Bìoball air-loidhne

Khé-sī-lio̍k 3 - 現代台語譯本羅馬字版

Hō͘ Sat-te̍k ê Kàu-hōe ê Phoe

¹ “Lí tio̍h siá-phoe hō͘ Sat-te̍k ê kàu-hōe ê thiⁿ-sài, kóng, “‘Ū Siōng-tè ê chhit ê sîn kap chhit lia̍p chhiⁿ Hit-ūi án-ni kóng: Góa chai lí ê hêng-ûi, lâng kóng lí teh oa̍h, kî-si̍t lí sī sí.

² Tio̍h chhíⁿ--khí-lâi, ka-kiông teh-beh bô--khì ê khùi-si-á, in-ūi góa khòaⁿ, tī góa ê Siōng-tè bīn-chêng, lí ê hêng-ûi iáu bô oân-choân.

³ Só͘-í, tio̍h ōe-kì-tit lí só͘ niá-siū, só͘ thiaⁿ--tio̍h-ê; tio̍h chun-siú, tio̍h hóe-kái. Lí nā bô chhíⁿ--khí-lâi, góa ōe chhin-chhiūⁿ chha̍t lâi; lí it-tēng m̄ chai góa sím-mi̍h sî ōe lâi kàu lí hia.

⁴ M̄-kú, tī Sat-te̍k iáu ū chi̍t-kóa lâng in ê saⁿ bô phah lâ-sâm, in ōe chhēng pe̍h-saⁿ kap góa chòe-hé kiâⁿ, in-ūi in ōe-kham--tit.

⁵ “‘Tek-sèng ê lâng siâng-khoán ōe chhēng pe̍h-saⁿ; góa it-tēng bōe tùi oa̍h-miā-chheh kā i tû-miâ. Góa ōe tī góa ê Pē kap hiah-ê thiⁿ-sài bīn-chêng kong-khai jīn i ê miâ.

⁶ “‘Ū hī-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.’”

Hō͘ Hui-la-thiat-hui ê Kàu-hōe ê Phoe

⁷ “Lí tio̍h siá-phoe hō͘ Hui-la-thiat-hui ê kàu-hōe ê thiⁿ-sài, kóng, “‘Sèng-kiat koh chin-si̍t, chiáng-ak Tāi-pi̍t ê só-sî, khui chiū bô lâng ōe-tàng koaiⁿ, koaiⁿ chiū bô lâng ōe-tàng khui Hit-ūi án-ni kóng:

⁸ Góa chai lí ê hêng-ûi, lí khòaⁿ, góa í-keng tī lí ê bīn-chêng kā lí khui chi̍t ê mn̂g, sī bô lâng ōe-tàng koaiⁿ--ê; góa chai lí kan-ta ū tām-po̍h khùi-la̍t, khiok ū siú góa ê tō-lí, m̄-bat hó͘-jīn góa ê miâ.

⁹ Lí khòaⁿ, Sat-tàn ê chi̍p-thoân, in chū-chheng Iû-thài-lâng, kî-si̍t m̄-sī, sī hiah-ê kóng pe̍h-chha̍t--ê; lí khòaⁿ, góa beh hō͘ in lâi phak tī lí ê kha-chêng, in chiū chai góa ū thiàⁿ lí.

¹⁰ In-ūi lí ū chun-siú góa ê tō-lí thun-lún kàu lō͘-bé, góa mā beh pó-siú lí thoat-lī hit-ê chhì-liān ê sî, chit-ê sî teh-beh lîm-kàu choân sè-kài, lâi khó-giām tòa tī tōe-chiūⁿ ê lâng.

¹¹ Góa liâm-piⁿ kàu; lí só͘-ū--ê tio̍h kian-siú, chiah bián ū lâng kā lí ê hoa-koan the̍h--khì.

¹² “‘Tek-sèng ê lâng, góa beh hō͘ i chiâⁿ-chòe góa ê Siōng-tè tiān-lāi ê thiāu; i éng-oán bōe koh lī-khui. Góa beh chiong góa ê Siōng-tè ê miâ, í-ki̍p góa ê Siōng-tè ê siâⁿ, chiū-sī tùi thiⁿ-téng góa ê Siōng-tè hia kàng-lo̍h sin ê Iâ-lō͘-sat-léng ê miâ, kap góa sin ê miâ, lóng siá tī i téng-bīn.

¹³ “‘Ū hī-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.’”

Hō͘ Ló-tí-ka ê Kàu-hōe ê Phoe

¹⁴ “Lí tio̍h siá-phoe hō͘ Ló-tí-ka ê kàu-hōe ê thiⁿ-sài, kóng, “‘Hit-ūi Amen, tiong-sìn koh sìn-si̍t ê kiàn-chèng-jîn, Siōng-tè chhòng-chō ê kun-goân, án-ni kóng:

¹⁵ Góa chai lí ê hêng-ûi, lí bô léng bô sio. Góa khah ài lí khòaⁿ sī sio á-sī léng.

¹⁶ Kì-jiân lí la-lûn-sio, m̄-chiâⁿ sio m̄-chiâⁿ léng, góa teh-beh tùi góa ê chhùi kā lí phùi--chhut-khì.

¹⁷ In-ūi lí kóng: Góa hó-gia̍h, í-keng tōa hoat-châi, lóng bô khiàm-kheh. Lí khiok m̄ chai lí pi-chhám, khó-lîn, sàn-chhiah, sit-bêng, koh chhiah-sin-lō͘-thé.

¹⁸ Góa khǹg lí tùi góa bóe keng-kè hé thoàn-liān ê kim, thang hō͘ lí hó-gia̍h; koh bóe pe̍h ê saⁿ khì chhēng, chiah bián hō͘ lâng khòaⁿ-tio̍h lí thǹg-theh ê kiàn-siàu; mā bóe io̍h-ko boah lí ê ba̍k-chiu, hō͘ lí ōe khòaⁿ--kìⁿ.

¹⁹ Góa só͘ thiàⁿ ê lâng, góa lóng kā in chek-pī kap koán-kàu. Só͘-í, tio̍h jia̍t-sim, tio̍h hoán-hóe.

²⁰ Lí khòaⁿ, góa í-keng khiā tī mn̂g-gōa teh phah-mn̂g; thiaⁿ-kìⁿ góa ê siaⁿ lâi khui-mn̂g ê lâng, góa beh ji̍p-khì chhē i, kap i chòe-hé chia̍h, i mā kap góa chòe-hé chia̍h.

²¹ “‘Tek-sèng ê lâng, góa beh hō͘ i kap góa chòe-hé chē tī góa ê pó-chō, chhin-chhiūⁿ góa í-keng tek-sèng kap góa ê Pē chòe-hé chē tī I ê pó-chō.

²² “‘Ū hī-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.’”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan