Bìoball air-loidhne

Lô-má-su 9 - 現代台語譯本羅馬字版

Siōng-tè Kéng-soán Í-sek-lia̍t-lâng

¹ Góa choh chi̍t ê sio̍k Ki-tok ê lâng kóng si̍t-ōe, bô pe̍h-chha̍t; góa ê liông-sim siū Sèng Sîn kám-tōng kā góa choh-chèng:

² Góa hui-siông iu-siong, sim-lāi thòng-khó͘ bô-thêng.

³ Góa ūi-tio̍h tông-pau, góa ê kut-jio̍k chì-chhin, pún-sin nā tio̍h siū chiù-chó͘ kap Ki-tok keh-khui mā kam-goān.

⁴ In sī Í-sek-lia̍t-lâng; Siōng-tè kéng-soán in chòe kiáⁿ-jî, sù in êng-kng, iok, Lu̍t-hoat, lé-gî, kap èng-ún.

⁵ In sī cho̍k-tiúⁿ ê kiáⁿ-sun; chiàu hiat-thóng, Ki-tok kap in tâng-cho̍k. Goān chhiau-oa̍t bān-mi̍h ê Siōng-tè tit-tio̍h chheng-chàn kàu bān sè-tāi. Amen!

⁶ Án-ni m̄-sī kóng Siōng-tè ê èng-ún bô si̍t-hiān. In-ūi m̄-sī só͘-ū ê Í-sek-lia̍t-lâng lóng sī Siōng-tè ê soán-bîn.

⁷ A-pek-la-hán ê kiáⁿ-sun mā bô lóng sī èng-ún ê kiáⁿ-jî. Siōng-tè bat tùi A-pek-la-hán kóng, “Tùi Í-sat siⁿ--ê chiah thang sǹg-chòe lí ê kiáⁿ-sun.”

⁸ Án-ni sī kóng hiat-thóng ê kiáⁿ-jî bô it-tēng sī Siōng-tè ê kiáⁿ-jî; chí-ū tùi Siōng-tè ê èng-ún siⁿ--ê chiah sǹg sī Siōng-tè ê kiáⁿ-sun.

⁹ In-ūi èng-ún ê ōe sī án-ni kóng, “Sî-ki kàu, góa ōe koh lâi, Sa-la ōe siⁿ chi̍t ê ta-po͘-kiáⁿ.”

¹⁰ M̄-nā án-ni, Lē-pek-ka ê siang-siⁿ-kiáⁿ mā-sī tùi kâng chi̍t ê lâng, chiū-sī lán ê chó͘-sian Í-sat lâi hoâi-īn.

^11-12 M̄-kú ūi-tio̍h beh piáu-sī Siōng-tè khak-si̍t kun-kù ka-kī ê bo̍k-te̍k lâi kéng-soán lâng, I tùi Lē-pek-ka kóng, “Tōa--ê ōe ho̍k-sāi sòe--ê.” Chit-kù ōe sī tī in iáu-bē chhut-sì, iáu-bē chòe hó á-sī chòe pháiⁿ í-chêng, Siōng-tè só͘ kóng--ê. Án-ni, Siōng-tè ê kéng-soán m̄-sī kun-kù lâng ê hêng-ûi, sī kun-kù I ka-kī ê soán-tiàu.

¹³ Chiàu Sèng-keng kì-chài, “Ngá-kok, góa kah-ì; Í-sò, góa bô kah-ì.”

¹⁴ Án-ni, lán beh kóng sím-mi̍h? Siōng-tè bô kong-tō sī--bô? Choa̍t-tùi m̄-sī!

¹⁵ I bat tùi Mô͘-se kóng: Góa beh lîn-bín góa ài lîn-bín ê lâng; góa beh thé-thiap góa ài thé-thiap ê lâng.

¹⁶ Só͘-í, Siōng-tè ê kéng-soán m̄-sī kun-kù lâng ê ì-goān á-sī lô-le̍k, sī chhut tī I ê lîn-bín.

¹⁷ Sèng-keng kì-chài Siōng-tè ū tùi Hoat-ló kóng, “Góa siat-li̍p lí choh-ông, bo̍k-te̍k sī beh ēng lí lâi hián-bêng góa ê koân-lêng, hō͘ góa ê miâ thoân kàu choân sè-kài.”

¹⁸ Só͘-í, Siōng-tè beh lîn-bín sím-mi̍h-lâng chiū kā i lîn-bín, beh hō͘ sím-mi̍h-lâng sim ngī chiū hō͘ i sim ngī.

Siōng-tè ê Siū-khì kap Lîn-bín

¹⁹ Án-ni, lí ōe kā góa mn̄g, “Kì-jiân sī án-ni, sī-án-chóaⁿ Siōng-tè iáu-teh chek-pī lâng? Sím-mi̍h-lâng ōe-tàng hoán-khòng Siōng-tè ê chí-ì?”

²⁰ Lí chit-ê lâng, lí sǹg siáⁿ, káⁿ kā Siōng-tè tú-chhùi! Siū sok-chō ê mi̍h kiám ōe tùi sok-chō--ê kóng, “Lí sī-án-chóaⁿ kā góa chō kah án-ni?”

²¹ Sio-hûi--ê kiám bô koân thang ēng kâng chi̍t tè liâm-thô͘ chiàu ka-kī ê ì-sù chō chi̍t ê kùi-khì ê khì-khū, chi̍t ê chho͘-sio̍k ê khì-khū?

²² Sui-jiân Siōng-tè beh piáu-sī I ê siū-khì hō͘ lâng chai I ê koân-lêng, iáu-kú ēng chin tōa ê khoan-iông thun-lún hiah-ê jiá I siū-khì eng-kai bia̍t-bông ê lâng.

²³ I ūi-tio̍h só͘ ū-pī lâi chiap-siū I ê êng-kng hiah-ê lâng, chiū-sī I lîn-bín ê tùi-siōng, I koh-khah ōe hō͘ in chai I hong-hù ê êng-kng.

²⁴ Lán lóng sī I só͘ ho͘-tiàu--ê, m̄-nā tùi Iû-thài-lâng, mā tùi Gōa-pang-lâng tiong-kan ho͘-tiàu.

²⁵ Chiàu I tī Hô-se-a-su só͘ kóng: Pún-lâi m̄-sī góa ê chú-bîn--ê, góa beh chheng-ho͘ in chòe “góa ê chú-bîn”. Pún-lâi m̄-sī góa só͘ thiàⁿ--ê, góa beh hō͘ in chòe “góa só͘ thiàⁿ--ê”.

²⁶ Tī hit-ê só͘-chāi, góa bat tùi in kóng “Lín m̄-sī góa ê chú-bîn”; siâng-khoán tī hia, in ōe kiò-chòe “éng-oa̍h Siōng-tè ê kiáⁿ-jî”.

²⁷ Koan-hē Í-sek-lia̍t-lâng, Í-sài-a bat soan-pò͘ kóng, “Sui-jiân Í-sek-lia̍t ê kiáⁿ-sun chhin-chhiūⁿ hái-soa hiah-ni̍h chōe, m̄-kú chí-ū só͘ chhun ê chió-sò͘ ōe tit-tio̍h kiù,

²⁸ in-ūi Chú tī tōe-chiūⁿ ōe chin kín koh thiat-tóe chip-hêng sím-phòaⁿ.”

²⁹ Che sī chiàu Í-sài-a í-chêng só͘ kóng: Nā m̄-sī Chú — Bān-kun ê Thóng-sòe kā lán lâu chéng, lán chá chiū chhin-chhiūⁿ Só͘-to-má, mā chhin-chhiūⁿ Gô-mô͘-la.

Í-sek-lia̍t-lâng kap Hok-im

³⁰ Án-ni, lán beh kóng sím-mi̍h? Gōa-pang-lâng bô tui-kiû kap Siōng-tè kiàn-li̍p ha̍p-gî ê koan-hē, khiok tùi sìn kap Siōng-tè ū ha̍p-gî ê koan-hē.

³¹ Í-sek-lia̍t-lâng tui-kiû tùi Lu̍t-hoat hō͘ Siōng-tè jīn-tēng in chòe gī-lâng, hoán-tńg bô tit-tio̍h.

³² Ná ōe án-ni? In-ūi in m̄-sī tùi sìn, sī tùi khò hêng-ûi. In khì that-tio̍h hit-tè hō͘ lâng poa̍h-tó ê chio̍h poa̍h-tó.

³³ Sèng-keng ū án-ni kì-chài: Khòaⁿ leh, góa chiong hō͘ lâng poa̍h-tó ê chio̍h, hō͘ lâng poa̍h-tó ê tōa chio̍h khǹg tī Sek-an; sìn I ê lâng bōe tì-kàu sit-bāng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan