Bìoball air-loidhne

Khé-sī-lio̍k 7 - 現代台語譯本羅馬字版

Cha̍p-sì-bān Sì-chheng Ê Í-sek-lia̍t-lâng

¹ Āu-lâi, góa ū khòaⁿ-kìⁿ sì ê thiⁿ-sài khiā tī tōe ê sì kak-thâu, chiong tōe sì-bīn ê hong cha̍h--khí-lâi, hō͘ hong bōe chhe-tio̍h tōe, hái, kap it-chhè ê chhiū-ba̍k.

² Góa koh khòaⁿ-kìⁿ lēng-gōa chi̍t ê thiⁿ-sài the̍h éng-oa̍h Siōng-tè ê ìn, tùi ji̍t chhut ê só͘-chāi chiūⁿ--lâi; i tùi ū niá-siū koân-pèng thang siong-hāi tōe kap hái hit sì ê thiⁿ-sài tōa-siaⁿ hoah,

³ kóng, “Goán iáu-bē tī Siōng-tè po̍k-jîn ê thâu-hia̍h khàm-ìn í-chêng, m̄-thang siong-hāi tōe, hái, kap chhiū-ba̍k.”

⁴ Góa thiaⁿ--kìⁿ, tī Í-sek-lia̍t ta̍k-ê chi-cho̍k tiong siū khàm-ìn ê lâng lóng-chóng ū cha̍p-sì-bān sì-chheng.

⁵ Sio̍k Iû-tāi chi-cho̍k siū khàm-ìn ê lâng ū chi̍t-bān nn̄g-chheng; sio̍k Lū-piān chi-cho̍k ê lâng ū chi̍t-bān nn̄g-chheng; sio̍k Ka-tek chi-cho̍k ê lâng ū chi̍t-bān nn̄g-chheng;

⁶ sio̍k A-siat chi-cho̍k ê lâng ū chi̍t-bān nn̄g-chheng; sio̍k Ná-hut-tha-lī chi-cho̍k ê lâng ū chi̍t-bān nn̄g-chheng; sio̍k Má-ná-se chi-cho̍k ê lâng ū chi̍t-bān nn̄g-chheng;

⁷ sio̍k Se-biān chi-cho̍k ê lâng ū chi̍t-bān nn̄g-chheng; sio̍k Lī-bī chi-cho̍k ê lâng ū chi̍t-bān nn̄g-chheng; sio̍k Í-sat-ka chi-cho̍k ê lâng ū chi̍t-bān nn̄g-chheng;

⁸ sio̍k Se-pò͘-lûn chi-cho̍k ê lâng ū chi̍t-bān nn̄g-chheng; sio̍k Iok-sek chi-cho̍k ê lâng ū chi̍t-bān nn̄g-chheng; sio̍k Piān-ngá-bín chi-cho̍k siū khàm-ìn ê lâng ū chi̍t-bān nn̄g-chheng.

Tùi Ta̍k Só͘-chāi Lâi ê Chi̍t Tōa-kûn Lâng

⁹ Āu-lâi, góa koh khòaⁿ, ū khòaⁿ-kìⁿ chi̍t tōa-kûn lâng, bô lâng ōe-tàng kè-sǹg in ê sò͘-bo̍k, sī tùi ta̍k-kok, ta̍k cho̍k-kûn, ta̍k bîn-cho̍k, kóng ta̍k-khoán gú-giân ê lâng lâi--ê, lóng khiā tī pó-chō kap Iûⁿ-ko ê bīn-chêng, chhēng pe̍h-saⁿ, chhiú gia̍h chang-chhiū-ki.

¹⁰ In tōa-siaⁿ hoah: Goān chín-kiù kui tī chē tī pó-chō ê lán ê Siōng-tè, mā kui tī Iûⁿ-ko!

¹¹ Só͘-ū ê thiⁿ-sài lóng khiā tī pó-chō, tiúⁿ-ló, kap sì ê oa̍h-mi̍h ê chiu-ûi, in tī pó-chō chêng, bīn phak lo̍h-khì kèng-pài Siōng-tè,

¹² kóng: Amen! Goān siōng-chàn, êng-kng, tì-hūi, kám-siā, chun-kùi, koân-lêng, khùi-la̍t, kui tī lán ê Siōng-tè, kàu éng-éng-oán-oán. Amen!

¹³ Tiúⁿ-ló tiong ū chi̍t ê mn̄g góa kóng, “Chiah-ê chhēng pe̍h-saⁿ--ê sī sím-mi̍h-lâng? In tùi tó-ūi lâi?”

¹⁴ Góa ìn kóng, “Sian-siⁿ, lí chai.” Āu-lâi i kā góa kóng, “Chiah-ê lâng sī keng-kè tōa chai-lān chhut--lâi-ê, in ū sóe in ê saⁿ, ēng Iûⁿ-ko ê huih sóe kàu pe̍h.

¹⁵ Só͘-í, in tī Siōng-tè ê pó-chō chêng, mî-ji̍t tī I ê sèng-tiān ho̍k-sāi I; chē tī pó-chō Hit-ūi beh pó-hō͘ in.

¹⁶ In bōe koh iau, bōe koh chhùi-ta; ji̍t-thâu kap iām-jia̍t lóng bōe siong-hāi in.

¹⁷ Tī pó-chō tiong ê Iûⁿ-ko beh chòe in ê bo̍k-chiá; I beh chhōa in kàu oa̍h-miā-chúi ê chôaⁿ-goân; Siōng-tè beh tùi in ê ba̍k-chiu chhit-khì lóng-chóng ê ba̍k-sái.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan