Bìoball air-loidhne

Lô-má-su 11 - 現代台語譯本羅馬字版

Í-sek-lia̍t Siū Kéng-soán ê Chió-sò͘-lâng

¹ Án-ni, góa beh mn̄g, Siōng-tè kiám ū pàng-sak I ê chú-bîn? Choa̍t-tùi bô! Góa pún-sin mā-sī Í-sek-lia̍t-lâng, sī A-pek-la-hán ê hō͘-tāi, sio̍k Piān-ngá-bín chi-cho̍k.

² Siōng-tè m̄-bat pàng-sak I chá chiū kéng-soán ê chú-bîn. Lín kiám m̄ chai Sèng-keng ū kì-chài, Í-lī-a tùi Siōng-tè khòng-kò Í-sek-lia̍t-lâng,

³ kóng, “Chú ah, in thâi-sí lí ê sian-ti, thiah-húi lí ê chè-tôaⁿ, chí-ū chhun góa chi̍t lâng, in mā teh siàu-siūⁿ góa ê sìⁿ-miā.”

⁴ M̄-kú Siōng-tè án-chóaⁿ ìn-tap? I kóng, “Góa ū ūi-tio̍h ka-kī lâu chhit-chheng ê m̄-bat kūi-pài Pa-le̍k ê lâng.”

⁵ Hiān-kim chit-ê sî ê chêng-hêng mā-sī án-ni, Siōng-tè ū lâu ēng un-tián kéng-soán ê chió-sò͘-lâng.

⁶ Kì-jiân sī Siōng-tè ê un-tián, chiū m̄-sī kun-kù lâng ê hêng-ûi; nā kun-kù lâng ê hêng-ûi, un-tián chiū m̄-sī un-tián!

⁷ Nā án-ni, Í-sek-lia̍t-lâng bô tit-tio̍h in teh tui-chhē--ê, chí-ū Siōng-tè só͘ kéng-soán ê chió-sò͘-lâng ū tit--tio̍h. Kî-tha ê lâng sim ngī m̄ thiaⁿ,

⁸ chiàu Sèng-keng só͘ kì-chài: Siōng-tè hō͘ in ê sim-lêng bâ-pì, ba̍k-chiu khòaⁿ bōe kìⁿ, hī-khang thiaⁿ bōe tio̍h, ti̍t-kàu kin-á-ji̍t.

⁹ Tāi-pi̍t kóng: Tio̍h hō͘ in ê iàn-se̍k chiâⁿ-chòe hām-khiⁿ, lô-bāng, hō͘ in poa̍h-tó, chòe in ê pò-èng.

¹⁰ Tio̍h hō͘ in ê ba̍k-chiu hoe, bōe khòaⁿ--kìⁿ, hō͘ in ê ka-chiah-phiaⁿ éng-oán khiau-ku.

Gōa-pang-lâng ê Tit-kiù

¹¹ Án-ni, góa beh kóng, Í-sek-lia̍t-lâng tó--lo̍h-khì, kiám lóng peh bōe khí--lâi? It-tēng bōe án-ni! Tian-tò in-ūi in ê kè-sit, chín-kiù lîm-kàu Gōa-pang-lâng, lâi kek-khí Í-sek-lia̍t-lâng ê oàn-tò͘.

¹² Kì-jiân Í-sek-lia̍t-lâng ê kè-sit ōe hō͘ sè-kan-lâng tit-tio̍h hong-hù ê chiok-hok, in ê sit-pāi ōe hō͘ Gōa-pang-lâng tit-tio̍h hong-hù ê chiok-hok, hô-hòng Í-sek-lia̍t-lâng nā choân-sò͘ tit-tio̍h kiù, hit-ê chiok-hok kiám bōe koh-khah hong-hù?

¹³ Hiān-chāi góa tùi lín Gōa-pang-lâng kóng. Kì-jiân góa sī Gōa-pang-lâng ê sù-tô͘, góa khòaⁿ góa ê chit-hūn chòe êng-kng,

¹⁴ án-ni thang kek-khí góa ê tông-pau ê oàn-tò͘, lâi kiù in tiong-kan chi̍t-kóa lâng.

¹⁵ Í-sek-lia̍t tông-pau siū khì-sak nā ōe hō͘ sè-kan-lâng kap Siōng-tè koh hô-hó, in koh siū chiap-la̍p kiám m̄-sī chhin-chhiūⁿ lâng tùi sí koh-oa̍h?

¹⁶ Thâu chi̍t tè mī-oân nā sèng-pia̍t kui hō͘ Siōng-tè, kui-sn̂g mā lóng ōe án-ni; chhiū-kun nā sèng-pia̍t kui hō͘ Siōng-tè, ki mā lóng ōe án-ni.

¹⁷ Lâng kā kaⁿ-ná-chhiū-ki chián--khí-lâi, chiong lín chiah-ê iá-seng ê kaⁿ-ná-chhiū-ki chiap--lo̍h-khì, lâi chiap-siū kâng hit-châng chhiū-kun ê êng-ióng-hūn,

¹⁸ lín chiū m̄-thang tùi chián--khí-lâi ê chhiū-ki khoa-kháu. Lín nā beh khoa-kháu, tio̍h chai, m̄-sī kun teh óa-khò lín, sī lín teh óa-khò kun.

¹⁹ Lí kiám-chhái beh kóng, “Chiah-ê chhiū-ki chián--khí-lâi sī beh kā góa chiap--lo̍h-khì.”

²⁰ Tio̍h! In m̄ sìn chiah siū chián--khí-lâi, lí tùi sìn chiah khiā ōe tiâu. Lí m̄-thang kiau-ngō͘, tio̍h kiaⁿ-hiâⁿ.

²¹ In-ūi Siōng-tè nā bô lâu goân-lâi ê chhiū-ki, mā bô it-tēng ōe lâu lí.

²² Só͘-í, tio̍h chai Siōng-tè ê chû-ài kap giâm-hat, tùi tūi-lo̍h ê lâng, I chin giâm-hat, m̄-kú lí nā kè-sio̍k óa-khò I ê chû-ài, I chiū ēng chû-ài tùi-thāi lí; nā bô, lí mā ōe siū chián-tn̄g sit-khì I ê chû-ài.

²³ Í-sek-lia̍t-lâng nā m̄-sī kian-chhî m̄ sìn, chiū ōe siū chiap tò-tńg--khì, in-ūi Siōng-tè ōe-tàng koh kā in chiap tò-tńg--khì.

²⁴ Lín chiah-ê tùi iá-seng ê kaⁿ-ná-chhiū chián--khí-lâi ê chhiū-ki, Siōng-tè to ōe-tàng ûi-hoán chū-jiân kā lín chiap tī hó ê kaⁿ-ná-chhiū, hiah-ê goân-lâi ê chhiū-ki kiám bōe koh-khah eng-kai chiap tò-tńg--khì?

Siōng-tè ê Thiàⁿ Phó͘-ki̍p Bān-bîn

²⁵ Hiaⁿ-tī chí-bē, góa ài lín chai chit-ê ò-biāu ê chin-lí, chiah bōe siūⁿ-kóng ka-kī sī chhong-bêng. Chit-ê ò-biāu chiū-sī chi̍t-pō͘-hūn ê Í-sek-lia̍t-lâng chiām-sî ngī-sim, kàu Gōa-pang-lâng kui Chú ê sò͘-bo̍k móa ûi-chí.

²⁶ Án-ni, só͘-ū ê Í-sek-lia̍t-lâng lóng ōe tit-kiù. Chiàu Sèng-keng só͘ kì-chài: Chín-kiù-chiá ōe tùi Sek-an chhut--lâi, I ōe tû-khì Ngá-kok ê put-khiân put-gī.

²⁷ Hit-sî góa beh tû-khì in ê chōe; Che sī góa kap in só͘ li̍p ê iok.

²⁸ Chi̍t hong-bīn, tùi hok-im ê koan-tiám lâi kóng, Í-sek-lia̍t-lâng in-ūi lín ê iân-kò͘ chiâⁿ-chòe Siōng-tè ê tùi-te̍k. Lēng-gōa chi̍t hong-bīn, tùi kéng-soán ê koan-tiám lâi kóng, in-ūi in chó͘-sian ê iân-kò͘, in chiâⁿ-chòe Siōng-tè só͘ thiàⁿ ê lâng;

²⁹ in-ūi Siōng-tè ê un-sù kap kéng-soán bōe kái-piàn.

³⁰ Lín Gōa-pang-lâng í-chêng bô sūn-ho̍k Siōng-tè, hiān-chāi in-ūi Í-sek-lia̍t-lâng bô sūn-ho̍k, lín chiah tit-tio̍h lîn-bín.

³¹ Kâng-khoán, in-ūi lín ū tit-tio̍h lîn-bín, in hiān-chāi bô sūn-ho̍k Siōng-tè, sī beh hō͘ in mā ōe tit-tio̍h lîn-bín.

³² Siōng-tè chiong só͘-ū ê lâng lóng koaiⁿ tī bô sūn-ho̍k ê chōng-thāi, sī ūi-tio̍h beh lîn-bín só͘-ū ê lâng.

Êng-kng Kui Siōng-tè

³³ Siōng-tè ê hong-sēng, tì-hūi, chai-bat, jōa-á-ni̍h chhim-tîm ah! I ê phòaⁿ-toàn oh-tit thui-chhek; I ê tō-lō͘ oh-tit chhē--tio̍h!

³⁴ Sím-mi̍h-lâng chai Chú ê sim-ì? Sím-mi̍h-lâng ōe-tàng thòe I chhut chú-ì?

³⁵ Sím-mi̍h-lâng bat seng hō͘ I sím-mi̍h, I tio̍h pò-tap in?

³⁶ In-ūi bān-mi̍h lóng chhut tī I, óa-khò I, kui tī I; goān I tit-tio̍h êng-kng ti̍t-kàu éng-oán. Amen!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan