Bìoball air-loidhne

Lô-má-su 6 - 現代台語譯本羅馬字版

Kap Chōe Toān-choa̍t Koan-hē, ūi Siōng-tè Lâi Oa̍h

¹ Án-ni, lán beh kóng sím-mi̍h? Lán sī tio̍h kè-sio̍k tī chōe-ok tiong seng-oa̍h, thang hō͘ un-tián koh-khah ke-thiⁿ sī--bô?

² Choa̍t-tùi m̄-sī! Lán chiah-ê ǹg chōe í-keng sí ê lâng kiám thang kè-sio̍k tī chōe-ok tiong seng-oa̍h?

³ Lín kiám m̄ chai, lán lóng siū sóe-lé lâi kap Ki-tok Iâ-so͘ kiat-ha̍p, sī siū sóe-lé lâi kap I sí?

⁴ Kì-jiân lán thong-kè sóe-lé kap I sí, chòe-hé bâi-chòng, só͘-í, chhin-chhiūⁿ Ki-tok thong-kè Thiⁿ-pē êng-kng ê koân-lêng tùi sí koh-oa̍h, lán mā tio̍h kè sin ê seng-oa̍h.

⁵ Kì-jiân lán kap Ki-tok chiâⁿ-chòe chi̍t-thé lâi keng-giām I ê sí, lán it-tēng mā ōe kap I kiat-ha̍p lâi koh-oa̍h.

⁶ Lán chai, lán kū ê chū-ngó͘ í-keng kap Ki-tok chòe-hé tèng si̍p-jī-kè, sī beh hō͘ siū chōe khu-sok hit-ê kū ê lâng húi-bia̍t, hō͘ lán bô koh chòe chōe ê lô͘-lē.

⁷ In-ūi lâng it-tàn sí--khì chiū tùi chōe tit-tio̍h tháu-pàng.

⁸ Kì-jiân lán í-keng kap Ki-tok chòe-hé sí, lán siong-sìn lán mā ōe kap I chòe-hé oa̍h.

⁹ Lán chai Ki-tok í-keng tùi sí-lâng tiong koh-oa̍h, bōe koh sí, sí bōe koh chi-phòe I.

¹⁰ In-ūi I ū sí, chi̍t piàn chiū oân-choân kā chōe chè-ap; I hiān-chāi teh oa̍h, sī ūi-tio̍h Siōng-tè teh oa̍h.

¹¹ Án-ni, lín mā tio̍h khòaⁿ ka-kī í-keng kap chōe toān-choa̍t koan-hē, kap Ki-tok Iâ-so͘ kiat-ha̍p, ūi-tio̍h Siōng-tè teh oa̍h.

¹² Só͘-í, m̄-thang chiong lín ōe-sí ê seng-khu kau hō͘ chōe chi-phòe, khì sūn-thàn pún-sèng ê io̍k-bōng.

¹³ Mā m̄-thang chiong lín seng-khu ê chi-thé kau hō͘ chōe khì chòe put-gī ê kang-khū. Hoán-tńg tio̍h chòe chi̍t ê tùi sí-lâng tiong koh-oa̍h ê lâng, chiong ka-kī hiàn hō͘ Siōng-tè, chiong seng-khu ê kok chi-thé hiàn hō͘ I chòe gī ê kang-khū.

¹⁴ M̄-thang hō͘ chōe kā lín chi-phòe, in-ūi lín m̄-sī oa̍h tī Lu̍t-hoat-ē, sī oa̍h tī un-tián-ē.

Gī ê Lô͘-po̍k

¹⁵ Nā án-ni, in-ūi lán m̄-sī tī Lu̍t-hoat-ē, sī tī un-tián-ē, lán chiū thang hoān-chōe sī--bô? Choa̍t-tùi m̄-thang!

¹⁶ Kiám m̄ chai lín nā chiong ka-kī kau hō͘ bó͘-lâng choh lô͘-lē sūn-thàn i, lín chiū-sī hit-ê lâng ê lô͘-lē; án-ni kóng, lín sī choh chōe ê lô͘-lē tì-kàu sí, á-sī choh Siōng-tè ê lô͘-po̍k sūn-thàn I tì-kàu kap I ū ha̍p-gî ê koan-hē?

¹⁷ Kám-siā Siōng-tè, sui-jiân lín bat choh chōe ê lô͘-lē, hiān-chāi í-keng tùi sim-tóe sūn-thàn hit-ê thoân-siū hō͘ lín chòe tián-hoān ê kà-sī.

¹⁸ Lín í-keng tùi chōe tit-tio̍h tháu-pàng, chiâⁿ-chòe gī ê lô͘-po̍k.

¹⁹ Kiaⁿ-liáu lín bōe liáu-kái, góa ēng it-poaⁿ-lâng ê ōe kā lín kóng. Chhin-chhiūⁿ lín í-chêng bat chiong seng-khu oân-choân kau hō͘ ù-òe kap put-hoat, hō͘ put-hoat ke-thiⁿ, hiān-chāi lín tio̍h chiong lín seng-khu ê ta̍k pō͘-hūn hiàn hō͘ gī chòe sèng-kiat ê lō͘-ēng.

²⁰ Lín choh chōe ê lô͘-lē hit-sî, lín bô siū gī iok-sok.

²¹ Hit-sî lín chòe hiān-chāi khòaⁿ-chòe kiàn-siàu ê tāi-chì, kiat-kó sī-án-chóaⁿ? Kiat-kio̍k sī sí.

²² Hiān-chāi lín í-keng tùi chōe tit-tio̍h tháu-pàng, chiâⁿ-chòe Siōng-tè ê lô͘-po̍k, hit-ê kiat-kó sī chiâⁿ-chòe sèng-kiat; kiat-kio̍k sī éng-oán ê oa̍h-miā.

²³ In-ūi chōe ê tāi-kè sī sí, m̄-kú Siōng-tè thong-kè lán ê Chú Ki-tok Iâ-so͘ pe̍h-pe̍h sù hō͘ lán ê un-tián sī éng-oán ê oa̍h-miā.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan