Bìoball air-loidhne

Khé-sī-lio̍k 11 - 現代台語譯本羅馬字版

Nn̄g Ê Kiàn-chèng-jîn

¹ Góa ū niá-siū chi̍t ki chhioh, hêng chhin-chhiūⁿ koáiⁿ-á, koh ū siaⁿ tùi góa kóng, “Khí--lâi, khì niû Siōng-tè ê sèng-tiān kap chè-tôaⁿ, koh sǹg tiān-lāi kèng-pài ê jîn-sò͘.

² M̄-kú, sèng-tiān gōa-kháu ê tiâⁿ m̄-thang niû, in-ūi gōa-tiâⁿ í-keng kau hō͘ Gōa-pang-lâng; in ōe thún-ta̍h Sèng-siâⁿ sì-cha̍p-jī ge̍h-ji̍t kú.

³ Góa beh chún góa nn̄g ê kiàn-chèng-jîn chhēng môa-saⁿ, ū koân thoân-tō chi̍t-chheng nn̄g-pah la̍k-cha̍p ji̍t kú.”

⁴ Chit nn̄g ê kiàn-chèng-jîn chiū-sī khiā tī choân-tōe ê Chú bīn-chêng ê nn̄g châng kaⁿ-ná-chhiū kap nn̄g ki teng-tâi.

⁵ Nā ū lâng beh hāi in, in ōe tùi chhùi thò͘-chhut hé, chiong tùi-te̍k sio-bia̍t; nā ū lâng beh hāi in, it-tēng ōe án-ni siū sat-hāi.

⁶ Chit nn̄g ê kiàn-chèng-jîn ū koân thang koaiⁿ thiⁿ, hō͘ in thoân-tō ê kî-kan bô lo̍h-hō͘; in mā ū koân chiáng-koán chúi, hō͘ i pìⁿ-chòe huih; koh chiàu in só͘ ài thang put-koán-sî kàng ta̍k-chióng chai-hāi kong-kek tāi-tōe.

⁷ In kiàn-chèng oân-sêng liáu-āu, tùi bô-tóe-chhim-khiⁿ chiūⁿ--lâi hit-chiah siù ōe kap in kau-chiàn, chiong in cheng-ho̍k, kā in thâi-sí.

⁸ In ê sin-si ōe tó tī tōa siâⁿ-chhī ê koe-lō͘; chit-ê siâⁿ-chhī lâng kā i pí-phēng chòe Só͘-to-má á-sī Ai-ki̍p; in ê Chú mā tī hia hō͘ lâng tèng si̍p-jī-kè.

⁹ Saⁿ ji̍t pòaⁿ kú, tùi ta̍k-ê bîn-cho̍k, ta̍k-ê cho̍k-kûn, ta̍k-khoán gú-giân, ta̍k-ê pang-kok, ū lâng ōe lâi khòaⁿ in ê sin-si, m̄-chún lâng kā in bâi-chòng tī bōng--ni̍h.

¹⁰ Tòa tī tōe-bīn-chiūⁿ ê lâng ōe in-ūi in ê sí lâi hoaⁿ-hí khoài-lo̍k, kau-ōaⁿ lé-mi̍h; in-ūi chit nn̄g ê sian-ti ū hō͘ tōe-chiūⁿ ê lâng siū-tio̍h khó͘-chhó͘.

¹¹ Saⁿ ji̍t pòaⁿ kè-liáu, tùi Siōng-tè hia ū oa̍h-khì ji̍p-khì in lāi-bīn, in chiū peh khí-lâi khiā; khòaⁿ--tio̍h ê lâng tōa kiaⁿ-hiâⁿ.

¹² In nn̄g lâng thiaⁿ-kìⁿ tùi thiⁿ lâi tōa ê siaⁿ tùi in kóng, “Khí-lâi chia!” In chiū tī tùi-te̍k ê bīn-chêng chē-hûn chiūⁿ-thiⁿ.

¹³ Tú hit-sî ū tōa tōe-tāng, hit-chō siâⁿ tó cha̍p-hūn-chi̍t; in-ūi tōe-tāng sí--khì-ê ū chhit-chheng lâng; kî-tha ê lâng tōa kiaⁿ-hiâⁿ, kui êng-kng hō͘ thiⁿ-téng ê Siōng-tè.

¹⁴ Tē-jī ê chai-hō í-keng kè; tē-saⁿ ê chai-hō liâm-piⁿ kàu.

Tē-chhit Ki Lat-pah

¹⁵ Tē-chhit ê thiⁿ-sài pûn i ê lat-pah, thiⁿ-téng ū tōa ê siaⁿ, kóng: Sè-kan ê kok chiâⁿ-chòe lán ê Chú kap I só͘ siat-li̍p ê Ki-tok ê kok; I beh éng-éng-oán-oán choh-ông chiáng-koân.

¹⁶ Tī Siōng-tè bīn-chêng chē tī in ka-kī chō-ūi ê jī-cha̍p-sì ê tiúⁿ-ló, bīn phak lo̍h-khì kèng-pài Siōng-tè,

¹⁷ kóng: Hiān-chāi chûn-chāi, kè-khì chûn-chāi Choân-lêng ê Chú Siōng-tè, goán kám-siā lí; in-ūi lí í-keng chiáng-ak tāi-koân; lí í-keng choh-ông chiáng-koân.

¹⁸ Gōa-pang tōa siū-khì, lí mā hoat siū-khì; sí-lâng siū sím-phòaⁿ ê sî-ki kàu lah. Lí ê po̍k-jîn chèng sian-ti, lí ê sìn-tô͘, kap kèng-ùi lí ê miâ--ê, bô-lūn tōa--ê sòe--ê, lí pò-siúⁿ in ê sî-ki kàu lah. Pāi-hoāi tōe--ê, lí pāi-hoāi in ê sî-ki kàu lah.

¹⁹ Siōng-tè tī thiⁿ-téng ê sèng-tiān chiū khui; tī sèng-tiān lāi I ê iok-kūi khòaⁿ-hiān-hiān; hut-jiân ū sih-nà, hiáng-siaⁿ, lûi tân, tōe-tāng, kap tōa-pha̍uh.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan