Bìoball air-loidhne

Lô-má-su 4 - 現代台語譯本羅馬字版

A-pek-la-hán ê Bô͘-hoān

¹ Án-ni, koan-hē lán hiat-thóng ê chó͘-sian A-pek-la-hán, lán beh kóng sím-mi̍h?

² A-pek-la-hán nā-sī tùi hêng-ûi siū chheng-chòe gī-lâng, i chiū ū thang khoa-kháu, m̄-kú tùi Siōng-tè khòaⁿ, i bô thang khoa-kháu.

³ In-ūi Sèng-keng ū kì-chài, “A-pek-la-hán sìn Siōng-tè, in-ūi án-ni, Siōng-tè chiū kā i sǹg-chòe gī.”

⁴ Lâng chòe kang tit-tio̍h kang-chîⁿ bô sǹg un-tián, sī eng-kai.

⁵ M̄-kú bô khò hêng-ûi, chí-ū sìn hit-ūi soan-phòaⁿ chōe-jîn chòe bô chōe ê Siōng-tè ê lâng, i in-ūi ū chit-ê sìn, Siōng-tè chiū kā i sǹg-chòe gī.

⁶ Tāi-pi̍t mā ū kóng-khí bô khò hêng-ûi hō͘ Siōng-tè kā i sǹg-chòe gī ê lâng ū hok-khì. I kóng:

⁷ Kè-sit tit-tio̍h sià-bián, chōe-kò tit-tio̍h chhat-siau, chit-khoán lâng chin ū hok-khì!

⁸ Chú bô sǹg i ū-chōe--ê, chit-khoán lâng chin ū hok-khì!

⁹ Án-ni, chit-ê hok-khì chí-ū hō͘ siū kat-lé ê lâng sī--bô? M̄-sī, mā hō͘ bô siū kat-lé ê lâng. In-ūi lán í-keng ū kóng, “A-pek-la-hán in-ūi sìn, Siōng-tè chiū kā i sǹg-chòe gī.”

¹⁰ Sī án-chóaⁿ sǹg? Sī i siū kat-lé í-chêng, á-sī í-āu? Sī kat-lé í-chêng, m̄-sī kat-lé í-āu.

¹¹ Āu-lâi i ū siū kat-lé; chit-ê kat-lé sī chi̍t chióng kì-hō, ìn-chèng i iáu-bē siū kat-lé í-chêng chiū tùi sìn hō͘ Siōng-tè chiap-la̍p chòe gī-lâng. Hiah-ê bô siū kat-lé ê lâng in-ūi sìn, Siōng-tè ū chiap-la̍p in chòe gī-lâng, thang hō͘ A-pek-la-hán choh hiah-ê bô siū kat-lé ê sìn-tô͘ ê chó͘-sian.

¹² I mā-sī siū kat-lé ê lâng ê chó͘-sian; in m̄-nā siū kat-lé, mā ū chiàu lán ê chó͘-sian A-pek-la-hán siū kat-lé í-chêng sìn-sim ê bô͘-hoān teh seng-oa̍h.

Èng-ún ê Si̍t-hiān

¹³ Siōng-tè èng-ún A-pek-la-hán kap i ê kiáⁿ-sun beh hō͘ in sêng-siū sè-kài chòe sán-gia̍p; chit-ê èng-ún m̄-sī thong-kè Lu̍t-hoat, sī thong-kè sìn lâi tit--tio̍h ê gī.

¹⁴ Nā chun-siú Lu̍t-hoat ê lâng chiah ōe-tàng sêng-siū Siōng-tè ê èng-ún, sìn chiū khang-khang, èng-ún mā bô lō͘-ēng.

¹⁵ Lu̍t-hoat ōe jiá-khí Siōng-tè ê siū-khì; bô Lu̍t-hoat chiū bô ûi-hoat.

¹⁶ In-ūi án-ni, èng-ún sī ēng sìn chòe kun-kù, beh pó-chèng èng-ún sī tùi Siōng-tè pe̍h-pe̍h ê un-tián, hō͘ A-pek-la-hán só͘-ū ê kiáⁿ-sun, m̄-nā ū siū kat-lé ê lâng, mā pau-hâm hiah-ê kap A-pek-la-hán siâng-khoán ū sìn Siōng-tè ê lâng. I sī lán chèng-lâng ê chó͘-sian;

¹⁷ chiàu Sèng-keng só͘ kì-chài, “Góa ū hō͘ lí choh bān-bîn ê chó͘-sian.” Chit-ê èng-ún tī Siōng-tè bīn-chêng ū-hāu. A-pek-la-hán sìn chit-ūi hō͘ sí-lâng koh-oa̍h, koh hō͘ bô pìⁿ-chòe ū ê Siōng-tè.

¹⁸ I tī bô thang ǹg-bāng ê sî iáu khǹg ǹg-bāng, sìn kóng i ōe chiâⁿ-chòe bān-bîn ê chó͘-sian, chiàu só͘ èng-ún ê ōe kóng, “Lí it-tēng ū chin chōe kiáⁿ-sun.”

¹⁹ I í-keng chiâⁿ-pah hè, siūⁿ-tio̍h ka-kī ê seng-khu ná-chhin-chhiūⁿ sí--khì, Sa-la ia̍h í-keng bōe siⁿ-kiáⁿ, m̄-kú A-pek-la-hán bô in-ūi án-ni sit-khì sìn-sim.

²⁰ I tùi Siōng-tè ê èng-ún bô hoâi-gî, sìn-sim hoán-tńg ná kian-tēng, chiong êng-kng kui hō͘ Siōng-tè.

²¹ I khak-sìn Siōng-tè it-tēng ōe si̍t-hiān ka-kī ê èng-ún.

²² Só͘-í, A-pek-la-hán in-ūi sìn, Siōng-tè kā i sǹg-chòe gī.

²³ M̄-kú, “Kā i sǹg-chòe gī” chit-kù ōe m̄-sī kan-ta ūi-tio̍h i,

²⁴ mā-sī ūi-tio̍h lán chiah-ê lâng siá--ê, in-ūi lán ū sìn Siōng-tè hō͘ lán ê Chú Iâ-so͘ tùi sí-lâng tiong koh-oa̍h, lán mā ōe siū sǹg-chòe gī.

²⁵ Ūi-tio̍h lán ê chōe-kò, Siōng-tè chiong Chú Iâ-so͘ kau hō͘ lâng hāi-sí, koh ūi-tio̍h beh hō͘ lán kap Siōng-tè ū ha̍p-gî ê koan-hē, Siōng-tè ū hō͘ I koh-oa̍h.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan