Bìoball air-loidhne

Lō͘-tek-kì 4 - 現代台語譯本羅馬字版

Pho-a-su Chhōa Lō͘-tek Chòe Bó͘

¹ Pho-a-su lâi siâⁿ-mn̂g-kháu, chē--lo̍h-khì; i só͘ kóng hit-ê chì-chhin tú-tú keng-kè. I chiū kóng, “Hiaⁿ-tī ah, chhiáⁿ kè-lâi chia chē.” Hit-ê lâng chiū oa̍t tńg-lâi chē.

² Pho-a-su koh chhiáⁿ siâⁿ-lāi cha̍p ê tiúⁿ-ló lâi, kā in kóng, “Chhiáⁿ chia chē.” In chiū chē--teh.

³ Pho-a-su chiū tùi chit-ê chì-chhin kóng, “Tùi Mô͘-ap-tōe tńg--lâi ê Ná-o-bí beh bōe lán ê hiaⁿ-tī Í-lī-bí-le̍k hit-tè tōe.

⁴ Góa siūⁿ góa tio̍h kā lí kóng, lí tio̍h tī chē tī chia ê lâng kap bîn-kan ê tiúⁿ-ló bīn-chêng bóe--tńg-lâi. Lí nā beh chīn gī-bū kā i bóe--tńg-lâi, chiū hō͘ lí bóe; nā m̄, tio̍h kā góa kóng, hō͘ góa chai. In-ūi bô lâng pí lí koh-khah ū koân thang bóe--tńg-lâi, koh-lâi chiah lûn-tio̍h góa.” Hit-ê lâng chiū kóng, “Góa beh chīn gī-bū kā bóe--tńg-lâi.”

⁵ Pho-a-su kóng, “Lí tùi Ná-o-bí ê chhiú bóe tōe ê sî, mā tio̍h chhōa sí--khì ê lâng ê bó͘ Mô͘-ap lú-chú Lō͘-tek chòe bó͘, thang thòe chit-ê sí--khì ê lâng ê ka-cho̍k pó-liû chit-tè thó͘-tōe.”

⁶ Chit-ê chì-chhin chiū kóng, “Nā án-ni góa m̄ bóe, chiah bián óng-hùi góa ka-kī ê sán-gia̍p. Niū lí bóe, hō͘ lí chīn gī-bū, góa bô beh bóe.”

⁷ Chiàu Í-sek-lia̍t kó͘-chá ê hong-sio̍k, lâng beh khak-tēng sio̍k-hôe á-sī kau-ōaⁿ sán-gia̍p ê chhiú-sio̍k, tio̍h thǹg ôe kau hō͘ tùi-hong. Í-sek-lia̍t-lâng ēng án-ni chòe ha̍p-iok ê chèng-kù.

⁸ Hit-ê chì-chhin chiū kā Pho-a-su kóng, “Hō͘ lí bóe.” I chiū thǹg ôe hō͘ Pho-a-su.

⁹ Jiân-āu, Pho-a-su tùi chèng tiúⁿ-ló kap só͘-ū ê lâng kóng, “Kin-á-ji̍t lín sī chèng-jîn, góa tùi Ná-o-bí ê chhiú bóe it-chhè sio̍k Í-lī-bí-le̍k, Má-lûn, kap Ki-liân ê sán-gia̍p.

¹⁰ Góa mā beh chhōa Má-lûn ê bó͘ Mô͘-ap lú-chú Lō͘-tek chòe bó͘, thang thòe sí--khì ê lâng pó-liû i ka-cho̍k ê sán-gia̍p, chiah bián i tùi ka-cho̍k kap pún-che̍k siū tû-miâ. Kin-á-ji̍t lín lóng sī chèng-jîn.”

¹¹ Só͘-ū tī siâⁿ-mn̂g-kháu ê lâng kap chèng tiúⁿ-ló lóng kóng, “Goán sī chèng-jîn. Goān Siōng Chú hō͘ lí chhōa ji̍p-mn̂g ê bó͘, chhin-chhiūⁿ Lúi-kiat kap Lē-a kiàn-li̍p Ngá-kok ê ke. Goān lí tī Í-hoat-tha chiâⁿ-chòe tōa châi-chú, tī Pek-lī-hêng ū hó miâ-siaⁿ.

¹² Goān lí ê ke, chiū-sī Siōng Chú thong-kè chit-ê lú-chú siúⁿ-sù lí ê hō͘-tāi, chhin-chhiūⁿ Tha-má kap Iû-tāi só͘ siⁿ Hoat-le̍k-su ê ke siâng-khoán.”

Tāi-pi̍t ê Ka-phó͘

¹³ Pho-a-su chiū chhōa Lō͘-tek chòe bó͘. Pho-a-su kap i tâng-pâng; Siōng Chú hō͘ i hoâi-īn, i chiū siⁿ chi̍t ê kiáⁿ.

¹⁴ Hū-jîn-lâng lóng lâi kā Ná-o-bí kóng, “Goān Siōng Chú tit-tio̍h chheng-chàn, in-ūi I kin-á-ji̍t hō͘ lí chi̍t ê ōe-tàng kè-sêng lí ê sán-gia̍p koh chiàu-kò͘ lí ê lâng. Goān chit-ê gín-á tī Í-sek-lia̍t ū hó miâ-siaⁿ.

¹⁵ Goān i hôe-ho̍k lí ê goân-khì, tī lí nî-lāu ê sî kā lí hōng-ióng, in-ūi i sī thiàⁿ lí ê sin-pū siⁿ--ê. Chit-ê sin-pū pí chhit ê kiáⁿ khah hó.”

¹⁶ Ná-o-bí chiū phō chit-ê gín-á tī heng-chêng, chhiâⁿ i tōa-hàn.

¹⁷ Chhù-piⁿ ê hū-jîn-lâng kóng, “Ná-o-bí tit-tio̍h chi̍t ê kiáⁿ lah.” In chiū kā i hō-miâ kiò-chòe Gô-pī-tek; i chiū-sī Iâ-se ê lāu-pē, Iâ-se sī Tāi-pi̍t ê lāu-pē.

¹⁸ Che sī Hoat-le̍k-su ê hō͘-tāi: Hoat-le̍k-su siⁿ Hi-su-lûn,

¹⁹ Hi-su-lûn siⁿ Lân, Lân siⁿ A-bí-ná-ta̍t,

²⁰ A-bí-ná-ta̍t siⁿ Ná-sūn, Ná-sūn siⁿ Sat-bûn,

²¹ Sat-bûn siⁿ Pho-a-su, Pho-a-su siⁿ Gô-pī-tek,

²² Gô-pī-tek siⁿ Iâ-se, Iâ-se siⁿ Tāi-pi̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan