Bìoball air-loidhne

Lō͘-tek-kì 2 - 現代台語譯本羅馬字版

Lō͘-tek Tú-tio̍h Pho-a-su

¹ Ná-o-bí ū chi̍t ê chhin-chiâⁿ, miâ kiò-chòe Pho-a-su, sī tōa châi-chú, sī i ê tiōng-hu Í-lī-bí-le̍k ê chhin-cho̍k.

² Mô͘-ap ê lú-chú Lō͘-tek tùi Ná-o-bí kóng, “Góa siūⁿ-beh khì hn̂g--ni̍h, thang tè tī tùi góa chhin-chhiat ê lâng āu-bīn khioh be̍h-sūi.” Ná-o-bí chiū tùi i kóng, “Cha-bó͘-kiáⁿ ah, chòe lí khì.”

³ I chiū khì hn̂g--ni̍h, tè tī siu-koah ê lâng āu-bīn khioh be̍h-sūi. Chin tú-hó, chit-khu hn̂g sī Í-lī-bí-le̍k ê chhin-cho̍k Pho-a-su ê.

⁴ Tú hit-sî, Pho-a-su tùi Pek-lī-hêng lâi, i tùi siu-koah ê lâng kóng, “Goān Siōng Chú kap lín tông-chāi!” In chiū ìn i kóng, “Goān Siōng Chú sù-hok lí!”

⁵ Pho-a-su mn̄g siu-koah ê kang-thâu kóng, “Chit-ê siàu-liân cha-bó͘ gín-á sī sím-mi̍h-lâng in tau--ê?”

⁶ Siu-koah ê kang-thâu ìn kóng, “Chit-ê Mô͘-ap ê lú-chú sī tè Ná-o-bí tùi Mô͘-ap-tōe tńg--lâi-ê.

⁷ I ū kóng, ‘Chún góa tī siu-koah ê lâng āu-bīn khioh lak--lo̍h-lâi ê be̍h-sūi.’ I tùi chá-khí bô-êng kàu taⁿ, tú-á chiah tī liâu-á hioh-khùn chi̍t-sî-á nā-tiāⁿ.”

⁸ Pho-a-su chiū tùi Lō͘-tek kóng, “Cha-bó͘-kiáⁿ ah, góa kā lí kóng, m̄-thang khì pa̍t-lâng ê hn̂g khioh, mā m̄-thang lī-khui chia, tio̍h tè góa ê lú-kang tè hō͘ tiâu.

⁹ Khòaⁿ kang-lâng tī tó chi̍t khu hn̂g teh siu-koah, tio̍h tè tī lú-kang āu-bīn khioh. Góa í-keng hoan-hù kang-lâng bōe-ēng-tit kā lí chhòng-tī. Lí chhùi-ta ê sî, khì chúi-tháng hia lim kang-lâng chhiūⁿ--lâi ê chúi.”

¹⁰ Lō͘-tek chiū phak--lo̍h-khì, kūi tī thô͘-kha, tùi i kóng, “Lí ná ōe tùi góa chiah-ni̍h hó, chiah-ni̍h koan-sim góa chit-ê gōa-kok-lâng?”

¹¹ Pho-a-su ìn i kóng, “Lí ê tiōng-hu sí liáu-āu, lí tùi ta-ke só͘ chòe ê it-chhè, lâng lóng kā góa kóng lah. Lí lī-khui lí ê pē-bú kap kò͘-hiong, lâi tòa tī chit-ê siⁿ-hūn ê lâng tiong-kan.

¹² Goān Siōng Chú chiàu lí só͘ chòe--ê pò-tap lí. Lí lâi Siōng Chú — Í-sek-lia̍t ê Siōng-tè si̍t-kó͘-ē pī-lān, goān lí tùi I tit-tio̍h móa-móa ê pò-siúⁿ.”

¹³ Lō͘-tek ìn kóng, “Lí tùi góa chiah-ni̍h hó; sui-jiân góa chòe lí ê lú-pī mā bōe-kham--tit, lí iáu-kú an-ùi góa, koh tùi góa — lí ê lú-pī khin-siaⁿ kóng hó-ōe.”

¹⁴ Chia̍h-pn̄g ê sî, Pho-a-su tùi i kóng, “Lâi chia, the̍h khí-lâi chia̍h, mī-pau ùn chhò͘ chia̍h.” Lō͘-tek chiū chē tī siu-koah ê lâng sin-piⁿ. Pho-a-su the̍h pē-hó ê be̍h-á hō͘ i. I chia̍h-pá, koh ū chhun.

¹⁵ I peh--khí-lâi, koh khì khioh be̍h-sūi. Pho-a-su chiū hoan-hù i ê kang-lâng, kóng, “I nā tī be̍h-khún tiong khioh, mā m̄-thang kā i tòng, hāi i kiàn-siàu.

¹⁶ Lín sīm-chì tio̍h tùi be̍h-khún tiong thiu chi̍t-kóa chhut-lâi hō͘ i khioh, m̄-thang kā i chek-pī.”

¹⁷ Lō͘-tek chiū tī hn̂g--ni̍h khioh be̍h-sūi, khioh kàu thiⁿ-àm. I phah só͘ khioh ê be̍h-sūi, tāi-iok ū jī-cha̍p-jī kong-seng ê tōa-be̍h.

¹⁸ I chiū phāiⁿ ji̍p-siâⁿ, the̍h hō͘ i ê ta-ke khòaⁿ, koh chiong chia̍h chhun--ê the̍h chhut-lâi hō͘ i ê ta-ke.

¹⁹ I ê ta-ke tùi i kóng, “Lí kin-á-ji̍t tī tó-ūi khioh be̍h-sūi? Lí tī tó-ūi kang-chok? Goān chù-ì tio̍h lí, hó khoán-thāi lí hit-ê lâng siū chiok-hok.” Lō͘-tek chiū kā ta-ke kóng i tī sím-mi̍h-lâng hia kang-chok, koh kóng hit-ê lâng miâ kiò-chòe Pho-a-su.

²⁰ Ná-o-bí tùi sin-pū kóng, “Goān Pho-a-su tit-tio̍h Siōng Chú chiok-hok; Siōng Chú put-sî si-un hō͘ oa̍h-lâng kap sí-lâng.” Ná-o-bí koh tùi i kóng, “Chit-ê lâng sī lán ê chhin-chiâⁿ, sī ū gī-bū iân-sio̍k lán sè-hē ê chi̍t ê chì-chhin.”

²¹ Mô͘-ap ê lú-chú Lō͘-tek kóng, “I mā ū kā góa kóng, ‘Lí tio̍h tè tī góa ê kang-lâng sin-piⁿ kàu siu-koah soah.’”

²² Ná-o-bí chiū tùi i ê sin-pū Lō͘-tek kóng, “Góa ê cha-bó͘-kiáⁿ ah, lí tio̍h kap i ê lú-kang chòe-hé, chiah bián tī pa̍t-lâng ê hn̂g--ni̍h hō͘ lâng chhòng-tī.”

²³ Lō͘-tek chiū tè Pho-a-su ê lú-kang chòe-hé khioh ngó͘-kok, kàu tōa-be̍h sió-be̍h lóng siu-koah liáu. I kè-sio̍k kap i ê ta-ke tòa chòe-hé.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan