿ-kè-niá tiô-tiô-thiàu-thiàu teh lâi.

⁹ Góa chhin-ài--ê chhin-chhiūⁿ lêng-iûⁿ, chhin-chhiūⁿ lo̍k-á; lí khòaⁿ, i khiā tī chhiûⁿ-á gōa, tùi thang-á teh khòaⁿ, tùi thang-á-chí teh thàm.

¹⁰ Góa chhin-ài--ê chhut-siaⁿ tùi góa kóng: Góa ê ài-jîn, góa ê bí-jîn, khí--lâi, lán lâi-khì.

(Lâm)

¹¹ Tang-thiⁿ í-keng kè, hō͘ í-keng soah.

¹² Hoe khui móa piàn-tōe, chiáu-á chhiùⁿ-koa ê sî kàu lah, tī chhân-iá ū thiaⁿ-kìⁿ pan-kah ê siaⁿ.

¹³ Bû-hoa-kó chiām-chiām sêng-se̍k, phû-tô-chhiū khui-hoe hoat-chhut phang-bī; góa ê ài-jîn, góa ê bí-jîn, khí--lâi, lán lâi-khì.

¹⁴ Góa ê hún-chiáu ah, lí bih tī chio̍h-phāng lāi, tī soaⁿ-giâm ún-ba̍t ê só͘-chāi; kiû lí hō͘ góa khòaⁿ lí ê bīn, thiaⁿ lí ê siaⁿ; in-ūi lí ê siaⁿ un-hô, lí ê bīn chin súi.

¹⁵ Kā goán lia̍h hô͘-lî, hiah-ê sún-hoāi phû-tô-hn̂g ê sòe-chiah hô͘-lî; in-ūi goán ê phû-tô tú-á teh khui-hoe.

(Lú)

¹⁶ Góa chhin-ài--ê sī góa ê, góa mā-sī i ê; i tī pek-ha̍p-hoe tiong teh chhī iûⁿ.

¹⁷ Góa chhin-ài--ê ah, lí tio̍h tī ji̍t liâng-léng, iáⁿ chhun-tn̂g ê sî tńg--lâi, chhin-chhiūⁿ lêng-iûⁿ, chhin-chhiūⁿ lo̍k-á, tùi khâm-khia̍t ê soaⁿ-niá tò-tńg--lâi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan