Bìoball air-loidhne

Khé-sī-lio̍k 6 - 現代台語譯本羅馬字版

Khui Hong-ìn

¹ Iûⁿ-ko khui chhit ê hong-ìn ê chi̍t ê ê sî, góa koh khòaⁿ, góa ū thiaⁿ-kìⁿ sì ê oa̍h-mi̍h ê chi̍t ê, i ê siaⁿ chhin-chhiūⁿ lûi ê siaⁿ, kóng, “Lâi!”

² Góa khòaⁿ ê sî, ū khòaⁿ-tio̍h chi̍t chiah pe̍h-bé, khiâ-bé ê lâng gia̍h keng; i niá-siū hoa-koan chhut-hoat, ūi-tio̍h beh pek-chiàn-pek-sèng.

³ Iûⁿ-ko khui tē-jī ê hong-ìn ê sî, góa ū thiaⁿ-kìⁿ tē-jī ê oa̍h-mi̍h kóng, “Lâi!”

⁴ Hit-sî ū pa̍t-chiah bé chhut--lâi, sī chhiah-sek--ê; khiâ-bé ê lâng ū niá-siū koân-pèng thang tùi tōe-chiūⁿ chhiúⁿ-toa̍t hô-pêng, hō͘ lâng hō͘-siōng chân-sat; i ū koh niá-siū chi̍t ki tōa-ki kiàm.

⁵ Iûⁿ-ko khui tē-saⁿ ê hong-ìn ê sî, góa ū thiaⁿ-kìⁿ tē-saⁿ ê oa̍h-mi̍h kóng, “Lâi!” Góa khòaⁿ ê sî, ū khòaⁿ-tio̍h chi̍t chiah o͘-bé, khiâ-bé ê lâng chhiú the̍h chhìn-á.

⁶ Góa thiaⁿ-kìⁿ ká-ná ū siaⁿ tùi sì ê oa̍h-mi̍h tiong-kan hoat-chhut kóng, “Chi̍t ji̍t ê kang-chîⁿ chí-ū thang bóe chi̍t kong-seng sió-be̍h; chi̍t ji̍t ê kang-chîⁿ chí-ū thang bóe saⁿ kong-seng tōa-be̍h; kaⁿ-ná-iû kap chiú m̄-thang phah-sńg.”

⁷ Iûⁿ-ko khui tē-sì ê hong-ìn ê sî, góa ū thiaⁿ-kìⁿ tē-sì ê oa̍h-mi̍h kóng, “Lâi!”

⁸ Góa khòaⁿ ê sî, ū khòaⁿ-tio̍h chi̍t chiah hé-hu-sek ê bé, khiâ-bé ê lâng miâ kiò-chòe Sí-bông, Im-hú tè tī āu-bīn; in ū niá-siū koân-pèng thang koán-hat tōe-chiūⁿ sì-hūn-chi̍t ê thó͘-tōe, ēng to-kiàm, ki-hng, un-e̍k, kap tōe-chiūⁿ ê iá-siù khì sat-hāi lâng.

⁹ Iûⁿ-ko khui tē-gō͘ ê hong-ìn ê sî, góa khòaⁿ-kìⁿ chè-tôaⁿ ē ū ūi-tio̍h Siōng-tè ê ōe kap ūi-tio̍h chòe kiàn-chèng siū sat-hāi ê lâng ê lêng-hûn.

¹⁰ In tōa-siaⁿ âu-kiò kóng, “Sèng koh chin ê Chú-cháiⁿ ah, tio̍h koh jōa kú lí chiah beh sím-phòaⁿ tōe-chiūⁿ ê lâng, thang ūi-tio̍h goán só͘ lâu ê huih sin-oan?”

¹¹ Ta̍k-ê lâng chiū niá-siū chi̍t niá pe̍h-saⁿ, koh ū siaⁿ kā in kóng, tio̍h koh thèng-hāu chi̍t-sî-á kú, kàu pîⁿ-pîⁿ chòe po̍k-jîn ê lâng í-ki̍p in ê hiaⁿ-tī chí-bē, chiū-sī teh-beh kap in siâng-khoán siū sat-hāi ê lâng ê sò͘-bo̍k móa ê sî.

¹² Āu-lâi góa khòaⁿ-kìⁿ Iûⁿ-ko khui tē-la̍k ê hong-ìn ê sî, hut-jiân tōe tōa tín-tāng, ji̍t-thâu pìⁿ-chòe chhin-chhiūⁿ o͘ môa-pò͘ hiah-ni̍h o͘, ge̍h kui-ê pìⁿ-chòe chhin-chhiūⁿ huih hiah-ni̍h âng;

¹³ thiⁿ-téng ê chhiⁿ tūi-lo̍h tōe, chhin-chhiūⁿ bû-hoa-kó-chhiū hō͘ tōa-hong sàu tín-tāng, iáu-bē sek ê ké-chí lóng lak-liáu-liáu.

¹⁴ Thiⁿ siau-sit, chhin-chhiūⁿ chi̍t kńg chheh kńg--khí-lâi; soaⁿ kap hái-tó lóng sóa lī-khui goân-ūi.

¹⁵ Tōe-chiūⁿ ê kun-ông, thóng-tī-chiá, chiòng-léng, ū-chîⁿ--ê, ū-sè--ê, it-chhè chòe lô͘-lē--ê, kap chū-iû--ê lóng khì bih tī tōng-lāi kap soaⁿ-giâm tiong-kan ê phāng.

¹⁶ In ǹg soaⁿ-niá kap soaⁿ-giâm hoah kóng, “Tó lo̍h-lâi kā goán khàm--teh, hō͘ goán thang siám-pī chē tī pó-chō Hit-ūi ê bīn kap Iûⁿ-ko ê siū-khì.

¹⁷ In-ūi in siū hêng-hoa̍t ê tōa Ji̍t-chí kàu lah, sím-mi̍h-lâng khiā ōe tiâu?”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan