Bìoball air-loidhne

Lō͘-tek-kì 1 - 現代台語譯本羅馬字版

Í-lī-bí-le̍k Choân-ke Poaⁿ-khì Mô͘-ap

¹ Sū-su tī-lí Í-sek-lia̍t ê sî-tāi, Iû-tāi-tōe hoat-seng ki-hng. Ū chi̍t ê lâng chhōa i ê bó͘ kap nn̄g ê kiáⁿ tùi Iû-tāi ê Pek-lī-hêng poaⁿ-khì Mô͘-ap.

² Chit-ê lâng miâ kiò-chòe Í-lī-bí-le̍k, i ê bó͘ miâ kiò-chòe Ná-o-bí, nn̄g ê kiáⁿ miâ kiò-chòe Má-lûn kap Ki-liân; in sī Iû-tāi ê Pek-lī-hêng chhut-sin ê Í-hoat-tha-lâng. In kàu Mô͘-ap-tōe chiū tòa tī hia.

³ Ná-o-bí ê tiōng-hu Í-lī-bí-le̍k sí--khì, pàng i kap nn̄g ê kiáⁿ.

⁴ Hit nn̄g ê kiáⁿ chhōa Mô͘-ap lú-chú chòe bó͘, chi̍t ê kiò-chòe Ngô͘-ní-pa, lēng-gōa chi̍t ê kiò-chòe Lō͘-tek. In tòa tī hia iok cha̍p nî kú liáu-āu,

⁵ Má-lûn kap Ki-liân nn̄g ê lâng mā sí--khì, chhun Ná-o-bí ka-kī chi̍t ê lâng, bô ang mā bô kiáⁿ thang khò.

Lō͘-tek Tè Ná-o-bí Tńg-khì Pek-lī-hêng

⁶ Ná-o-bí iáu tī Mô͘-ap ê sî, thiaⁿ-tio̍h Siōng Chú koàn-kò͘ I ê chú-bîn, hō͘ in hó siu-sêng, chiū kap i ê sin-pū lī-khui Mô͘-ap-tōe beh tò-khì Pek-lī-hêng.

⁷ I chiū tùi i tòa ê só͘-chāi chhut-hoat, beh tò-khì Iû-tāi-tōe, nn̄g ê sin-pū tè i khì.

⁸ Tī lō͘-tiong Ná-o-bí tùi nn̄g ê sin-pū kóng, “Lín tńg-khì ka-kī ê gōa-ke. Goān Siōng Chú si-un hō͘ lín, chhin-chhiūⁿ lín ū hó khoán-thāi sí--khì ê lâng kap góa siâng-khoán.

⁹ Goān Siōng Chú sù-hok lín, hō͘ lín nn̄g ê chhē-tio̍h sin ê tùi-siōng, ū hó ê kui-sio̍k.” I chiū kā in chim, kap in saⁿ-sî; in tōa-siaⁿ háu,

¹⁰ tùi i kóng, “Goán it-tēng beh kap lí tńg-khì lín ê lâng hia.”

¹¹ Ná-o-bí kóng, “Cha-bó͘-kiáⁿ ah, tio̍h tńg--khì! Sī-án-chóaⁿ beh tè góa? Góa kiám ōe koh siⁿ-kiáⁿ hō͘ lín chòe ang?

¹² Cha-bó͘-kiáⁿ ah, tio̍h tńg--khì, khì lah. Góa í-keng lāu, bōe-tàng koh kè-ang; góa nā iáu ū ǹg-bāng, kim-mî ū tiōng-hu, koh siⁿ-kiáⁿ,

¹³ lín kiám ōe-tàng tán in tōa-hàn, bô khì kè pa̍t-lâng? Cha-bó͘-kiáⁿ ah, mài lah, góa pí lín khah pháiⁿ-miā, in-ūi Siōng Chú chhun-chhiú kong-kek góa.”

¹⁴ In koh tōa-siaⁿ háu. Ngô͘-ní-pa chiū kā i ê ta-ke chim, kap i saⁿ-sî. M̄-kú Lō͘-tek pàng bōe lī ta-ke.

¹⁵ Ná-o-bí chiū kóng, “Lí khòaⁿ, lín a-só í-keng tńg-khì in ê chhin-cho̍k kap in ê sîn-bêng hia, lí mā thang tè i tńg--khì.”

¹⁶ Lō͘-tek ìn kóng, “M̄-thang pek góa pàng-sak lí, lī-khui lí tò--khì. Lí khì tó-ūi, góa mā beh khì; lí tòa tó-ūi, góa mā beh tòa hia. Lí ê chhin-cho̍k chiū-sī góa ê chhin-cho̍k; lí ê Siōng-tè chiū-sī góa ê Siōng-tè.

¹⁷ Lí sí tī tó-ūi, góa mā beh sí tī hia, chòng tī hia. Chí-ū sí ōe hō͘ lí kap góa pun-khui, nā bô, goān Siōng Chú ka-pē chek-hoa̍t góa.”

¹⁸ Ná-o-bí khòaⁿ Lō͘-tek kian-koat beh tè i, chiū bô koh kóng sím-mi̍h.

¹⁹ In nn̄g lâng chiū kè-sio̍k kiâⁿ, lâi kàu Pek-lī-hêng. Kàu Pek-lī-hêng ê sî, choân-siâⁿ ūi-tio̍h in jiáu-tōng. Chèng hū-lú kóng, “Chit-ê lâng kiám chin-chiàⁿ sī Ná-o-bí?”

²⁰ I kā in kóng, “M̄-thang kiò góa Ná-o-bí, tio̍h kiò góa Má-la, in-ūi Choân-lêng-chiá hō͘ góa siū tōa khó͘-lān.

²¹ Góa móa-móa chhut--khì, Siōng Chú hō͘ góa khang-khang tò--lâi. Sī-án-chóaⁿ kiò góa Ná-o-bí? Siōng Chú khó͘-chhó͘ góa, Choân-lêng-chiá hō͘ góa siū hoān-lān.”

²² Che chiū-sī Ná-o-bí kap i ê Mô͘-ap sin-pū Lō͘-tek tùi Mô͘-ap-tōe tńg--lâi ê keng-kè. In tī khai-sí siu-koah tōa-be̍h ê sî lâi kàu Pek-lī-hêng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan