Bìoball air-loidhne

Lô-má-su 2 - 現代台語譯本羅馬字版

Siōng-tè ê Sím-phòaⁿ

¹ Só͘-í, lí chit-ê phoe-phòaⁿ lâng--ê, bô-lūn lí sī sím-mi̍h-lâng lóng bōe-tàng the chek-jīm; lí phoe-phòaⁿ pa̍t-lâng sī teh phoe-phòaⁿ ka-kī, in-ūi lí phoe-phòaⁿ pa̍t-lâng chòe ê tāi-chì, ka-kī mā ta̍k-hāng lóng khì chòe.

² Lán chai, chòe chit-khoán tāi-chì ê lâng, Siōng-tè ōe chiàu sū-si̍t kā in sím-phòaⁿ.

³ Lí chit-ê lâng, lí phoe-phòaⁿ pa̍t-lâng chòe chiah-ê tāi-chì, ka-kī mā khì chòe kâng-khoán ê tāi-chì, lí siūⁿ-kóng lí ōe-tàng siám-pī Siōng-tè ê sím-phòaⁿ sī--bô?

⁴ Á-sī kóng lí khòaⁿ-khin Siōng-tè ke̍k-tōa ê jîn-chû, khoan-iông, kap thun-lún. Lí kiám m̄ chai I ê jîn-chû sī beh chhōa lí hóe-kái?

⁵ Lí ngī-sim, m̄ hóe-kái, sī teh ūi-tio̍h ka-kī lúi-chek Siōng-tè ê siū-khì; chit-ê siū-khì ōe tī I kong-gī sím-phòaⁿ hit-ji̍t hián-bêng.

⁶ Siōng-tè ōe chiàu ta̍k-lâng ê hêng-ûi kā in pò-èng.

⁷ Hiah-ê kian-chhî chòe hó-sū, tui-kiû êng-kng, chun-kùi, kap bōe-pāi-hoāi ê sìⁿ-miā ê lâng, Siōng-tè ōe sù in éng-oán ê oa̍h-miā.

⁸ Hiah-ê chū-su, bô chun-thàn chin-lí, khì thàn put-gī ê lâng, Siōng-tè ê siū-khì kap hêng-hoa̍t ōe lîm-kàu in.

⁹ Só͘-ū chòe pháiⁿ ê lâng ōe siū-tio̍h hoān-lān khùn-khó͘, tāi-seng sī Iû-thài-lâng, āu-lâi chiah Gōa-pang-lâng.

¹⁰ Put-kò só͘-ū chòe hó ê lâng ōe tit-tio̍h êng-kng, chun-kùi, kap pêng-an, tāi-seng sī Iû-thài-lâng, āu-lâi chiah Gōa-pang-lâng;

¹¹ in-ūi Siōng-tè bô phian-thāi lâng.

¹² Gōa-pang-lâng bô Mô͘-se ê Lu̍t-hoat, nā hoān-chōe mā ōe siū Lu̍t-hoat-gōa ê sím-phòaⁿ lâi bia̍t-bông; Iû-thài-lâng ū Mô͘-se ê Lu̍t-hoat, nā hoān-chōe ōe chiàu Lu̍t-hoat siū sím-phòaⁿ.

¹³ In-ūi, m̄-sī thiaⁿ Lu̍t-hoat ê lâng tī Siōng-tè ê bīn-chêng sī gī-lâng, chí-ū si̍t-hêng Lu̍t-hoat ê lâng chiah ōe hō͘ Siōng-tè soan-phòaⁿ chòe gī-lâng.

¹⁴ Bô Lu̍t-hoat ê Gōa-pang-lâng nā chiàu pún-sèng chun-siú Lu̍t-hoat ê kui-tēng, in sui-jiân bô Lu̍t-hoat, ka-kī chiū-sī lu̍t-hoat;

¹⁵ án-ni piáu-sī Lu̍t-hoat ê iau-kiû ū khek tī in sim-lāi. In ê liông-sim mā chèng-si̍t, in ê sim-su ū-sî ka-kī chek-pī, ū-sî ka-kī piān-hō͘.

¹⁶ Án-ni, tī hit-ji̍t, chiàu góa só͘ thoân ê hok-im, Siōng-tè ōe thong-kè Ki-tok Iâ-so͘ lâi sím-phòaⁿ lâng ún-ba̍t ê sū.

Iû-thài-lâng kap Lu̍t-hoat

¹⁷ Án-ni lí leh, lí chū-chheng Iû-thài-lâng, óa-khò Lu̍t-hoat, koh ēng Siōng-tè chòe khoa-kháu.

¹⁸ Lí bêng-pe̍k Siōng-tè ê chí-ì, ū siū-kè Lu̍t-hoat ê kàu-tō, ōe-hiáu hun-pia̍t sī-hui.

¹⁹ Lí chū-sìn ka-kī sī teh kā sit-bêng ê lâng chhōa-lō͘, sī o͘-àm tiong ê lâng ê kng,

²⁰ gōng-lâng ê tō-su, iù-tī ê lâng ê lāu-su. Lí siūⁿ-kóng kì-jiân ū Lu̍t-hoat, tùi tì-sek kap chin-lí chiū ū pá-ak.

²¹ Lí kà-sī pa̍t-lâng, sī-án-chóaⁿ bô kà-sī ka-kī? Lí kà lâng m̄-thang thau-the̍h, ka-kī ū thau-the̍h--bô?

²² Lí kóng m̄-thang hoān kan-îm, ka-kī ū hoān--tio̍h-bô? Lí iàm-ò͘ⁿ ngó͘-siōng, ka-kī ū chhiúⁿ biō-sī--bô?

²³ Lí khoa-kháu ū Lu̍t-hoat, ka-kī ū hoān-hoat lâi bú-jio̍k Siōng-tè bô?

²⁴ Sèng-keng ū kì-chài, “In-ūi lín ê iân-kò͘, Siōng-tè ê miâ tī Gōa-pang-lâng ê tiong-kan siū siat-to̍k.”

²⁵ Lí nā chun-siú Lu̍t-hoat, kat-lé chiū ū kè-ta̍t; lí nā hoān-hoat, ū kat-lé pìⁿ-chòe bô kat-lé.

²⁶ Bô siū kat-lé ê lâng nā chun-siú Lu̍t-hoat ê kui-tēng, Siōng-tè kiám bô kā i sǹg-chòe ū kat-lé?

²⁷ Jio̍k-thé bô siū kat-lé m̄-kú ū chun-siú Lu̍t-hoat ê lâng ōe kā lí tēng-chōe, in-ūi lí ū Lu̍t-hoat ê tiâu-bûn koh siū kat-lé, m̄-kú tian-tò ûi-pōe Lu̍t-hoat.

²⁸ Kî-si̍t, gōa-piáu choh Iû-thài-lâng--ê m̄-sī chin-chiàⁿ ê Iû-thài-lâng; tī jio̍k-thé só͘ siū gōa-piáu ê kat-lé mā m̄-sī chin-chiàⁿ ê kat-lé.

²⁹ Chin-chiàⁿ ê Iû-thài-lâng sī lōe-chāi--ê; chin-chiàⁿ ê kat-lé sī sim ê kat-lé, sī Sèng Sîn ê chok-ûi, m̄-sī khò Lu̍t-hoat ê tiâu-bûn. Chit-khoán lâng siū chheng-chàn m̄-sī tùi lâng, sī tùi Siōng-tè lâi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan