Bìoball air-loidhne

Lô-má-su 3 - 現代台語譯本羅馬字版

¹ Án-ni kóng, choh Iû-thài-lâng ū sím-mi̍h iu-tiám? Kat-lé ū sím-mi̍h lī-ek?

² Tī ta̍k hong-bīn lóng ū chin chōe hó-chhù. Tē-it, Siōng-tè ū chiong I ê ōe kau-thok in.

³ In tiong-kan nā ū lâng bô sìn-si̍t, in ê bô sìn-si̍t kiám ōe hō͘ Siōng-tè ê sìn-si̍t pìⁿ-chòe bô-hāu?

⁴ Choa̍t-tùi bōe! Sīm-chì só͘-ū ê lâng lóng pe̍h-chha̍t, Siōng-tè ia̍h it-tēng sī chin-si̍t. Chiàu Sèng-keng só͘ kì-chài: Lí chek-pī ê sî, hián-chhut kong-gī; lí siū khòng-kò ê sî, ōe sèng-sò͘.

⁵ Put-kò, lán ê put-gī nā ōe-tàng hián-bêng Siōng-tè ê gī, lán ōe-tàng kóng sím-mi̍h? Góa chiàu lâng ê siūⁿ-hoat kóng, Siōng-tè tùi lán siū-khì sī put-gī sī--bô?

⁶ Choa̍t-tùi m̄-sī! Nā-sī, Siōng-tè ná ōe-tàng sím-phòaⁿ sè-kan?

⁷ Góa ê hu-ké nā ōe-tàng hō͘ Siōng-tè ê chin-si̍t koh-khah bêng-hián, hō͘ I koh-khah ū êng-kng, góa ná iáu hō͘ I soan-phòaⁿ chòe chōe-jîn?

⁸ Án-ni, ná m̄ kóng “Lán lâi chòe pháiⁿ hō͘ hó-sū si̍t-hiān”? Khak-si̍t ū lâng án-ni kóng lâi kā góa tiòng-siong, in eng-kai siū tēng-chōe.

Bô Gī-lâng

⁹ Nā án-ni, lán Iû-thài-lâng kiám ū khah iâⁿ Gōa-pang-lâng? Bô! Góa í-keng ū chí-chek Iû-thài-lâng kap Gōa-pang-lâng lóng siū chōe koán-hat.

¹⁰ Tú chiàu Sèng-keng só͘ kì-chài: Lóng bô gī-lâng, liân chi̍t ê to bô!

¹¹ Bô hiáu-ngō͘ ê lâng; lóng bô lâng chhē-kiû Siōng-tè.

¹² Lâng lóng pōe-poān Siōng-tè, lóng kiâⁿ bê-lō͘; lóng bô lâng chòe hó-sū, liân chi̍t ê to bô!

¹³ In ê nâ-âu chhin-chhiūⁿ khui-khui ê bōng; in ê chhùi-chi̍h kan-chà; in ê chhùi-tûn ū to̍k-chôa ê to̍k.

¹⁴ In chhùi-lāi chhiong-móa ok-to̍k chiù-chó͘.

¹⁵ In cháu chin kín, kip beh thâi-lâng lâu-huih;

¹⁶ in cháu--kè ê lō͘ lóng ū húi-bia̍t pi-chhám.

¹⁷ Pêng-an ê lō͘ in m̄ bat,

¹⁸ tùi Siōng-tè, sim bô chûn kèng-ùi.

¹⁹ Taⁿ lán liáu-kái, Lu̍t-hoat it-chhè ê iau-kiû sī tùi tī Lu̍t-hoat-ē ê lâng kóng--ê, hō͘ lâng lóng bōe-tàng piān-kái, hō͘ choân sè-kài lóng siū Siōng-tè sím-phòaⁿ.

²⁰ Só͘-í bô lâng khò siú Lu̍t-hoat ê tiâu-bûn ōe hō͘ Siōng-tè soan-phòaⁿ chòe gī-lâng; tùi Lu̍t-hoat, lâng chiah chai sím-mi̍h sī chōe.

Siōng-tè Hō͘ Lâng kap I Ū Ha̍p-gî ê Koan-hē

²¹ Hiān-chāi, Siōng-tè í-keng kā lán chí-sī, lán m̄-bián khò Lu̍t-hoat ōe-tàng kap I kiàn-li̍p ha̍p-gî ê koan-hē; Lu̍t-hoat kap sian-ti lóng ūi-tio̍h che chòe kiàn-chèng.

²² Kap Siōng-tè kiàn-li̍p ha̍p-gî ê koan-hē sī thong-kè sìn Iâ-so͘ Ki-tok. Siōng-tè án-ni tùi-thāi só͘-ū sìn Ki-tok ê lâng, lóng bô chha-pia̍t.

²³ In-ūi só͘-ū ê lâng lóng hoān-chōe, tì-kàu Siōng-tè ê êng-kng tit bōe tio̍h;

²⁴ put-kò, tùi Siōng-tè só͘ sù pe̍h-pe̍h ê un-tián, thong-kè Ki-tok Iâ-so͘ oân-sêng ê kiù-sio̍k, lâng thang kap Siōng-tè ū ha̍p-gî ê koan-hē.

²⁵ Siōng-tè li̍p Iâ-so͘ choh sio̍k-chōe-chè, thong-kè I ê sí, hō͘ lâng tùi sìn lâi tit-tio̍h sià-chōe. Siōng-tè ēng án-ni lâi hián-bêng I ê gī. Tī kè-khì, I ēng nāi-sim tùi-thāi lâng, khoan-iông in í-chêng só͘ hoān ê chōe,

²⁶ beh tī hiān-kim chit-ê sî hián-bêng I ka-kī sī gī, koh hō͘ sìn Iâ-so͘ ê lâng kap I ū ha̍p-gî ê koan-hē.

²⁷ Nā án-ni, lán iáu ū sím-mi̍h thang khoa-kháu? Lóng bô! Khò sím-mi̍h hoat-chek? Khò hêng-ûi sī--bô? M̄-sī! Sī khò sìn ê hoat-chek.

²⁸ Só͘-í, goán jīn-tēng, lâng kap Siōng-tè kiàn-li̍p ha̍p-gî ê koan-hē, m̄-sī khò siú Lu̍t-hoat ê hêng-ûi, chí-ū tùi sìn.

²⁹ Siōng-tè kiám chí-ū sī Iû-thài-lâng ê Siōng-tè? I kiám m̄-sī Gōa-pang-lâng ê Siōng-tè? Sī, I mā-sī Gōa-pang-lâng ê Siōng-tè.

³⁰ Kì-jiân Siōng-tè chí-ū chi̍t ūi, I hō͘ siū kat-lé ê Iû-thài-lâng tùi sìn lâi kap I kiàn-li̍p ha̍p-gî ê koan-hē, mā hō͘ bô siū kat-lé ê Gōa-pang-lâng tùi sìn lâi kap I kiàn-li̍p ha̍p-gî ê koan-hē.

³¹ Án-ni kóng, lán in-ūi chit-ê sìn soah hō͘ Lu̍t-hoat sit-khì hāu-le̍k sī--bô? Choa̍t-tùi m̄-sī! Lán tian-tò sī teh khak-li̍p Lu̍t-hoat.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan