Bìoball air-loidhne

Lô-má-su 1 - 現代台語譯本羅馬字版

Chhéng-an

¹ Góa sī Ki-tok Iâ-so͘ ê po̍k-jîn Pó-lô, hōng Siōng-tè soán-tiàu choh sù-tô͘, te̍k-phài lâi thoân I ê hok-im.

² Chit-ê hok-im sī Siōng-tè chá-chêng thong-kè I ê chèng sian-ti kì tī Sèng-keng ê èng-ún,

^3-4 teh kóng-khí I ê Kiáⁿ lán ê Chú Iâ-so͘ Ki-tok: Tùi jîn-sèng lâi kóng, I sī Tāi-pi̍t ê hō͘-tāi; tùi sèng-kiat ê sîn-sèng lâi kóng, Siōng-tè hō͘ I tùi sí-lâng tiong koh-oa̍h, ēng tōa lêng-le̍k hián-bêng I sī Siōng-tè ê Kiáⁿ.

⁵ Goán tùi I tit-tio̍h un-sù choh sù-tô͘, ūi-tio̍h Ki-tok ê miâ beh hō͘ bān-bîn sìn lâi sūn-thàn,

⁶ mā pau-hâm lín chiah-ê siū soán-tiàu kui-sio̍k Iâ-so͘ Ki-tok ê lâng.

⁷ Góa siá chit-tiuⁿ phoe hō͘ lín só͘-ū tòa tī Lô-má, Siōng-tè só͘ thiàⁿ, só͘ soán-tiàu choh I sìn-tô͘ ê lâng. Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an!

Kám-siā ê Kî-tó

⁸ Tāi-seng, góa thong-kè Iâ-so͘ Ki-tok ūi-tio̍h lín chèng-lâng kám-siā góa ê Siōng-tè, in-ūi lín ê sìn-tek í-keng thoân-piàn choân sè-kài.

⁹ Góa soan-iông I ê Kiáⁿ ê hok-im, ēng sim-lêng teh ho̍k-sāi hit-ūi Siōng-tè thang kā góa choh-chèng, góa siông-siông siàu-liām lín,

¹⁰ put-sî tī kî-tó tiong khún-kiû Siōng-tè chiàu I ê hó chí-ì kā góa khui-lō͘, hō͘ góa bô kú chiū ōe-tàng sūn-lī khì lín hia.

¹¹ Góa chin ài kìⁿ lín, thang kap lín hun-hióng chi̍t-kóa sio̍k-lêng ê un-sù, hō͘ lín kian-kiông;

¹² chiū-sī góa kàu lín tiong-kan ê sî, lín thong-kè góa ê sìn-gióng, góa thong-kè lín ê sìn-gióng, hō͘-siōng tit-tio̍h kó͘-lē.

¹³ Hiaⁿ-tī chí-bē, góa chin ài lín chai, góa chin chōe piàn kè-ōe beh khì lín hia, thang kap tī kî-tha Gōa-pang-lâng ê tiong-kan kâng-khoán, mā tī lín tiong-kan siu-sêng chi̍t-kóa ké-chí, m̄-kú kàu taⁿ iáu ū chó͘-tòng.

¹⁴ Bô-lūn sím-mi̍h khoán lâng, khai-hòa á-sī bī-khai-hòa--ê, ū tì-hūi á-sī bô tì-hūi--ê, góa lóng khiàm in ê chè.

¹⁵ Só͘-í, góa pek-chhiat ǹg-bāng mā ōe-tàng chiong hok-im thoân hō͘ lín tī Lô-má ê lâng.

Hok-im ê Tōa Lêng-le̍k

¹⁶ Góa bô khòaⁿ hok-im chòe kiàn-siàu, in-ūi chit-ê hok-im sī Siōng-tè ê tōa lêng-le̍k, beh chín-kiù só͘-ū sìn ê lâng, tāi-seng Iû-thài-lâng, āu-lâi Gōa-pang-lâng.

¹⁷ In-ūi chit-ê hok-im ū khé-sī Siōng-tè ê gī, chit-ê gī tùi thâu kàu bé lóng sī thong-kè sìn lâi tit-tio̍h. Chiàu Sèng-keng só͘ kì-chài, “Gī ê lâng ōe tùi sìn lâi oa̍h.”

Jîn-lūi ê Chōe

¹⁸ Siōng-tè tùi thiⁿ-téng hoat-chhut siū-khì, khiàn-chek só͘-ū put-khiân put-gī ê lâng; in ê put-gī chó͘-tòng lâng bat chin-lí.

¹⁹ In-ūi Siōng-tè ū tùi in hián-bêng I pún-sin, só͘-í in eng-kai tùi Siōng-tè ū chheng-chhó ê jīm-sek chiah tio̍h.

²⁰ Tùi chhòng-sè í-lâi, Siōng-tè éng-oán ê tōa lêng-le̍k kap sîn-sèng, sui-jiân jio̍k-gán khòaⁿ bōe tio̍h, m̄-kú thong-kè siū-chō ê mi̍h ōe-tàng chheng-chhó khòaⁿ--kìⁿ, só͘-í in lóng bōe-tàng the chek-jīm.

²¹ In-ūi in sui-jiân bat Siōng-tè ia̍h bô chun-tiōng I chòe Siōng-tè, mā bô kā I kám-siā; in ê su-siúⁿ hoán-tńg pìⁿ-chòe khang-khang, sim-su gû-gōng, chhiong-móa o͘-àm.

²² In chū-chheng chhong-bêng, kî-si̍t gû-gōng.

²³ In bô chiong êng-kng kui hō͘ bōe-sí-bia̍t ê Siōng-tè, hoán-tńg khì pài ōe-sí-bia̍t ê lâng, pe-chiáu, khîm-siù, thâng-thōa téng ê siōng.

²⁴ Só͘-í, Siōng-tè chhut-chāi in thàn ka-kī sim-lāi ê io̍k-bōng khì chòe bô chheng-khì ê tāi-chì, tì-kàu pí-chhú chau-that ka-kī ê sin-thé.

²⁵ In ēng hu-ké thòe-ōaⁿ Siōng-tè ê chin-lí. In kèng-pài, ho̍k-sāi pī-chō-bu̍t, bô kèng-pài hit-ūi Chō-bu̍t-chú — I chiah eng-kai éng-oán tit-tio̍h chheng-chàn. Amen!

²⁶ In-ūi án-ni, Siōng-tè chhut-chāi in hòng-chhiòng thang kiàn-siàu ê jio̍k-io̍k: Cha-bó͘-lâng kap cha-bó͘-lâng ēng ûi-hoán chū-jiân ê sèng-koan-hē tāi-thòe kap ta-po͘-lâng chū-jiân ê koan-hē;

²⁷ ta-po͘-lâng mā kâng-khoán pàng-sak kap cha-bó͘-lâng chū-jiân ê sèng-koan-hē, pí-chhú io̍k-hé-kong-sim; ta-po͘-lâng kap ta-po͘-lâng chòe kiàn-siàu ê tāi-chì, kiat-kó tio̍h siū phian-chha ê hêng-ûi kai siū ê pò-èng.

²⁸ Kì-jiân in bô beh chin-chiàⁿ jīn-bat Siōng-tè, Siōng-tè chiū chhut-chāi in ê sim-su pāi-hoāi, khì chòe bô eng-kai chòe ê tāi-chì.

²⁹ In chhiong-móa ta̍k-khoán ê put-gī, pháiⁿ-sim, tham-sim, ok-to̍k, móa-sim oàn-tò͘, bô͘-sat, tò͘-cheng, kan-chà, im-bô͘, kóng ka-chiah-āu-ōe,

³⁰ húi-pòng, oàn-hūn Siōng-tè, bú-jio̍k lâng, kiau-ngō͘, khoa-kháu, chè-chō sī-hui, ngó͘-ge̍k pē-bú,

³¹ bô bêng-lí, bô siú-iok, bô chêng, bô lîn-bín.

³² In sui-jiân chai, chiàu Siōng-tè kong-gī ê phòaⁿ-toàn, chòe chiah-ê tāi-chì ê lâng eng-kai sí; in m̄-nā ka-kī chòe, sīm-chì mā chàn-sêng pa̍t-lâng án-ni chòe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan