Bìoball air-loidhne

Lō͘-tek-kì 3 - 現代台語譯本羅馬字版

Ná-o-bí ūi-tio̍h Lō͘-tek Chhē Kui-sio̍k

¹ Lō͘-tek ê ta-ke Ná-o-bí kā i kóng, “Cha-bó͘-kiáⁿ ah, góa eng-kai ūi-tio̍h lí chhē chi̍t ê hó ê kui-sio̍k, hō͘ lí ū ka-kī ê ke.

² Lí ōe-kì--tit-bô, kap lí chòe-hé choh-kang hiah-ê lú-kang ê thâu-ke Pho-a-su, sī lán ê chhin-chiâⁿ? Góa kā lí kóng, kim-mî i ōe tī ngó͘-kok-tiûⁿ pòa tōa-be̍h.

³ Lí tio̍h sóe seng-khu, boah phang-iû, chhēng súi-saⁿ, jiân-āu lo̍h-khì ngó͘-kok-tiûⁿ; m̄-kú hit-ê lâng chia̍h pá lim soah í-chêng, m̄-thang hō͘ i jīn--tio̍h.

⁴ I tó lo̍h-khì khùn ê sî, tio̍h khòaⁿ chheng-chhó i tó ê só͘-chāi, jiân-āu óa--khì, hian-khui i khàm kha ê gōa-phàu, tó tī i sin-piⁿ. I ōe kā lí kóng lí tio̍h chòe ê sū.”

⁵ Lō͘-tek ìn i kóng, “Lí kā góa kóng--ê, góa lóng ōe khì chòe.”

⁶ I chiū lo̍h-khì ngó͘-kok-tiûⁿ, chiàu ta-ke só͘ hoan-hù ê it-chhè khì chòe.

⁷ Pho-a-su chia̍h pá lim soah, kám-kak chin sóng-khoài, chiū khì tó tī be̍h-tui piⁿ. Lō͘-tek chiū liam-kha khì, hian-khui i khàm kha ê gōa-phàu, tó tī i ê sin-piⁿ.

⁸ Pòaⁿ-mî, Pho-a-su hoan-sin, khòaⁿ-tio̍h chi̍t ê cha-bó͘-lâng tó tī kha-piⁿ, tio̍h-chi̍t-kiaⁿ.

⁹ I mn̄g kóng, “Lí sī siáⁿ-lâng?” I ìn kóng, “Góa sī lí ê lú-pī Lō͘-tek, chhiáⁿ lí ēng gōa-saⁿ lâi khàm lí ê lú-pī, tì-ìm góa, in-ūi lí sī goán ê chì-chhin, ū gī-bū iân-sio̍k goán ê sè-hē.”

¹⁰ I kóng, “Cha-bó͘-kiáⁿ, goān lí tit-tio̍h Siōng Chú ê chiok-hok. Lí hiān-chāi só͘ piáu-hiān ê tiong-sêng pí í-chêng koh-khah tōa; bô-lūn sàn-chhiah á-sī hó-gia̍h ê siàu-liân-lâng, lí lóng bô kap in kiâⁿ.

¹¹ Taⁿ, góa ê cha-bó͘-kiáⁿ, bián hoân-ló, lí só͘ kóng--ê góa lóng ōe thòe lí chòe, in-ūi choân-siâⁿ ê lâng lóng chai lí sī hó tek-hēng ê cha-bó͘-lâng.

¹² Góa khak-si̍t sī lí ê chì-chhin, ū gī-bū iân-sio̍k lí ê sè-hē, m̄-kú ū chi̍t ê pí góa kap lín koh-khah chhin.

¹³ Kim-mî lí lâu tiàm chia, tán thiⁿ kng, i nā beh tùi lí chīn gī-bū, chin hó, hō͘ i chīn; i nā m̄, góa kí éng-oa̍h ê Siōng Chú chiù-chōa, góa it-tēng ōe chīn gī-bū. Lí tiàm chia khùn, kàu thiⁿ kng.”

¹⁴ Lō͘-tek chiū tī i ê kha-piⁿ khùn, kàu thiⁿ phú-kng. Tī lâng-bīn iáu jīn bōe chheng-chhó í-chêng, Lō͘-tek chiū khí--lâi, in-ūi Pho-a-su ū kóng, “M̄-thang hō͘ lâng chai ū cha-bó͘-lâng lâi ngó͘-kok-tiûⁿ.”

¹⁵ Pho-a-su kóng, “Kā lí ê phoa̍h-kun the̍h--lâi, thí hō͘ khui.” I chiū thí-khui. Pho-a-su niû iok jī-cha̍p kong-kun ê tōa-be̍h, khǹg tī Lō͘-tek ê keng-thâu téng, i chiū ji̍p-siâⁿ.

¹⁶ Lō͘-tek lâi kàu i ê ta-ke hia. Ná-o-bí mn̄g i kóng, “Cha-bó͘-kiáⁿ ah, tāi-chì siáⁿ-khoán?” Lō͘-tek chiū chiong hit-ê lâng tùi i só͘ chòe ê it-chhè lóng kā i kóng.

¹⁷ Lō͘-tek kóng, “Hit-ê lâng kā góa kóng, ‘Lí m̄-thang khang-chhiú tńg-khì lín ta-ke hia.’ I ū hō͘ góa chit jī-cha̍p kong-kun tōa-be̍h.”

¹⁸ Ná-o-bí chiū kóng, “Cha-bó͘-kiáⁿ ah, tán khòaⁿ tāi-chì án-chóaⁿ hoat-tián. Kin-á-ji̍t tāi-chì nā bô pān hó-sè, hit-ê lâng it-tēng bōe an-sim.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan