Ngá-ko 1 - 現代台語譯本羅馬字版

Tē-it Siú

¹ Só͘-lô-bûn si-koa tiong ê si-koa.

(Lú)

² Lâi, ēng lí ê chhùi kā góa chim; lí ê ài-chêng pí chiú khah hó.

³ Lí ê phang-iû si̍t-chāi chin phang; lí ê miâ chhin-chhiūⁿ tò--chhut-lâi ê phang-iû; só͘-í, bô chi̍t ê cha-bó͘ gín-á bô ài lí.

⁴ Chhiáⁿ khan góa, lán kín lâi cháu! Ông ah, chhōa góa ji̍p-khì lí ê pâng-keng, lán lâi hoaⁿ-hí khoài-lo̍k; lí ê ài-chêng pí chiú khah hó, bo̍k-koài só͘-ū ê cha-bó͘ gín-á lóng ài lí.

⁵ Iâ-lō͘-sat-léng ê cha-bó͘ gín-á ah, góa o͘, m̄-kú siⁿ-chòe súi, chhin-chhiūⁿ Ki-ta̍t ê pò͘-pîⁿ, chhin-chhiūⁿ Só͘-lô-bûn ê tiùⁿ-lî.

⁶ M̄-thang in-ūi góa phê-hu o͘-o͘ ti̍t-ti̍t kā góa khòaⁿ, he sī ji̍t-thâu pha̍k--ê. Góa ê hiaⁿ-tī tùi góa siū-khì, kiò góa khì kò͘ phû-tô-hn̂g; góa soah bōe-tàng chiàu-kò͘ ka-kī ê hn̂g.

⁷ Góa sim-ài--ê ah, kā góa kóng, lí tī sím-mi̍h só͘-chāi teh chhī iûⁿ, tiong-tàu tī tó-ūi hō͘ iûⁿ hioh-khùn, góa chiah bián tī lí tâng-phōaⁿ ê iûⁿ-kûn tiong sì-kòe chhē lí.

(Lâm)

⁸ Cha-bó͘ gín-á tiong siōng-súi--ê ah, lí nā m̄ chai góa tī tó-ūi, tè iûⁿ-kûn ê kha-jiah khì, tī bo̍k-chiá ê pò͘-pîⁿ piⁿ chhī lí ê soaⁿ-iûⁿ-á.

⁹ Góa ê ài-jîn, góa khòaⁿ lí chhin-chhiūⁿ Hoat-ló chiàn-chhia ê bé.

¹⁰ Lí pìn-piⁿ ê chng-thāⁿ hō͘ lí ê bīn chin súi; lí ê ām-kún kòa chin-chu-liān chin hó-khòaⁿ.

¹¹ Goán beh kā lí chòe kim ê liān-á, siuⁿ gûn ê liú-á.

(Lú)

¹² Ông chē-toh ê sî, góa ê ná-ta̍t phang-iû chhèng-chhut phang-bī.

¹³ Góa chhin-ài--ê, lí sī chi̍t pau bu̍t-io̍h, kòa tī góa ê heng-chêng.

¹⁴ Góa chhin-ài--ê, lí sī chi̍t pha chńg-kah-hoe, tī Ún Ki-tí ê phû-tô-hn̂g lāi teh khui.

(Lâm)

¹⁵ Góa ê ài-jîn, lí chin súi, si̍t-chāi chin súi! Lí ê ba̍k-chiu chhin-chhiūⁿ hún-chiáu.

(Lú)

¹⁶ Góa chhin-ài--ê, lí chin eng-chùn, góa chin kah-ì! Lán ēng chhiⁿ-chhùi ê chháu-po͘ chòe chhn̂g-pho͘,

¹⁷ ēng pek-hiuⁿ-chhâ chòe chhù ê niû, chhêng-pek-chhâ chòe kak-á.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan