Bìoball air-loidhne

Khé-sī-lio̍k 16 - 現代台語譯本羅馬字版

Siōng-tè Siū-khì ê Óaⁿ

¹ Āu-lâi, góa thiaⁿ-kìⁿ ū tōa ê siaⁿ tùi sèng-tiān chhut-lâi kā hit chhit ê thiⁿ-sài kóng, “Lín khì chiong hit chhit óaⁿ Siōng-tè ê siū-khì piàⁿ-lo̍h tōe.”

² Thâu chi̍t ê thiⁿ-sài chiū khì, chiong i hit-óaⁿ piàⁿ-lo̍h tōe, hiah-ê ū siù ê kì-hō kap pài-kè siù ê siōng ê lâng chiū siⁿ chhàu koh to̍k ê chhng.

³ Tē-jī ê thiⁿ-sài chiong i hit-óaⁿ piàⁿ-lo̍h hái, hái-chúi chiū pìⁿ-chòe chhin-chhiūⁿ sí-lâng ê huih, hái--ni̍h ê oa̍h-mi̍h lóng sí--khì.

⁴ Tē-saⁿ ê thiⁿ-sài chiong i hit-óaⁿ piàⁿ-lo̍h kang-hô kap chúi-chôaⁿ, chúi chiū pìⁿ-chòe huih.

⁵ Góa thiaⁿ-kìⁿ chiáng-koán chúi ê thiⁿ-sài kóng: Hiān-chāi chûn-chāi, kè-khì chûn-chāi, chì-sèng ê Siōng-tè, lí sī kong-gī, lí ê sím-phòaⁿ kong-chèng.

⁶ In-ūi in ū lâu sìn-tô͘ kap sian-ti ê huih, hiān-chāi lí ēng huih hō͘ in lim; che sī in èng-siū ê pò-èng.

⁷ Āu-lâi góa thiaⁿ-kìⁿ chè-tôaⁿ ū siaⁿ kóng: Sī lah, Choân-lêng ê Chú Siōng-tè, lí ê sím-phòaⁿ chin-si̍t kong-gī.

⁸ Tē-sì ê thiⁿ-sài chiong i hit-óaⁿ piàⁿ tī ji̍t-thâu, ji̍t-thâu chiū tit-tio̍h koân ēng iām-hé sio lâng.

⁹ Lâng hō͘ tōa iām-hé sio chiū siat-to̍k ū koân chiáng-koán chiah-ê chai-hō ê Siōng-tè ê miâ; in iáu-kú bô hóe-kái, bô kui êng-kng hō͘ Siōng-tè.

¹⁰ Tē-gō͘ ê thiⁿ-sài chiong i hit-óaⁿ piàⁿ tī hit-chiah siù ê chō-ūi, siù ê ông-kok chiū pìⁿ-chòe o͘-àm, lâng in-ūi thòng-khó͘ kā-chi̍h,

¹¹ koh in-ūi thòng-khó͘ kap to̍k-chhng siat-to̍k thiⁿ-téng ê Siōng-tè; in iáu-kú bô hóe-kái lâi kái-piàn in ê só͘-chòe.

¹² Tē-la̍k ê thiⁿ-sài chiong i hit-óaⁿ piàⁿ-lo̍h Iù-hoat-la-tí tōa-hô, hô-chúi chiū ta--khì, ūi-tio̍h tùi tang-hng lâi hiah-ê kun-ông chún-pī chi̍t tiâu lō͘.

¹³ Góa koh khòaⁿ-kìⁿ ū saⁿ ê bô chheng-khì ê sîn, chhin-chhiūⁿ chhân-kap-á, tùi ok-lêng ê chhùi, siù ê chhùi, kap ké sian-ti ê chhùi chhut--lâi.

¹⁴ Chiah-ê sī ōe kiâⁿ kî-chek ê ok-mô͘ ê sîn, in chhut-khì chio-chi̍p phó͘-thiⁿ-ē ê kun-ông, tī Choân-lêng ê Siōng-tè só͘ tiāⁿ-tio̍h hit-ê tōa Ji̍t-chí chhut-lâi kau-chiàn.

¹⁵ “Tio̍h chù-ì! Góa ōe chhin-chhiūⁿ chha̍t lâi. Hit-ê chhíⁿ-chhíⁿ, saⁿ chhēng piān-piān ê lâng chin ū hok-khì, i sî kàu m̄-bián thǹg-theh kiâⁿ, chiah bián hō͘ lâng khòaⁿ-tio̍h i chhiah-sin-lō͘-thé ê kiàn-siàu.”

¹⁶ Hiah-ê ok-mô͘ ê sîn chiū chū-chi̍p phó͘-thiⁿ-ē ê kun-ông tī chi̍t ê só͘-chāi, Hi-pek-lâi-ōe kiò-chòe Hap-má-ge̍k-tùn.

¹⁷ Tē-chhit ê thiⁿ-sài chiong i hit-óaⁿ piàⁿ tī khong-tiong, chiū ū tōa ê siaⁿ tùi sèng-tiān ê pó-chō hoat-chhut, kóng, “Oân-sêng lah!”

¹⁸ Hit-sî ū sih-nà, hiáng-siaⁿ, lûi, kap tōa tōe-tāng; tōe-chiūⁿ ū jîn-lūi í-lâi m̄-bat ū chiah-ni̍h tōa ê tōe-tāng.

¹⁹ Hit-ê tōa-siâⁿ Pa-pí-lûn chiū li̍h-chòe saⁿ tè, lia̍t-kok ê siâⁿ-chhī mā tó-hoāi. Siōng-tè ōe-kì-tit tōa Pa-pí-lûn-siâⁿ, hō͘ i lim hit-poe tóe Siōng-tè ke̍k-tōa siū-khì ê chiú.

²⁰ Só͘-ū ê hái-tó lóng cháu bô--khì, soaⁿ mā bô koh khòaⁿ--kìⁿ.

²¹ Jiân-āu tùi thiⁿ-téng ū lo̍h tōa-pha̍uh lâi tìm lâng, ta̍k-tè tāng iok gō͘-cha̍p kong-kun, lâng ūi-tio̍h pha̍uh ê chai-hō siat-to̍k Siōng-tè, in-ūi chit-ê chai-hō hui-siông giâm-tiōng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan