Bìoball air-loidhne

Khé-sī-lio̍k 9 - 現代台語譯本羅馬字版

¹ Tē-gō͘ ê thiⁿ-sài pûn i ê lat-pah, góa ū khòaⁿ-tio̍h tùi thiⁿ-téng lak lo̍h-lâi tōe-bīn hit-lia̍p chhiⁿ; chit-lia̍p chhiⁿ ū niá-siū bô-tóe-chhim-khiⁿ ê só-sî.

² I khui bô-tóe-chhim-khiⁿ, chiū ū tōa hé-lô͘ ê ian chhèng--khí-lâi. Ji̍t-thâu kap thài-khong in-ūi Chhim-khiⁿ ê ian chiū pìⁿ o͘-àm.

³ Chháu-meh tùi ian ê lāi-bīn chhut-lâi hioh tī tōe-bīn; in niá-siū koân-pèng chhin-chhiūⁿ tōe-chiūⁿ ê giat-á-thâng ū ê koân-pèng.

⁴ In siū kau-tài m̄-thang siong-hāi tōe-chiūⁿ ê chháu, ta̍k-chióng ê chhiū-ba̍k, kap it-chhè chhiⁿ-chhùi ê mi̍h, chí-ū thang siong-hāi thâu-hia̍h bô khàm Siōng-tè ê ìn ê lâng.

⁵ Chháu-meh bô tit-tio̍h koân thang thâi-sí chiah-ê lâng, chí-ū thang hō͘ in siū thòng-khó͘ gō͘ ge̍h-ji̍t kú; in ê thòng-khó͘ chhin-chhiūⁿ lâng hō͘ giat-á-thâng kā--tio̍h ê thòng-khó͘.

⁶ Chiah-ê ji̍t ê tiong-kan, lâng ōe kiû sí mā bōe tit sí, ài sí mā sí bōe khì.

⁷ Chháu-meh ê hêng-chōng chhin-chhiūⁿ chún-pī beh chhut-chiàn ê bé; in ê thâu-khak téng tì chhin-chhiūⁿ kim ê hoa-koan; in ê bīn chhin-chhiūⁿ lâng ê bīn;

⁸ in ê thâu-mn̂g chhin-chhiūⁿ hū-jîn-lâng ê thâu-mn̂g; in ê gê chhin-chhiūⁿ sai ê gê;

⁹ in ê heng-khám chhēng chhin-chhiūⁿ thih ê hō͘-heng-kah; in ê si̍t hoat-chhut ê siaⁿ chhin-chhiūⁿ chin chōe chiàn-bé thoa-chhia phun-pháu beh khì kau-chiàn ê siaⁿ.

¹⁰ In ū bé-liu chhin-chhiūⁿ giat-á-thâng ê bé-liu ū chhì; in ê bé-liu ū lêng-le̍k thang siong-hāi lâng gō͘ ge̍h-ji̍t kú.

¹¹ In ê ông sī koán-hat bô-tóe-chhim-khiⁿ ê thiⁿ-sài; i ê miâ Hi-pek-lâi-gú kiò-chòe A-pa-tùn, Hi-la̍h-gú kiò-chòe A-po-lûn, ì-sù sī Húi-bia̍t-chiá.

¹² Thâu chi̍t ê chai-hō í-keng kè--khì; iáu ū nn̄g ê chai-hō teh-beh lâi.

¹³ Tē-la̍k ê thiⁿ-sài pûn i ê lat-pah, góa thiaⁿ-kìⁿ ū siaⁿ tùi Siōng-tè bīn-chêng ê kim chè-tôaⁿ hit sì ki kak chhut--lâi,

¹⁴ kā gia̍h lat-pah ê tē-la̍k ê thiⁿ-sài kóng, “Lí tio̍h chiong koaiⁿ tī Iù-hoat-la-tí-hô hit sì ê thiⁿ-sài pàng--chhut-lâi.”

¹⁵ Chit sì ê thiⁿ-sài siū tháu-pàng, sī chá chiū an-pâi hó-sè, tī tiāⁿ-tio̍h ê nî, ge̍h, ji̍t, kap sî beh sat-hāi jîn-lūi ê saⁿ-hūn-chi̍t.

¹⁶ Góa ū thiaⁿ-kóng bé-peng ê sò͘-bo̍k lóng-chóng ū nn̄g-ek.

¹⁷ Tī īⁿ-siōng tiong, góa só͘ khòaⁿ--kìⁿ ê bé kap khiâ-bé ê lâng sī án-ni: In chhēng ū hé-iām, nâ-pó-chio̍h, kap liû-hông ê sek-tì ê hō͘-heng-kah. In ê bé ê thâu chhin-chhiūⁿ sai ê thâu, tùi in ê chhùi thò͘-chhut hé, ian, kap liû-hông.

¹⁸ Jîn-lūi ê saⁿ-hūn-chi̍t hō͘ bé ê chhùi thò͘--chhut-lâi ê hé, ian, kap liû-hông chit saⁿ hāng chai-hāi húi-bia̍t.

¹⁹ Chiah-ê bé ê lêng-le̍k sī tī in ê chhùi kap bé-liu; in ê bé-liu chhin-chhiūⁿ chôa ū thâu, ēng chiah-ê thâu siong-hāi lâng.

²⁰ Kî-tha só͘ chhun--ê chiū-sī chiah-ê bô siū chai-hō sat-hāi ê lâng. In iáu bô hoán-hóe, bô pàng-sak in ê chhiú só͘ chō ê ngó͘-siōng; in chiàu-siông pài chiah-ê kúi, kap hiah-ê bōe khòaⁿ, bōe thiaⁿ, bōe kiâⁿ, ēng kim, gûn, tâng, chio̍h, chhâ chō ê ngó͘-siōng.

²¹ In mā bô hoán-hóe, bô pàng-sak in hiong-sat, siâ-su̍t, îm-loān, thau-the̍h ê hêng-ûi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan