Bìoball air-loidhne

Khé-sī-lio̍k 5 - 現代台語譯本羅馬字版

Chheh kap Iûⁿ-ko

¹ Góa khòaⁿ-kìⁿ chē tī pó-chō Hit-ūi ê chiàⁿ-chhiú ū chi̍t kńg chheh, lāi-bīn gōa-bīn lóng ū siá-jī, ēng chhit ê ìn hong--teh.

² Góa koh khòaⁿ-kìⁿ chi̍t ê ū tōa khùi-la̍t ê thiⁿ-sài, tōa-siaⁿ soan-pò͘ kóng, “Sím-mi̍h-lâng ū chu-keh thang thí-khui hit-kńg chheh, thiah-khui chheh ê hong-ìn?”

³ Tī thiⁿ-téng, tī tōe-chiūⁿ, tī tōe-ē, lóng bô lâng ōe-tàng thí-khui á-sī tha̍k hit-kńg chheh.

⁴ Chhē bô chi̍t ê lâng ū chu-keh thí-khui á-sī tha̍k hit-kńg chheh, góa chiū tōa-siaⁿ khàu.

⁵ Tiúⁿ-ló ê tiong-kan ū chi̍t ê tùi góa kóng, “M̄-thang khàu. Lí khòaⁿ, tùi Iû-tāi chi-cho̍k chhut--lâi ê Sai, Tāi-pi̍t ê Kun, í-keng tek-sèng, ōe-tàng khui hit-kńg chheh kap hit chhit ê hong-ìn.”

⁶ Āu-lâi góa khòaⁿ-kìⁿ Iûⁿ-ko khiā tī pó-chō chêng, ū sì ê oa̍h-mi̍h kap hiah-ê tiúⁿ-ló kā I ûi--teh. Iûⁿ-ko ká-ná bat siū sat-hāi, ū chhit ki kak, chhit lúi ba̍k-chiu, chiū-sī siū chhe-khián khì phó͘-thiⁿ-ē Siōng-tè ê chhit ê sîn.

⁷ Iûⁿ-ko chiū chìn-chêng, tùi chē tī pó-chō Hit-ūi ê chiàⁿ-chhiú the̍h hit-kńg chheh.

⁸ I the̍h--tio̍h ê sî, hit sì ê oa̍h-mi̍h kap jī-cha̍p-sì ê tiúⁿ-ló lóng phak tī Iûⁿ-ko ê bīn-chêng, ta̍k-ê ū the̍h khîm kap tóe-móa hiuⁿ ê kim-lô͘; hiuⁿ chiū-sī sìn-tô͘ ê kî-tó.

⁹ In gîm chi̍t siú sin ê si, kóng: Lí ū chu-keh the̍h hit-kńg chheh, thiah-khui i ê hong-ìn; in-ūi lí ū siū sat-hāi, ēng lí ê huih tùi ta̍k-ê cho̍k-kûn, ta̍k-chióng gú-giân, ta̍k-ê bîn-cho̍k, ta̍k-ê pang-kok sio̍k-hôe lâng kui Siōng-tè.

¹⁰ Lí hō͘ in chiâⁿ-chòe kok-tō͘ kap chè-si lâi ho̍k-sāi lán ê Siōng-tè; in ōe tī tōe-chiūⁿ chiáng-koân.

¹¹ Góa koh khòaⁿ, góa ū thiaⁿ-kìⁿ chheng-chheng-bān-bān thiⁿ-sài ê siaⁿ-im. In lóng ûi tī pó-chō, oa̍h-mi̍h, í-ki̍p tiúⁿ-ló ê chiu-ûi,

¹² tōa-siaⁿ kóng: Siū sat-hāi ê Iûⁿ-ko eng-kai tit-tio̍h koân-lêng, hù-jū, tì-hūi, khùi-la̍t, chun-kùi, êng-kng, kap chheng-chàn.

¹³ Góa koh thiaⁿ--kìⁿ, tī thiⁿ-téng, tī tōe-chiūⁿ kap tōe-ē, hái--ni̍h kap ú-tiū tiong it-chhè ê pī-chō-bu̍t lóng kóng: Goān chheng-chàn, chun-kùi, êng-kng, koân-sè, lóng kui hō͘ chē tī pó-chō Hit-ūi kap Iûⁿ-ko, tāi-tāi-bû-chīn!

¹⁴ Hit sì ê oa̍h-mi̍h ìn kóng, “Amen!” Hiah-ê tiúⁿ-ló chiū phak lo̍h-khì kèng-pài.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan